نازاربايەۆ ۋنيۆەرسيتەتىنىڭ ستۋدەنتى جاتاقحانانىڭ 12- قاباتىنان سەكىرىپ كەتتى
استانا. KAZINFORM - ەلوردادا ستۋدەنت قىز تەرەزەدەن سەكىرىپ، مەرت بولدى. بۇل اقپاراتتى قالالىق پوليتسيا دەپارتامەنتىنىڭ باسپا ءسوز قىزمەتى راستادى.
- ەلوردادا 22 جاستاعى تۇرعىننىڭ ءمايىتى تابىلۋىنا بايلانىستى پوليتسيا قىزمەتكەرلەرى قىلمىستىق ءىس قوزعادى. الدىن الا مالىمەت بويىنشا، قىز جاتاقحانانىڭ 12-قاباتىنىڭ تەرەزەسىنەن قۇلاپ كەتكەن، - دەلىنگەن رەسمي اقپاراتتا.
قازىر وقيعانىڭ ءمان-جايى انىقتالىپ جاتىر.
ب ا ق پەن الەۋمەتتىك جەلىلەردە تاراعان اقپاراتقا سۇيەنسەك، قايعىلى جاعداي نازاربايەۆ ۋنيۆەرسيتەتىندە بولعان. قايعىلى جاعداي 15- تامىزدا بولعانى ايتىلدى، ءبىراق بۇل تۋرالى اقپارات ەندى بەلگىلى بولىپ وتىر. استانا پوليتسيا دەپارتامەنتى مالىمەتىنشە، 22 جاستاعى قىزدىڭ قازاسىنا بايلانىستى قىلمىستىق ءىس قوزعالعان.
نازاربايەۆ ۋنيۆەرسيتەتىنىڭ باسپا ءسوز قىزمەتى وكىلى كامپۋس اۋماعىندا بولعان قايعىلى جاعدايدى راستادى.
«ۋنيۆەرسيتەت مارقۇمنىڭ وتباسى مەن جاقىندارىنا شىن جۇرەكتەن كوڭىل ايتادى. بارلىق قاجەت ارەكەت جەدەل قابىلداندى: توتەنشە قىزمەتتەر مەن قۇقىق قورعاۋ ورگاندارى جۇمىلدىرىلدى، سونداي-اق، پسيحولوگيالىق قولداۋ كورسەتىلىپ جاتىر»، - دەدى ۋنيۆەرسيتەتتىڭ باسپا ءسوز قىزمەتى وكىلى.
ەسكە سالا كەتسەك، بۇل - كەيىنگى ءبىر ايدا نازاربايەۆ ۋنيۆەرسيتەتىندە بولعان ەكىنشى قايعىلى جاعداي. 18- شىلدەدە جاتاقحانادان ءبىر ستۋدەنت قىزدىڭ ءمايىتى تابىلعان ەدى.
