استانادا تاعى 7 مەكتەپ اشىلادى
استانادا وسى وقۋ جىلىندا تاعى 7 مەكتەپ اشىلادى. بۇل تۋرالى قالا اكىمى جەڭىس قاسىمبەك Instagram پاراقشاسىندا جازدى، دەپ حابارلايدى Kazinform.
«ينفراقۇرىلىمدىق جانە الەۋمەتتىك نىسانداردى سالۋ جۇمىسىن جالعاستىرامىز. ماسەلەن، وسى وقۋ جىلىندا تاعى 7 مەكتەپ اشامىز. اتالعان وقۋ ورىندارىنىڭ قۇرىلىس بارىسىمەن تانىستىم. بۇل مەكتەپتەر قاراساي باتىر مەن بۇلانتى كوشەلەرىنىڭ قيىلىسىندا، تۇران داڭعىلى مەن №24-كوشەنىڭ قيىلىسىندا ورنالاسقان. سول سياقتى قولدانىستاعى مەكتەپتەردىڭ اۋماعىنا جاڭا كورپۋستار سالىنادى: كيرپيچنىي ەلدى مەكەنىندە، تارحان كوشەسى، 16، تاحا حۋسەين كوشەسى، 5/1، قارقابات كوشەسى، 17، قابانباي باتىر داڭعىلى، 9,1 مەكەنجايلارىندا. وسىعان دەيىن وقۋ جىلىنىڭ باسىندا 4 مەكتەپ اشىلعان بولاتىن»، - دەدى جەڭىس قاسىمبەك.
سونىمەن قاتار اكىم مەملەكەت باسشىسىنىڭ تاپسىرماسى بويىنشا ەلوردادا «جايلى مەكتەپ» ۇلتتىق جوباسىن جۇزەگە اسىرىلىپ جاتقانىن جەتكىزدى. جوبا اياسىندا 2024-2025 -جىلدارى 24 جايلى مەكتەپ سالىنادى. ولار 90 مىڭعا جۋىق وقۋشى ورنىن (2 اۋىسىمدى) اشۋعا مۇمكىندىك بەرەدى. ولاردىڭ 15 ى ەسىل مەن نۇرا اۋداندارىندا ورنالاسادى. ءدال قازىر بۇل اۋدانداردا مەكتەپتەرگە دەگەن اسا قاجەتتىلىك بار.
«2027 -جىلعا دەيىن باس- اياعى 180 مىڭعا جۋىق وقۋشى ورنىنا (2 اۋىسىمدا) ارنالعان 65 مەكتەپ سالۋدى جوسپارلاپ وتىرمىز. بۇل شارالار مەكتەپتەرگە شامادان تىس تۇسەتىن جۇكتەمەنىڭ قازىرگى قيىندىعىن عانا ەمەس، بولاشاقتا ورىن تاپشىلىعى ماسەلەسىن تولىقتاي شەشەدى. وقۋ ورىندارى قالانىڭ بارلىق اۋدانىن، ونىڭ ىشىندە ەلدى مەكەندەردى دە قامتيدى»، - دەپ جازدى جەڭىس قاسىمبەك.
