استانالىق وقۋشىلار اقىلدى روبوت جاساپ شىعاردى
استانا. KAZINFORM - ەلوردالىق وقۋشىلار روبوتقا تەمىربەك دەگەن ات قويىپتى. اقىلدى روبوت قازاق تىلىندە سويلەيدى. بۇل تۋرالى قالالىق ءبىلىم باسقارماسى حابارلايدى.
روبوتتى مۇقاعالي ماقاتايەۆ اتىنداعى 74 مەكتەپ-گيمنازياسىنىڭ 10-سىنىپ وقۋشىلارى قۇراستىردى. تەمىربەك - وقۋشىلاردى ساباق بارىسىندا ىنتالاندىرۋ ءۇشىن تاپتىرماس قۇرال.
- سونداي-اق، ساباقتان سوڭ كەرى بايلانىس رەتىندە پايدالانۋدا وتە ءتيىمدى. روبوتقا قىزىعۋشىلىق تانىتقاندار بار. بۇگىندە تەمىربەك روبوتى ەلىمىزدىڭ باسقا قالالارىنداعى وقۋ ورىندارىندا ءبىلىم الۋشىلارمەن كەزدەسىپ ءجۇر، - دەيدى ينفورماتيكا ءپانىنىڭ مۇعالىمى ايدانا وڭعاربەك قىزى.
ونىڭ ايتۋىنشا، تەمىربەك قازاق تىلىندە سويلەيدى جانە سۇراقتارعا جاۋاپ بەرەدى. ەندى دارىندى وقۋشىلار روبوتتى جۇرگىزۋدىڭ جولىن ويلاستىرىپ جاتىر.
ايتا كەتەيىك، بيىل قازاقستاندىق وقۋشىلار روبوتوتەحنيكادان ءۇش دۇركىن الەم چەمپيونى اتاندى.
جازدا اقتاۋلىق وقۋشى حالىقارالىق روبوت تەحنيكاسى جارىسىندا باس جۇلدە العان ەدى.
