استانالىق جۇرگىزۋشىلەرگە نەگە ايىپپۇل كەلىپ جاتىر

استانا. KAZINFORM - قازاقستاندا كوپتەگەن كولىك جۇرگىزۋشىسى بۇرىن ەستىپ-بىلمەگەن جول ەرەجەسىن بۇزعانى ءۇشىن ايىپپۇل ارقالاپ جاتقانىن ايتا باستادى.

وسى رەتتە Halyq Uni ءتىلشىسى ىشكى ىستەر مينيسترلىگىنىڭ باسپا ءسوز قىزمەتىنەن ماسەلەنىڭ ءمان-جايىن سۇراپ بىلدى.

الدىمەن باعدارشامنىڭ سارى تۇسىنەن باستايىق. ءبىر نارسە انىق، جاسىل ءتۇس جانعاندا جۇرۋگە رۇقسات ەتىلسە، سارى ءتۇس - جۇرۋگە تىيىم. مۇنداعى جاڭالىق ازىرگە تەك استانا قالاسىندا جانە بۇل ماسەلە سيفرلاندىرىلعان. ياعني، بۇعان دەيىن كولىك جۇرگىزۋشىلەرىنىڭ سارى تۇسكە ءوتىپ كەتكەنىن پوليتسيا بايقاپ قالعاندا عانا جازالايتىن. ەندى، ءدال وسى ەرەجەنى بۇزاتىنداردى پوليتسيا ەمەس، «سەرگەك» كامەرالارى انىقتاپ وتىرادى. سول سەبەپتى استانالىق جۇرگىزۋشىلەرگە ايىپپۇل كەلىپ جاتىر.

ودان بولەك، ىشكى ىستەر مينيسترلىگى جول قوزعالىسىنا ءبىرشاما وزگەرىس ەنگىزدى. 2024-جىلعى 17-ساۋىردە ىشكى ىستەر ءمينيسترى «2023-جىلعى 30-ماۋسىمداعى 534-جول ءجۇرىسى قاعيدالارىن، كولىك قۇرالدارىن پايدالانۋعا رۇقسات بەرۋ جونىندەگى نەگىزگى ەرەجەلەردى، كولىگى ارنايى جارىق جانە دىبىس سيگنالدارىمەن جابدىقتالۋعا جانە ارنايى ءتۇستى-گرافيكالىق سحەمالار بويىنشا بويالۋعا ءتيىس جەدەل جانە ارنايى قىزمەتتەر تىزبەسىن بەكىتۋ تۋرالى» بۇيرىعىنا وزگەرىستەر مەن تولىقتىرۋلار ەنگىزۋ تۋرالى» بۇيرىققا قول قويدى.

سول بۇيرىققا سايكەس، جول ءجۇرىسى قاعيدالارىنا مىنا ماسەلەلەردى كوزدەيتىن ءبىرقاتار تۇزەتۋ بار. ماسەلەن، ۇزىكسىز تۇتاس ءبىر سىزىقپەن بولىنگەن جانە (نەمەسە) «باسىپ وزۋعا تىيىم سالىنادى» دەگەن بەلگىسى بار ەكىجولاقتى ەكىجاقتى كولىك قوزعالىسى بار جولداردا ەرەجەدە رۇقسات ەتىلگەن جايتتاردان باسقا جاعدايلاردا قارسى بەتكە شىعىپ كەتۋگە تىيىم سالىندى. ول اكىمشىلىك قۇقىقبۇزۋشىلىق كودەكستىڭ 596-بابىنىڭ 3-تارماعىنا جاتقىزىلىپ، قارسى ءجۇرىس جولاعىمەن جۇرگەن بولىپ ەسەپتەلەدى. بۇلاي ەرەجە بۇزعاندار 6 ايعا جۇرگىزۋشى كۋالىگىنەن ايرىلادى.

سونداي-اق ەلدى مەكەندەردە اۆتوبۋستاردىڭ جىلدامدىعى ساعاتىنا 50 شاقىرىمعا دەيىن تومەندەتىلدى.

قيىلىستاردا سولعا بۇرىلۋ كەزىندە قارسى باعىتتاعى كولىك وڭ جاعىنان ءوتۋ كەرەك. تەك وسىنداي مانيەۆر جاساۋعا مۇمكىندىك بەرمەيتىن ەرەكشە گەومەتريالىق پارامەترلەرى بار قيىلىستار بولەك قارالادى.

М3 ساناتىنداعى بارلىق كولىك قۇرالى ءۇشىن مارشرۋتتىق كولىك قۇرالدارىنا ارنالعان جولاقتىڭ قوزعالۋىنا بولادى. ياعني، جۇرگىزۋشى ورنىنان بولەك، تاعى كەمى 8 ورىندىعى بار كولىكتەر قالا ىشىندە قوعامدىق كولىك جولاعىمەن جۇرە الادى.

تىرەك-قيمىل اپپاراتى بۇزىلعان مۇگەدەكتىگى بار ادامداردىڭ (ءۇشىنشى توپتاعى) جول ينفراقۇرىلىمىنا قول جەتكىزۋىنە رۇقسات بەرىلدى. ماسەلەن، ەگەر بۇرىن كولىك قۇرالىنا «مۇگەدەكتىگى بار ادام» دەگەن تانىمدىق بەلگىسىن تەك 1 جانە 2 توپتاعى مۇگەدەكتىگى بار ادام جاپسىرا الاتىن بولسا، ەندى مۇنداي بەلگىنى تىرەك-قيمىل اپپاراتى بۇزىلعان 3 توپتاعى مۇگەدەكتىگى بار ادامدار دا پايدالانا الادى.

ەستەرىڭىزگە سالا كەتەيىك، مۇنداي بەلگى مۇگەدەكتىگى بار ادامدارعا ارنايى بولىنگەن اۆتوتۇراقتاردا (مۇگەدەكتەرگە ارنالعان تۇراق)، سونداي-اق، تۇراققا تىيىم سالىنعان ورىنداردا توقتاۋعا باسىم قۇقىق بەرەدى؛

سونىمەن بىرگە، ءبىرقاتار جاڭا جول بەلگىلەرى ەنگىزىلدى:

ەلەكتروساموكات جۇرىسىنە تىيىم سالىنادى؛

پاراللەل جاتقان جول بولىگىنە ءوتۋ؛

پاراللەل جول بولىگىنىڭ سوڭى؛

دياگونالدى جاياۋ جۇرگىنشىلەر وتكەلى جانە ت. ب.؛

بۇلارعا قوسا، مىناداي جاڭا تانىمدىق بەلگىلەر ەنگىزىلدى:

ەلەكتروموبيل

گاز باللونمەن جابدىقتالعان اۆتوكولىك.