استانادا وتەتىن حالىقارالىق ءىس-شاراعا الەمنەن 600 گە جۋىق مەيمان كەلەدى

استانا. KAZINFORM - بيىل 29-30-مامىردا ەلوردادا الەمدىك كوشباسشىلاردى، ساراپشىلاردى، ينۆەستورلار مەن بيزنەس وكىلدەرىن بىرىكتىرەتىن ايماقتاعى ەڭ ءىرى ىسكەرلىك ءىس-شارا - استانا حالىقارالىق فورۋمى (AIF2025) وتەدى.

ۇلتتىق ەكونوميكا مينيسترلىگى تاراتقان اقپاراتقا سۇيەنسەك، فورۋم باعدارلاماسى بۇگىننىڭ نەگىزگى سىن-قاتەرلەرىن قامتىعان پلەنارلىق سەسسيا مەن 25 پىكىرتالاس الاڭىنان تۇرادى. الەمنىڭ تۇكپىر- تۇكپىرىنەن 600 گە جۋىق شەتەلدىك قوناق قاتىسپاق. ولاردىڭ اراسىندا جەتەكشى ساياساتكەرلەر، حالىقارالىق ۇيىم، كورپوراتسيا باسشىلارى، ينۆەستورلار مەن عىلىمي توپ وكىلدەرى بار.

AIF- 2025 فورۋمىنا قاتىسۋدى راستاعاندار:

پول كاگامە - رۋاندا رەسپۋبليكاسىنىڭ پرەزيدەنتى؛

ەدي راما - البانيا پرەمەر-ءمينيسترى؛

اندرەي پلەنكوۆيچ - حورۆاتيا رەسپۋبليكاسىنىڭ پرەمەر-ءمينيسترى؛

مۋحاممەد بين ابدۋلراحمان ال-تاني - پرەمەر-مينيستر- كاتار سىرتقى ىستەر ءمينيسترى؛

پان گي مۋن - ب ۇ ۇ 8-باس حاتشىسى، Green Global Growth Institute ءتوراعاسى، «Boao Forum for Asia» ديرەكتورلار كەڭەسىنىڭ ءتوراعاسى؛

الەن بەرسە - ەۋروپا كەڭەسىنىڭ باس حاتشىسى؛

سيۋي دۋنيۋي - ب ۇ ۇ ازىق-تۇلىك جانە اۋىل شارۋاشىلىعى ۇيىمىنىڭ باس ديرەكتورى (FAO)

ەمي پوۋپ - كوشى-قون جونىندەگى حالىقارالىق ۇيىمنىڭ باس ديرەكتورى (ى و م)؛

ماتياس كورمانن - ە ى د ۇ باس حاتشىسى؛

دارەن تانگ - زياتكەرلىك مەنشىك جونىندەگى دۇنيەجۇزىلىك ۇيىمنىڭ باس ديرەكتورى؛

انتونەللا باسساني - ەۋروپا جانە ورتالىق ازيا ايماعى بويىنشا دۇنيەجۇزىلىك بانكتىڭ ۆيتسە-پرەزيدەنتى؛

حاوليان سيۋي - ب ۇ ۇ باس حاتشىسىنىڭ ورىنباسارى جانە دامۋ باعدارلاماسى اكىمشىسىنىڭ ورىنباسارى؛

جين ليچيۋن - ازيا ينفراقۇرىلىمدىق ينۆەستيسيالار بانكىنىڭ (ا ي ي ب) پرەزيدەنتى جانە ديرەكتورلار كەڭەسىنىڭ ءتوراعاسى؛

يۋرگەن ريگتەرينك - ە ق د ب ءبىرىنشى ۆيتسە-پرەزيدەنتى؛

كۋبانىچبەك ومۋراليەۆ - تۇركى مەملەكەتتەرى ۇيىمىنىڭ باس حاتشىسى؛

سەباستيان كۋرس - اۆستريانىڭ 26-فەدەرالدىق كانسلەرى.

پىكىرتالاس تاقىرىپتارىنا كەلسەك، بيىل AIF جاھاندىق كۇن تارتىبىندەگى نەگىزگى ءۇش باعىتقا نازار اۋدارادى:

- سىرتقى ساياسات جانە حالىقارالىق قاۋىپسىزدىك؛

- ەنەرگەتيكا جانە كليماتتىڭ وزگەرۋى؛

- ەكونوميكا جانە قارجى.

- استانا حالىقارالىق فورۋمى 2025 ينۆەستيسيا ءۇشىن جاھاندىق باسەكەلەستىك داۋىرىندە وتكىزىلىپ، قازاقستاننىڭ الەمگە اشىقتىعىن كورسەتەدى. ءبىزدىڭ ەلىمىز ءىرى الەمدىك كورپوراتسيالار مەن قارجى ينستيتۋتتارىنىڭ نازارىن اۋدارا وتىرىپ، ورتالىق ازياداعى ءوز پوزيتسياسىن نىعايتا تۇسۋدە. اۋقىمدى رەفورمالار، زاڭنامانى جاڭعىرتۋ مەن ينۆەستيسيالىق احۋالدى جاقسارتۋ ەلدىڭ دامۋىنا جانە ونىڭ ەكونوميكالىق مۇمكىندىگىن كەڭەيتۋگە ىقپال ەتەدى. فورۋمنىڭ مىندەتى - اشىق ديالوگ پەن شەتەلدىك كاپيتال تارتۋدىڭ، ستراتەگيالىق كەلىسىمدەر جاساسۋ مەن ەكونوميكالىق دامۋعا ارنالعان باستامالاردى ىلگەرىلەتۋ ءۇشىن ماڭىزدى پلاتفورما بولۋ، - دەلىنگەن حابارلامادا.

سونداي-اق AIF2025 اياسىندا قازاقستاننىڭ نەگىزگى ارىپتەستەرىمەن ەكونوميكالىق بايلانىستاردى نىعايتۋعا ارنالعان ءبىرقاتار بيزنەس- فورۋم جوسپارلانىپ وتىر:

- قازاقستان- فرانسيا بيزنەس- فورۋمى (2025 -جىلعى 28-مامىر)؛

- قازاقستان- يتاليا بيزنەس- فورۋمى (2025 -جىلعى 28-مامىر).

- اتالعان ءىس-شارالار حالىقارالىق ىنتىماقتاستىق، تەحنولوگيا الماسۋ جانە بىرلەسكەن ينۆەستيسيالىق جوبالاردى ىسكە اسىرۋ ءۇشىن جاڭا مۇمكىندىك بەرمەك، - دەيدى ۇلتتىق ەكونوميكا مينيسترلىگىنەن.

ەسكە سالا كەتسەك، بيىل اقپاندا ۇكىمەت باسشىسىنىڭ استانا حالىقارالىق فورۋمىن وتكىزۋ تۋرالى وكىمى شىقتى.

كەيىن استانا حالىقارالىق فورۋمىنىڭ شىعىنىن دەمەۋشىلەر كوتەرەتىنى بەلگىلى بولدى.

اۆتور

داۋلەت ىزتىلەۋ