استانالىق ماماندار كوز اۋرۋىنا 99 پايىز ناقتى دياگنوز قوياتىن نەيروجەلى ويلاپ تاپتى

استانا. قازاقپارات - استانالىق ماماندار كوز اۋرۋلارىنىڭ دياگنوزىن انىقتايتىن نەيروجەلى ويلاپ تاپتى. ونىڭ ارتىقشىلىعى اۋرۋدىڭ بار- جوعىن 99 پايىزعا ناقتىلاپ بەرەدى.

قازىر بۇل ءادىس استانانىڭ بىرنەشە اۋرۋحاناسىندا قولدانىلىپ ءجۇر. دەگەنمەن ماماندار بۇل جەتىستىكپەن توقتاپ قالماي ونى ءالى دە جەتىلدىرۋگە كۇش سالىپ جاتىر. استانالىق يانا تەن كوز اۋرۋلارىنىڭ دياگنوزىن ناقتى انىقتايتىن نەيروجەلى ويلاپ تاپتى. ارنايى سايتقا كىرىپ، كوزدىڭ فوتودەرەگىن ەنگىزسەڭىز، بىردەن ناتيجەسىن كورسەتەدى.

يانا تەننىڭ ايتۋىنشا، جوبا ءالى دە تولىعا تۇسەدى، ارنايى جابدىقتارمەن قامتىلاتىن بولادى.

يانا تەن، جوبانىڭ نەگىزىن قالاۋشى:

- نەيروجەلى بازاعا ەنگەن فوتوسۋرەت ارقىلى دياگنوز قويادى. مۇنداعى ءبىر ارتىقشىلىق - اۋرۋدى 99,5 پايىزعا انىقتايدى. قازىر استانانىڭ بىرنەشە اۋرۋحاناسىندا بۇل ءادىس قولدانىلۋدا. ءبىراق ودان ءارى دامىتۋ ءۇشىن جۇمىس ىستەپ جاتىرمىز. بۇل - سيرەك كەزدەسەتىن اۋرۋلاردى انىقتاۋدا تاپتىرمايتىن ءادىس. سەبەبى الەمدە ءدال وسى دەرتتەن 500 ميلليوننان استام ادام زارداپ شەگەدى. ال ونىڭ 40 پايىزىنا دۇرىس دياگنوز قويىلمايدى.

زەرتتەۋ جۇمىسى ارقىلى ءبىز كوز اۋرۋىنىڭ دياگنوزى جۇيكە جۇيەسىنىڭ ەمدەلمەيتىن اۋرۋلارىن دا انىقتاي الادى. اۋرۋلاردى انىقتاپ قانا قويماي، ونى بەلگىلى ءبىر دامۋ ساتىسىندا توقتاتىپ قويۋعا دا مۇمكىندىك بار. الداعى ۋاقىتتا وسى زەرتتەۋدى اياقتاپ، ىسكە كوشەمىز دەگەن ويدامىز.

مامانداردىڭ ايتۋىنشا، اۋرۋدى دەر كەزىندە انىقتاماۋ - ونى ودان سايىن اسقىندىرادى. قازىر ۋاقىتىلى سكرينينگكە كەلمەگەندىكتەن كورۋ قابىلەتى ناشارلاپ كەتكەن ناۋقاستار كوپ دەيدى دارىگەر گۇلناز قاسىمبەكوۆا.

گۇلناز قاسىمبەكوۆا، كوز اۋرۋلار ينستيتۋتى بالالار بولىمشەسىنىڭ دارىگەرى:

- سكرينيگككە ۋاقىتىندا كەلۋ كەرەك. نەگە؟ سەبەبى بىزدە كورسەتىلەتىن ەم كەشىگىپ جاتادى. تۋا بىتكەن اقاۋلارمەن ءجيى كەلەدى عوي بىزگە. ۋاقىتتارىن وتكىزىپ العان كەزدەردە كومەكتەسۋ مۇمكىن ەمەس.

دۇنيەجۇزىلىك دەنساۋلىق ساقتاۋ ۇيىمىنىڭ ستاتيستيكاسىنا سۇيەنسەك، كوز اۋرۋلارىنىڭ %80 الدىن الۋعا جانە ەمدەپ جازۋعا بولادى. ول ءۇشىن الدىمەن دياگنوز دۇرىس بولۋ كەرەك جانە اۋرۋدى اسقىندىرماعان ءجون. ال دياگنوزدى ءدال انىقتاۋعا جاڭا باعدارلاما سەپ بولماق.

24.KZ