استانالىق اجەلەر ءانسامبلى ازەربايجانداعى بايقاۋدا ءبىرىنشى ورىن الدى

استانا. KAZINFORM — ونەر جارىسىندا ءانشى اجەلەرىمىزبەن قاتار وزبەكستاننان جانە ت. ب. ەلدەردەن كەلگەن 400 دەن اسا ۇمىتكەر سايىسقا ءتۇستى، دەپ حابارلايدى ەلوردا اكىمدىگى.

استانادا ەسىل اۋدانى بويىنشا بەلسەندى ۇزاق ءومىر ءسۇرۋ ورتالىعىنىڭ زەينەتكەر اجەلەرىنەن قۇرالعان «ساعىنىش سازى» ءانسامبلى باكۋ قالاسىندا وتكەن «AZERBAIJAN GRAND FESTIVAL» ءان بايقاۋىندا جۇلدەلى ءبىرىنشى ورىنعا يە بولدى.

فەستيۆال ۇلتارالىق قارىم-قاتىناس پەن مۋزىكالىق مادەنيەتتى نىعايتۋ ماقساتىندا ناۋرىز ايىنىڭ سوڭعى كۇندەرى «اstana Stars» حالىقارالىق كونكۋرستار كوميتەتىنىڭ ۇيىمداستىرۋىمەن وتكەن بولاتىن.

اجەلەر ءانسامبلىنىڭ ۇجىمىنا ق ر ەڭبەگى سىڭگەن مادەنيەت قايراتكەرى جاناربەك يسكەندىروۆ جەتەكشىلىك ەتەدى، ال ءانسامبلدىڭ بەلدى جۇشەسى ءشاربات قۇرمانوۆا ءانسامبلدىڭ كوركەمدىك جۇمىسىمەن جانە رەپەرتۋارىن قالىپتاستىرۋمەن اينالىسادى.

انسامبل ءوز جۇمىسىن 2019 -جىلدىڭ جەلتوقسان ايىندا سارىارقا اۋدانىنا قاراستى قالالىق ارداگەرلەر ۇجىمىندا باستادى.

ونەر ۇجىمىنىڭ العاش قۇرىلعان كەزدە حالىق اندەرىن ورىنداۋدان باستاعان ەدى. ۇنەمى شىعارماشىلىق ىزدەنىستە جۇرگەن ءانسامبلدىڭ رەپەرتۋارى بۇگىندە ءار ءتۇرلى، ءان قورجىنىندا 80 گە جۋىق ءان بار.

- ءبىزدىڭ ورتالىقتىڭ ونەرلى زەينەتكەرلەرى حالىقارالىق دەڭگەيدەگى ءان بايقاۋىنان جۇلدەمەن ورالۋى ءبىز ءۇشىن ۇلكەن جەتىستىك. «ساعىنىش سازى» ءانسامبلىنىڭ قۇرىلعانىنا 5 جىل تولدى، جاقىندا ءوزىنىڭ بەس جىلدىق ەسەپتىك كونتسەرتىن وتكىزگەن بولاتىن. بۇل ونەر ۇجىمىنا 62-72 جاس ارالىعىندا ءان ايتۋمەن اۋەستەنەتىن اجەلەر جينالعان. انسامبل ءاردايىم شىعارماشىلىق ىزدەنىس ۇستىندە. ولاردىڭ رەپەرتۋارى ءارالۋان، تەرمە، حالىق جانە ەسترادالىق اندەرمەن قاتار، باسقا دا جانرداعى اندەردى ورىندايدى، - دەپ ءسوزىن تۇيىندەدى ەسىل اۋدانى بويىنشا الەۋمەتتىك قىزمەت كورسەتۋ ءبولىمىنىڭ باسشىسى جانار ەسەنامانوۆا.

وسى بايقاۋدا ءبىرىنشى ورىندى جەڭىپ العان «ساعىنىش سازى» ارداگەرلەر ءانسامبلى گرەكيانىڭ سالونيكي قالاسىندا وتەتىن GREECE GRAND FESTIVAL بايقاۋىنا جولداما الدى.

وسىعان دەيىن ۇلتتىق ۇلان اسكەري تەحنيكانى شەرۋگە دايىنداپ جاتقانى حابارلاندى.