استانادا ىسكە جارامدى قانشا بومباپانا بار

دەپۋتاتتار ەلورداداعى بومباپانالاردىڭ ورنالاسقان جەرىن اشىق جاريالاۋدى سۇرادى، دەپ حابارلايدى قازاقپارات ءتىلشىسى.

«قۇداي ساقتاسىن، بومبا تاستالسا نەمەسە لاڭكەستىك اكتىلەر بولسا الدىمەن قاراپايىم حالىق زارداپ شەگەدى. سىزدەردىڭ فۋنكتسياڭىز - حالىقتى قورعاۋ. مىسالى، مەن ەڭ جاقىن بومباپانانىڭ قايدا ەكەنىن بىلمەيمىن. مۇمكىن، ماسەلەنى زاڭداستىرۋ كەرەك شىعار؟ قاۋىپ-قاتەردىڭ بارى راس. دابىل قاعىلسا، مەن قايدا بارامىن؟ الەمدە بار قاۋىپ-قاتەرلەرگە قاراساق، بۇل وزەكتى ماسەلە»، - دەدى قالالىق ءماسليحات دەپۋتاتى قانات يبرايەۆ.

حالىق قالاۋلىسىنىڭ ساۋالىنا جاۋاپ بەرگەن قالالىق توتەنشە جاعدايلار دەپارتامەنتى باسشىسىنىڭ ورىنباسارى دامير ەرماعامبەتوۆ بومباپانالارعا قاتىستى اقپاراتتىڭ اشىق جاريا ەتىلمەيتىنىن ايتتى.

«بومباپانالاردىڭ ورنالاسقان جەرى بويىنشا مالىمەتتەر بار، ءبىراق ولاردى جاريا تۇردە ايتا المايمىن، جازباشا تۇردە بەرە الامىن»، - دەدى ول.

اتالعان ماسەلەنى سەنات دەپۋتاتى اندرەي لۋكين دە كوتەردى. ونىڭ ايتۋىنشا، اكىمدىكتىڭ كوممۋنالدىق مۇلىك باسقارماسى بومباپانالاردى ساتۋ بويىنشا اشىق كونكۋرستار جاريالاعان.

دەپۋتاتتىڭ مالىمدەۋىنشە، اكىمدىك 2019-2020-جىلدارى دۇكەن ۇلى كوشەسىندەگى جانە باسقا دا بومباپانالاردى جەكە مەنشىككە ساتتى. سەناتور ەلوردا تۇرعىندارى ءۇشىن بومباپانالاردىڭ ورنالاسقان جەرى تۋرالى اقپاراتتى اشىق جاريالاۋعا شاقىردى.

«قالاداعى بومباپانا بويىنشا تولىق مونيتورينگ جۇرگىزىلدى. ونىڭ ىشىندە 25 بومپانا ىسكە جارامدى بولىپ شىقتى. ولاردىڭ قۇجاتى ازىرلەنىپ، ازاماتتارعا ارنالعان ۇكىمەت پورتالىندا تىركەلدى. سونىمەن قاتار اتالعان بومباپانالار ازاماتتىق قورعانىستى قامتۋ ورتالىعىنا بەرىلدى»، - دەدى استانا قالاسى اكىمىنىڭ ورىنباسارى ەرسىن وتەبايەۆ.