استانادا تاعى ءبىر الىپ ءسابي دۇنيەگە كەلدى

استانانىڭ 3№ كوپبەيىندى قالالىق اۋرۋحاناسىندا 5484 گرام سالماقپەن الىپ ءسابي دۇنيەگە كەلدى، دەپ حابارلادى ەلوردا اكىمدىگىنىڭ رەسمي سايتى.

ءسابيدى اناسى ءوزى بوسانعان. دارىگەرلەر كەسار تىلىگىن جاسامادى. نارەستەنىڭ اناسىنىڭ جاسى – 35 تە. ول ءۇشىنشى رەت بوسانىپ وتىر. ونىڭ باسقا بالالارى دا سالماعى اۋىر بولىپ تۋعان.

تۇڭعىشىنىڭ سالماعى 4500 گرام بولسا، ەكىنشى بالاسىنىڭ سالماعى 4050 گرام بولعان.

جاڭا بوسانعان انا اۋرۋحانا قىزمەتكەرلەرىنە كاسىبيلىگى مەن قامقورلىعى ءۇشىن ريزاشىلىعىن ءبىلدىردى. اسىرەسە، اكۋشەرى زالينا اسانوۆاعا ەرەكشە العىس ايتتى.

كەلىنشەك قينالماي بوساندى. ىشتەگى نارەستەنىڭ ۇلكەندىگىنە قاراماستان، ءبارى جاقسى بولدى. ەڭ باستىسى - بالانىڭ دەنى ساۋ، اناسى باقىتتى. دەنى ساۋ بالانى تۋدىرۋ - ءبىزدىڭ جۇمىسىمىزدىڭ باستى ماقساتى، - دەدى اكۋشەر.

ايەلدەردى بوساندىرۋ ءبولىمىنىڭ مەڭگەرۋشىسى گۇلنار قايىربەكوۆا سالماعى 5 كەلىدەن اساتىن بالالار وتە سيرەك دۇنيەگە كەلەتىنىن اتاپ ءوتتى. ونىڭ ايتۋىنشا، پەرزەنتحانادا سوڭعى ايدا الىپ بالا ەكىنشى رەت دۇنيە ەسىگىن اشقان. بۇعان دەيىن سالماعى 5 كەلىدەن اساتىن ءسابي جەلتوقسان ايىندا دۇنيەگە كەلگەن.