استاناداعى بوكستان الەم كۋبوگىنا قاتىساتىن قۇرامالار سانى كوبەيدى
استانا. KAZINFORM - استانادا وتەتىن بوكستان الەم كۋبوگىنا قاتىساتىن قۇرامالار سانى كوبەيىپ، قازىر ولاردىڭ سانى 33 كە جەتتى.
وعان الەمنىڭ ۇزدىك بىلعارى قولعاپ شەبەرلەرى قاتىسادى دەپ جوسپارلانىپ وتىر. ەل قۇراماسى وندا ءبىرىنشى قۇرامىمەن شارشى الاڭعا شىعادى.
الەم كۋبوگى ەلورداداعى ج. ۇشكەمپىروۆ اتىنداعى جەكپە-جەك سارايىندا وتەدى.
World Boxing ءتۋرنيرى ءۇش كەزەڭنەن تۇرادى. ءساۋىر ايىندا برازيليانىڭ فوس-دۋ-يگۋاسۋ قالاسىندا World Boxing اياسىندا وتكەن بوكستان الەم كۋبوگىندا داۋلەت تولەمىسوۆ (85 كەلى)، نۇرسۇلتان التىنبەك (55 كەلى)، جازيرا وراقبايەۆا (51 كەلى) چەمپيون اتاندى.
ال ۇلجان سارسەنبەك (57 كەلى)، دياس مولجىگىتوۆ (75 كەلى)، دانيال ساپارباي (90 كەلىدەن جوعارى) قولا جۇلدەگە قول سوزدى.
ال ءۇشىنشى كەزەڭ 21-27-شىلدە ارالىعىندا وتەدى. ازىرگە ونىڭ قايدا وتەتىنى بەلگىلى بولعان جوق.
باس باپكەر قايرات ءساتجانوۆ اتالعان جارىسقا ءبىرىنشى ءنومىرلى بىلعارى قولعاپ شەبەرلەرىنە ءۇمىت ارتاتىنىن ءمالىم ەتتى. ولاردىڭ قاتارىندا سانجار تاشكەنباي (50 كەلى)، ماحمۇد سابىرحان (55 كەلى)، سەرىك تەمىرجانوۆ (60 كەلى)، ەرتۋعان زەينۋللينوۆ (65 كەلى)، ابىلايحان ءجۇسىپوۆ (70 كەلى)، سابىرجان اققالىقوۆ (75 كەلى)، نۇربەك ورالباي (80 كەلى)، بەكزاد نۇرداۋلەتوۆ (85 كەلى)، ساعىندىق توعامباي (90 كەلى)، ايبەك ورالباي (90 كەلىدەن جوعارى) بار.
ۇلتتىق قۇراما العاشقى وقۋ-جاتتىعۋ جيىنىن 1-18-مامىر ارالىعىندا تۇركىستان وبلىسىندا وتكىزدى. ەندى دايىندىقتىڭ ەكىنشى كەزەڭى 26-مامىر-9-ماۋسىم ارالىعىندا اقمولا وبلىسى شۋچينسك قالاسىندا ۇيىمداستىرىلادى.
سوڭعى وقۋ-جاتتىعۋ جيىنى 17-29-ماۋسىم ارالىعىندا وتەدى. بۇل - حالىقارالىق دەڭگەيدە وتەتىن بىرىككەن جاتتىعۋ جيىنى. وعان ا ق ش، كانادا، يرلانديا، برازيليا جانە اۋستراليا سىندى ەلدەردىڭ بوكسشىلارى قاتىسادى.
