استانادا سۋ تاپشى ما - مينيستر جاۋابى

استانا. KAZINFORM - ەلوردانىڭ كەيبىر كوپقاباتتى تۇرعىن ۇيلەرىنە سۋ بەرۋ ماسەلەسى كوتەرىلدى.

ۇكىمەت وتىرىسىنان كەيىن وتكەن باسپا ءسوز ءماسليحاتىندا ب ا ق وكىلدەرى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆكە ەلوردانىڭ كەيبىر اۋدانىندا كوپقاباتتى تۇرعىن ۇيلەردە سۋ توقتاپ قالاتىنىن ايتىپ، سۋ تاپشى ما، دەگەن ساۋالدى العا تارتتى.

- استانادا سۋ تاپشىلىعى بولمايتىنىن انىق ايتا الامىن. سەبەبى ەلوردانى اۋىزسۋمەن قامتاماسىز ەتىپ وتىرعان «استانا سۋ قويماسى» كوكتەمگى تاسقىن كەزىندە 100 پايىزدان اسا تولدى. قازىر سۋ بەلگىلەنگەن كەستە بويىنشا بەرىلىپ جاتىر، - دەپ جاۋاپ بەردى نۇرجان نۇرجىگىتوۆ ۇكىمەت وتىرىسىنان كەيىن وتكەن باسپا ءسوز ءماسليحاتىندا.

سونداي-اق مينيستر ەلوردادا سۋ سۇزگى ستانساسىنىڭ قۇرىلىسى جونىندە ايتىپ بەردى.

- سۇزگى ستانساسىنىڭ قۇرىلىسىنا قوسىمشا 4,1 ميلليارد تەڭگە ءبولىندى. بۇل جۇمىس ەلوردا حالقىن بولاشاقتا اۋىزسۋمەن تولىق كولەمدە قامتاماسىز ەتۋ ءۇشىن ىستەلىپ جاتىر، - دەپ ءتۇسىندىردى ۆەدومستۆو باسشىسى.

بۇگىن ۇكىمەت وتىرىسىندا سۋ سالاسى ماسەلەلەرى قارالدى. ايتا كەتسەك، 2027-جىلعا دەيىن سۋ ەسەپتەۋ جۇيەسىن تولىق تسيفرلاندىرۋ جوسپارلانىپ وتىر.

بەلگىلى بولعانداي ەلىمىزدە ۇلتتىق سۋ رەسۋرستارى اقپاراتتىق جۇيەسى ازىرلەنىپ جاتىر.

ۇكىمەت باسشىسى ولجاس بەكتەنوۆ ىسكە اسىرىلۋ مەرزىمى سوزىلىپ كەتكەن تازا اۋىز سۋ جوبالارىن اتادى.