استاناداعى كولىك كومپانياسى اۆتوبۋس جولاۋشىلارىنا ماڭىزدى مالىمدەمە جاسادى

استانا. قازاقپارات - CTS كولىك كومپانياسى اۆتوبۋستاعى جوعالعان زاتتارعا قاتىستى مالىمدەمە جاسادى، دەپ حابارلايدى استانا اكىمدىگىنىڭ رەسمي سايتى.

CTS كولىك كومپانياسى قالا تۇرعىندارى مەن قوناقتارىنا حابارلاندىرۋىندا اۆتوبۋستان تابىلعان بارلىق زاتتى جۇرگىزۋشىگە تاپسىرۋ كەرەك ەكەنىن باسا ايتقان. ءار اۆتوبۋستىڭ سالونىندا 4-تەن 8-گە دەيىن بەينەباقىلاۋ كامەراسى ورناتىلعانىن، جولاۋشىلاردىڭ كىرۋ/شىعۋىنان بولەك، كامەرالار دىبىستى دا جازاتىنىن حابارلاعان.

قالاداعى قوعامدىق كولىكتەردىڭ بىرىندە جۋىردا ايەل ادام ۇيالى تەلەفونىن ۇمىتىپ كەتكەن. ول ءبىر ايالدامادان كەيىن قايتىپ ورالعاندا سمارتفون ورنىندا بولماعان. وسىنداي جاعدايلار قايتالانباس ءۇشىن CTS كولىك كومپانياسى جولاۋشىلارعا مۇقيات بولۋدى، وزگەنىڭ مۇلكىنە قول سۇقپاۋدى، جوعالعان دۇنيەنى كورگەن جاعدايدا اۆتوبۋس جۇرگىزۋشىسىنە تاپسىرۋدى ەسكەرتكەن.

«قۇرمەتتى جولاۋشىلار، اۆتوبۋس سالونىندا سومكە، تەلەفون جانە باسقا دا زاتتار تابىلعان كەزدە ولاردى جۇرگىزۋشىگە تاپسىرۋلارىڭىزدى سۇرايمىز. ءوز زاتىن ۇمىت قالدىرعان ادام وعان مىندەتتى تۇردە ورالاتىنى انىق. ويتكەنى وعان ءوزىنىڭ زاتى اسا قاجەت ەكەنى بەلگىلى. ال، جۇرگىزۋشى ءوز كەزەگىندە اۋىسىم اياقتالعاننان كەيىن تابىلعان زاتتى اۆتوبۋس پاركىنىڭ ديسپەتچەرىنە تاپسىرادى»، - دەلىنگەن كومپانيا حابارلاماسىندا.