استانادا تەگىن سپورت ساباقتارى قايدا جانە قاشان وتەدى
استانا. قازاقپارات - «Aulafit» جوباسى - قالا تۇرعىندارىنىڭ سالاۋاتتى ءومىر سالتىن ۇستانۋىن قالىپتاستىرۋ ماقساتىندا جىل سايىن ۇيىمداستىرىلىپ كەلە جاتقان ءىرى باستامالاردىڭ ءبىرى.
مەملەكەت باسشىسىنىڭ تاپسىرماسىنا سايكەس، سونداي-اق بالالار مەن جاس وسپىرىمدەر جانە بۇقارالىق سپورتتى دامىتۋدى باسىم باعىت رەتىندە ەسكەرە وتىرىپ، دەنە شىنىقتىرۋمەن جانە سپورتپەن اينالىساتىن ازاماتتاردىڭ سانىن ارتتىرۋ ماقساتىندا استانا قالاسىندا ءبىرقاتار ارنايى باعدارلامالار مەن جوبالار ازىرلەنىپ، ءساتتى ىسكە اسىپ جاتىر. بۇل تۋرالى استانانىڭ كوممۋنيكاتسيالىق قىزمەت الاڭىندا وتكەن بريفينگتە دەنە شىنىقتىرۋ جانە سپورت باسقارماسى باسشىسىنىڭ مىندەتىن اتقارۋشى ازامات اعزاموۆ ءمالىم ەتتى.
باسقارما باسشىسىنىڭ ايتۋىنشا، بۇگىندە قالا تۇرعىندارىنا تومەندەگى تەگىن جوبالار قولجەتىمدى:
1. «Aulafit» سپورتتىق-الەۋمەتتىك جوباسى
2. «وزىڭنەن باستا» ءوزىن-ءوزى قورعاۋ بويىنشا جاتتىعۋ جوباسى
3. يوگا بويىنشا تەگىن وقۋ-جاتتىعۋ ساباقتارى
4. سكانديناۆيالىق ءجۇرىس بويىنشا تەگىن وقۋ-جاتتىعۋ ساباقتارى
5. «Funny Sport» جازعى سپورتتىق جوباسى
«Aulafit» جوباسى - قالا تۇرعىندارىنىڭ سالاۋاتتى ءومىر سالتىن ۇستانۋىن قالىپتاستىرۋ ماقساتىندا جىل سايىن ۇيىمداستىرىلىپ كەلە جاتقان ءىرى باستامالاردىڭ ءبىرى. استانا قالاسى اكىمدىگىنىڭ قولداۋىمەن جۇزەگە اسىرىلىپ كەلە جاتقان بۇل جوبا بيىل بەسىنشى جىل قاتارىنان وتكىزىلىپ جاتىر.
2025-جىلعى جازعى ماۋسىمدا جاتتىعۋلار قالانىڭ 6 اۋدانىنداعى 30 اۋلا الاڭىندا وتكىزىلىپ جاتىر. ساباقتار ماۋسىم ايىنان قىركۇيەك ايىنىڭ سوڭىنا دەيىن دۇيسەنبى مەن سەنبى ارالىعىندا وتەدى جانە قاتىسۋشىلار ءۇشىن تەگىن. قاتىسۋ ءۇشىن جاس مولشەرىنە ەشقانداي شەكتەۋ قويىلمايدى. جاتتىعۋ وتەتىن اۋلالاردىڭ كەستەسى استانا قالاسىنىڭ دەنە شىنىقتىرۋ جانە سپورت باسقارماسىنىڭ جانە «Aulafit» جوباسىنىڭ الەۋمەتتىك جەلىدەگى پاراقشالارىندا جاريالانعان.
- وتكەن جىلى بۇل جوبا اياسىندا 15 كاسىبي جاتتىقتىرۋشى ەلوردانىڭ 30 اۋلاسىندا 3000 نان استام ادامدى سپورتپەن قامتىدى. جوبا العاش رەت 2020-جىلى ىسكە قوسىلىپ، سالاۋاتتى ءومىر سالتىن ناسيحاتتاۋ مەن بەلسەندى دەمالىستى دامىتۋعا زور ۇلەس قوسىپ كەلەدى، - دەيدى ازامات اعزاموۆ.
«استانا - ەسىرتكىسىز قالا» اكسياسى اياسىنداعى جاتتىعۋلار. سپيكەر ءوز سوزىندە كۇنى كەشە عانا «استانا - ەسىرتكىسىز قالا» اتتى اكسيا اياسىندا ەلوردالىق «ترياتلون» ساياباعىندا بەيىمدەلگەن دەنە شىنىقتىرۋعا ارنالعان ساۋىقتىرۋ جاتتىعۋلارى رەسمي تۇردە باستالعانىن تىلگە تيەك ەتتى. ءۇشىنشى جىل قاتارىنان وتكىزىلىپ جاتقان ۆاسيليي تاحتايدىڭ تەگىن ساباقتارىنىڭ بيىلعى ەرەكشەلىگى - «كوكتال» ساياباعىنىڭ دا قوسىلۋى.
جوباعا 6 جاستان اسقان بارلىق قالا تۇرعىنى قاتىسا الادى. جاس ەرەكشەلىگىنە شەكتەۋ جوق. ءتىپتى مۇمكىندىگى شەكتەۋلى ازاماتتاردىڭ دا بەلسەندىلىك تانىتىپ جاتقانىن اتاپ وتۋگە بولادى. ساباقتار 1-قىركۇيەككە دەيىن ءار سەيسەنبى، بەيسەنبى جانە سەنبى كۇندەرى كەشكى ساعات 19:00 جانە 20:00 دە وتكىزىلەدى.
يوگا جانە سكانديناۆيالىق ءجۇرىس ساباقتارى. تامىز ايىنىڭ باسىنان باستاپ قالا تۇرعىندارى مەن قوناقتارى ءۇشىن يوگا مەن سكانديناۆيالىق ءجۇرىس بويىنشا تەگىن وقۋ- جاتتىعۋ ساباقتارى باستالادى. ساباقتار قىركۇيەك ايىنا دەيىن اپتاسىنا ءۇش رەت، ەلوردانىڭ التى ساياباعىندا كەشكى ۋاقىتتا وتەدى. ايتۋلى تەگىن وقۋ-جاتتىعۋ ساباقتارىنىڭ ناقتى كەستەسى مەن تولىق اقپاراتى باسقارمانىڭ رەسمي سايتى مەن الەۋمەتتىك جەلىدەگى پاراقشالارىندا جاقىن ارادا جاريالاناتىن بولادى.
- «Funny Sport» جازعى سپورتتىق جوباسى جاز مەزگىلىندە كەز كەلگەن جاستاعى تۇرعىندارعا ارنالعان. ساياباقتار مەن اشىق قالالىق الاڭداردا تەگىن سپورتتىق ءىس-شارالار، شەبەرلىك سىنىپتارى مەن ينتەراكتيۆتى باعدارلامالار وتكىزىلەدى. بالالاردان باستاپ قارت ادامدارعا دەيىن قاتىسا الادى. ءىس-شارالار ەلوردانىڭ تانىمال ساياباقتارىندا، اتاپ ايتقاندا «ورتالىق»، «ترياتلون»، «جەتىسۋ» جانە باسقا دا قوعامدىق دەمالىس ايماقتارىندا تۇراقتى تۇردە ۇيىمداستىرىلادى. جوبانىڭ ناقتى كەستەسى مەن تولىق اقپاراتى باسقارمانىڭ الەۋمەتتىك جەلىلەرىندە الدىن الا جاريالانادى.
اتالعان جوبالار - استانا قالاسىنىڭ تۇرعىندارى اراسىندا بۇقارالىق سپورتتى كەڭىنەن ناسيحاتتاپ، دەنساۋلىقتى نىعايتۋعا جانە قوعامدا بەلسەندى ءومىر سالتىن قالىپتاستىرۋعا باعىتتالعان جۇيەلى جۇمىستاردىڭ ناقتى كورىنىسى، - دەيدى باسقارما باسشىسى.
ايتا كەتەلىك استانادا 2025-جىلعى «بولاشاق ويىندارىنا» ىرىكتەۋ باستالعان ەدى.
