استاناداعى «وتباسى بانك» فيليالدارىندا ۇزىن-سونار كەزەك پايدا بولدى

استانا. KAZINFORM - استاناداعى «وتباسى بانك» فيليالدارىندا ۇزىن-سونار كەزەك پايدا بولدى. تاڭەرتەڭگى 09:00 دە تالون العان ادامداردىڭ وزىنە ەندى عانا قىزمەت كورسەتىلىپ جاتىر، دەپ حابارلايدى Kazinform.

ماڭگىلىك ەل، 27 مەكەنجايىنداعى بانك فيليالىنىڭ قابىلداۋ ءبولىمى قىزمەتكەرلەرىنىڭ ايتۋىنشا، بۇگىن قىزمەت الۋعا جۇگىنگەن ادامداردىڭ سانى ادەتتەگىدەن كوپ.

- دەمالىس كۇندەرى دەپوزيت سالىمشىلارىنا مەملەكەتتىك سىيلىقاقى ءتۇسىپ بولدى. كۇنى ەرتەڭ «ناۋرىز» باعدارلاماسى بويىنشا ءوتىنىم قابىلداۋ باستالادى. وسى ارالىقتا ادامدار وتباسى مۇشەلەرىنىڭ، تۋىستارىنىڭ اتىنا اشىلعان دەپوزيت ۇياشىقتارىن بىرىكتىرىپ ۇلگەرۋگە اسىعىپ جاتىر. سودان دا قىزمەت الۋشىلار سانى كۇرت كوبەيىپ كەتتى دەپ ويلايمىن، - دەيدى كونسۋلتانتتار.

ال «وتباسى بانك» موبيلدى قوسىمشاسى ارقىلى كەزەكتى برونداۋدىڭ ەڭ جاقىن داتاسى 11-ناۋرىزدان باستالىپ تۇر.

ودان بولەك، كەزەكتە تۇرعاندار اراسىندا زەينەتاقى قورىنان وتباسى بانكىندەگى ارنايى شوتقا اۋدارىلعان قارجىمەن يپوتەكالىق نەسيەنى ءىشىنارا جابۋعا كەلگەندەر دە بار. ولاردىڭ ءبىرى بۇل وپەراتسيانى ونلاين جاساي المايتىنىن ايتادى. ال ەندى ءبىرى كوروناۆيرۋس كارانتينى كەزىندە «3-ايلىق نەسيەلىك كانيكۋل» الۋى سەبەپتى بۇل وپەراتسيا ەندى وعان تەك وفلاين تۇردە جاسالاتىنىن ايتادى.

ايتا كەتەيىك، 5-ناۋرىزدا «ناۋرىز» باعدارلاماسىنىڭ ەكىنشى كەزەڭى ىسكە قوسىلادى.

17-ناۋرىزدا «ناۋرىز جۇمىسكەر» باعدارلاماسىنا ءوتىنىم قابىلداۋ باستالادى.