استانادا وتەتىن دۇنيەجۇزىلىك كوشپەندىلەر ويىنىنىڭ تيزەرى جاريالاندى

استانا. KAZINFORM - بيىل 8-14- قىركۇيەك ارالىعىندا استانا تورىندە وتەتىن V دۇنيەجۇزىلىك كوشپەندىلەر ويىندارىنىڭ تيزەرى جاريالاندى.

كوشپەندىلەر ويىنىنا 100 دەن استام مەملەكەتتەن 4000 عا جۋىق سپورتشى قاتىسىپ، استاناعا 100 مىڭنان استام تۋريست كەلەدى.

ات سپورتى، ۇلتتىق كۇرەس تۇرلەرى، ساداق اتۋ، جامبى اتۋ، ءداستۇرلى ينتەللەكتۋالدى ويىندار، ساياتشىلىق ونەر، ارقان تارتۋ سىندى ويىننىڭ 20 تۇرىنەن جارىس جانە ۇلتتىق ونەردىڭ 10 تۇرىنەن ارنايى كورسەتىلىم سايىسى وتەدى.

5-دۇنيەجۇزىلىك كوشپەندىلەر ويىندارىنىڭ اشىلۋ سالتاناتى «استانا-ارەنا» ستاديونىندا، جابىلۋى 10 مىڭ ادامدىق «قازانات» يپپودرومىندا وتەدى دەپ جوسپارلانعان. «قازانات» يپپودرومى اۋماعىندا «كوشپەندىلەر الەمى» ەتنواۋىلى قۇرىلادى.

ءبىر كۇندە 30 مىڭ كەلۋشىنى قابىلدايتىن ەتنواۋىلدا قازاقستان مەن الەم ەلدەرىنىڭ ۇزدىك قولونەر شەبەرلەرىنىڭ كورمە-جارمەڭكەسى، شەبەرلىك ساباقتارى، اقىندار ايتىسى مەن ءتول مادەنيەتىمىزدى پاش ەتەتىن قوسىمشا ءىس-شارالار ۇيىمداستىرىلادى.

5-دۇنيەجۇزىلىك كوشپەندىلەر ويىنىنىڭ ۇرانى - ۇلى دالا ءدۇبىرى.

اۆتور كۇنسۇلتان وتارباي