استانادا ۇيىنە 16 جىل بويى قۇجات الماعان ادامدار بار

استانا قالاسىنىڭ اكىمى جەڭىس قاسىمبەك Instagram پاراقشاسىندا «نۇر-بەسىك» شاعىناۋدانىنىڭ ماسەلەسىن كوتەردى، دەپ حابارلايدى Kazinform.

«ەلوردادا 200 دەن استام ءۇي ورنالاسقان «نۇربەسىك» شاعىناۋدانى (كوكتال 1 ەلدى مەكەنى) بار. مۇندا مىڭنان استام ادام ءومىر سۇرەدى. بۇل شاعىناۋداندا قالا تۇرعىندارى 2007-جىلدان بەرى تۇرىپ جاتقانىمەن 16 جىلدان بەرى ۇيلەرىنە قۇقىق بەلگىلەيتىن قۇجاتتارى بولماعان. سول سەبەپتى ولار ءوز ۇيىنە تىركەلە الماعان. وسىلايشا ەمحاناعا تىركەلۋىنە، بالالارىن بالاباقشاعا، مەكتەپكە بەرۋىنە مۇمكىندىگى بولمادى. ولار دوستارى مەن تۋىستارىنىڭ ۇيلەرىنە تىركەلۋگە ءماجبۇر بولدى»، - دەيدى ول.

اكىمنىڭ ايتۋىنشا، «نۇربەسىك» شاعىناۋدانىنىڭ تۇرعىندارى جەر ۋچاسكەسىن زاڭداستىرۋ ماسەلەسىن بىرنەشە رەت كوتەرگەن.

بۇل باعىتتا اۋقىمدى جۇمىس اتقارىلىپ، تەحنيكالىق ماسەلەنىڭ ءبارى شەشىلدى.

قازىرگى ۋاقىتتا تۇرعىندارعا قۇقىق بەلگىلەيتىن قۇجاتتاردى بەرۋ ءراسىمى ءجۇرىپ جاتىر.

ەندى ولاردى رەسمي تۇردە ەلوردا تۇرعىنى دەپ ايتۋعا بولادى جانە 16 جىلدان كەيىن تىركەلە الادى.

«شاعىناۋداندى اباتتاندىرۋمەن دە اينالىسىپ جاتىرمىز: سۋمەن جابدىقتاۋ، سۋ بۇرۋ، نوسەر كارىزى، ەلەكترمەن جابدىقتاۋ، گازبەن جابدىقتاۋ سەكىلدى ينجەنەرلىك جەلىلەردىڭ قۇرىلىسى بويىنشا جۇمىس اياقتالدى. سول سياقتى كوشەلەرگە اسفالت توسەلدى، جارىقتاندىرۋ باعانالارى، 3 ايالداما، ينتەرنەت ورناتىلدى، ت. ب. ءبىز قالانىڭ ەلدى مەكەندەرىن دامىتۋدى ارى قاراي جالعاستىرامىز»، - دەپ جازدى جەڭىس قاسىمبەك.