استاناداعى جۇرگىزۋشىسىز پويىزعا قار تازالاۋشى كەرەك؟
استانا. KAZINFORM - استانادا جەڭىل رەلستى كولىك (LRT) جەلىسىنە العاشقى ەكى قۇرام ورناتىلدى. Kazinform اگەنتتىگىنىڭ ءتىلشىسى ۆاگوندار قانشالىقتى ىڭعايلى جانە قىس مەزگىلىندە قالاي جۇمىس ىستەيتىنىن انىقتاعان ەدى.
جولاۋشىلارعا ارنالعان جايلىلىق
City Transportation Systems كومپانياسىنىڭ مالىمەتىنشە، ءبىر قۇرامنىڭ جالپى سىيىمدىلىعى – 600 دەن استام ادام (1 شارشى مەترگە 6 ادام ەسەبىمەن).
مۇمكىندىگى شەكتەۋلى جاندار ءۇشىن ءبىرىنشى جانە ءتورتىنشى ۆاگوندا ارنايى 2 ورىن قاراستىرىلعان جانە ىڭعايلى ارنايى تاقتايشا قويىلعان.
Wi-Fi بولا ما؟
LRT پويىزدارىندا Wi-Fi جەلىسىنە قوسىلۋ قاراستىرىلماعان، سەبەبى بۇكىل جەلى ەستاكادا بويىمەن وتەدى. سونداي-اق ۆاگونداردا USB- قۋاتتاعىشتار دا ورناتىلماعان.
نەلىكتەن جۇرگىزۋشىسىز پويىزعا قار تازالاۋشى كەرەك؟
LRT پويىزدارى اۆتوماتتى تۇردە باسقارىلاتىن بولسا دا، الدىڭعى تەرەزەلەردىڭ قارىن تازالايتىن جۇمىسشى بولادى. CTS كومپانياسىنىڭ اقپاراتىنا سۇيەنسەك، الدىڭعى تەرەزە استىندا پويىزداردى اۆتوماتتى باسقارۋعا ارنالعان كامەرالار مەن داتچيكتەر بار. اتالعان قۇرىلعىلاردىڭ دۇرىس جۇمىس ىستەۋى ءۇشىن، كورۋ ايماعى تازا بولۋى قاجەت.
قىستا LRT قۇرامى قالاي قىزمەت كورسەتەدى
قىستىڭ كۇندەرى بۇرمالار مەن رەلس جولدارىن مۇز بەن قار باسىپ قالماۋى ءۇشىن ەلەكترلى ۇرلەۋ جۇيەسى قولدانىلادى. مامانداردىڭ ايتۋىنشا، اتالعان جۇيە زاماناۋي مەتروپوليتەن جەلىلەرىندە جانە باسقا ەلدەردىڭ LRT جەلىلەرىندە تيىمدىلىگىن دالەلدەگەن.
ءبىر اپتا بۇرىن استانادا LRT- نىڭ ەكىنشى قۇرامى قويىلدى.
ماۋسىمدا № 101 ستانسياسىنا العاشقى LRT قۇرامى كوتەرىلدى.
ايتا كەتەيىك، ەلوردا اكىمى جەڭىس قاسىمبەك 2026 -جىلدىڭ 1-توقسانىندا LRT رەسمي ىسكە قوسىلاتىنىن مالىمدەدى.
اۆتور
داۋلەت ىزتىلەۋ
