استاناداعى الىپ ساعاتتىڭ جابدىقتارىن ۇرلاعاندار تابىلماي جاتىر

استانا. قازاقپارات - 2019-جىلدان بەرى ەسىل جاعالاۋىنداعى الىپ ساعات جۇمىس ىستەمەي تۇر. ونىڭ توقتاۋ سەبەبى - ساعاتتىڭ ەنەرگيامەن جابدىقتاۋ كابەلدەرى مەن باسقا دا كەرەك-جاراقتارىن ۇرلاپ كەتكەن.

پوليتسيا دەپارتامەنتىنىڭ حابارلاۋىنشا، قىلمىستىق ءىستى «ەسىل» اۋدانىنىڭ باسقارماسى ق ر قىلمىستىق كودەكسىنىڭ 188-بابى بويىنشا «جاستار سارايى» ديرەكتورىنىڭ ءوتىنىشى نەگىزىندە قوزعاعان.

«سوتقا دەيىنگى تەرگەپ-تەكسەرۋ ناتيجەسى بويىنشا قىلمىستىق ءىس جۇرگىزۋ ق ر قىلمىستىق-پروتسەستىك كودەكسىنىڭ 45-بابى 7-بولىگى 1-تارماعىنىڭ نەگىزىندە، ياعني قىلمىس جاساعان ادامنىڭ تابىلماعانى ءۇشىن توقتاتىلدى. بۇل شەشىم استانا قالاسىنىڭ «ەسىل» اۋدانىنىڭ پروكۋراتۋراسىمەن كەلىسىلدى. سونىمەن قاتار كۇدىكتى ادامدى انىقتاۋ بويىنشا جەدەل-ىزدەستىرۋ ءىس-شارالارى جالعاسىپ جاتىر»، - دەلىنگەن قالالىق پوليتسيانىڭ Kazinform اگەنتتىگىنىڭ ساۋالىنا بەرگەن جاۋابىندا.

ءوز كەزەگىندە قالالىق ۋربانيستيكا ورتالىعى تەحنيكالىق زەرتتەۋ جۇرگىزۋ جانە سۋبۇرقاقتى ىسكە قوسۋ ءۇشىن جەكە كومپانيالاردى تارتۋ ماسەلەسىن قاراستىرعانىن حابارلادى.

ەسكە سالا كەتەيىك، بىلتىر كۇزدە استاناداعى الىپ ساعاتتىڭ نەگە جۇمىس ىستەمەيتىنى تۋرالى جازعان ەدىك.

ايتا كەتسەك، «الىپ ساعات» ديزاينى - سۋ اعىنى ارقىلى لازەرلىك شوۋدى تاراتۋعا ارنالعان ەكران رەتىندەگى سۋبۇرقاقتىڭ ءبىر ءتۇرى. ونىڭ قۇرىلىسى 2016-جىلى «سۋ ەكستراۆاگانزاسى» (ديزاين جوباسى) ءىس-شاراسىن دايىنداۋ جانە وتكىزۋ ءۇشىن ساتىپ الىندى.