استانادا تانىمال قۇرىلىس كومپانياسى قۇجاتسىز تۇرعىن ۇيلەر سالا باستادى - ۇكىمەت باسشىسى

استانا. KAZINFORM - ۇكىمەت باسشىسى ولجاس بەكتەنوۆ قۇرىلىسى پروبلەماعا اينالعان تۇرعىن ۇيلەر ماسەلەسىن كوتەردى.

«ءبىرقاتار وڭىردە نورماتيۆتىك تالاپتاردىڭ بۇزىلۋىنان پروبلەمالىق وبەكتىلەر جىلدار بويى اياقتالماي كەلەدى. ولاردىڭ قاتارىنا تاعى دا قۇرىلىس نىساندارى قوسىلۋى مۇمكىن. بۇگىندە ەلىمىزدە 39 قۇرىلىسى بىتپەگەن پروبلەمالىق وبەكت بار. مىسالى، اقتوبە وبلىسىندا 11 وبەكتى بويىنشا الدانعان ۇلەسكەرلەر 2 جىلدان بەرى سوتتاسىپ كەلەدى»، - دەدى ولجاس بەكتەنوۆ ۇكىمەت وتىرىسىندا.

پرەمەر- مينيستر ەلورداداعى قۇرىلىسى ۇزاققا سوزىلعان تۇرعىن ۇيلەرگە جەكە توقتالدى.

«استاناداعى «ارابي-2 - گرانيتنىي-2» تۇرعىن ءۇي كەشەنى 10 جىل بۇرىن پروبلەمالىق نىسان دەپ تانىلعان. قازىر 200-گە جۋىق وتباسى ۇيلەرىن الا الماي وتىر. قۇجاتتارى دۇرىس ەمەس كوپتەگەن وبەكتىلەردىڭ قۇرىلىس جۇمىستارى سوزىلىپ كەتۋى مۇمكىن. ەلوردادا G- Park كومپانياسى رۇقسات قۇجاتتارىن الماستان 7 تۇرعىن ءۇي قۇرىلىسىن جۇرگىزىپ جاتىر. ال وعان 3,5 مىڭعا جۋىق وتباسى ءوز قاراجاتىن سالعان»، - دەيدى ول.

ەسكە سالا كەتسەك، استانا اكىمدىگى G- Park كومپانياسىنا 12 نىساندى اياقتاپ، ۇلەسكەرلەرگە كىلت تاپسىرعانشا جاڭا قۇرىلىس باستاۋعا تىيىم سالعان ەدى.

اۆتور

داۋلەت ىزتىلەۋ