استانادا ەرەكشە ۇستازدار جۇمىس ىستەيتىن مەكتەپ تۋرالى بىلەسىز بە
استانا. KAZINFORM - قازىر مۇمكىندىگى شەكتەۋلى جاندار، باسقاشا ايتقاندا ەرەكشە جاندار قوعامنىڭ بەلسەندى مۇشەسى. ەرەكشە جاندارعا قاتىستى ماسەلەنىڭ ءبىرى - ەڭبەكپەن قامتۋ. ولار دەنساۋلىق جاعدايىنا بايلانىستى قالاعان جۇمىسىنا تۇرا الماۋى مۇمكىن. سوڭعى جىلدارى ەلىمىزدە ەرەكشە جاندارعا نازار اۋدارىلدى، ياعني قۇقىعى قورعالىپ، ەڭبەك ەتۋىنە، ەل ومىرىنە بەلسەندى ارالاسۋىنا جاعداي جاسالىپ جاتىر. بۇگىن - ۇستازدار كۇنى، مەرەكە قارساڭىندا ەلورداداعى №32-مەكتەپ- گيمنازيانىڭ ەرەكشە پەداگوگتارىمەن تىلدەسكەن ەدىك.
اتالعان مەكتەپتە بارلىعى 10 مۇمكىندىگى شەكتەۋلى قىزمەتكەر بار. ونىڭ ىشىندە 8 مۇعالىم جانە 2 كۇزەتشى ەرەكشە جاندار قاتارىندا.
سونىڭ ءبىرى ۇستازدىق ەڭبەك جولىن ەلوردادان ءۇش شاقىرىم جەردەگى كولۋتون اۋىلىندا باستاپ، اتالعان ەلدى مەكەندە 25 جىل بالا تاربيەلەپ، ءبىلىم بەرگەن. جالپى جۇمىس ءوتىلى - 33 جىل. جوعارى ءبىلىمدى قاراعاندى مەملەكەتتىك ۋنيۆەرسيتەتىندە العان، ماماندىعى - حيميا- بيولوگيا ءپانىنىڭ مۇعالىمى.
«الدىمەن توپباسشى بولدىم، سوسىن حيميا، بيولوگيا پانىنەن ساباق بەردىم، كەيىن مەكتەپ ديرەكتورىنىڭ وقۋ جونىندەگى ورىنباسارى قىزمەتىن اتقاردىم. كەيىن دەنساۋلىق جاعدايىما بايلانىستى استاناعا كوشىپ كەلدىك، ەلورداعا كەلگىنىمىزگە بيىل 10 جىل بولدى»، - دەدى دينا دجامبۋرشينا.
ۇستازعا قويىلعان دياگنوز - رەۆماتويدتى ارتريت، بۇل كەز كەلگەن ادامنىڭ شالدىعۋى مۇمكىن سوزىلمالى اۋتويممۋندى اۋرۋ.
«اۋىلدا ءتيىستى دەڭگەيدە ەم الۋعا، مال باعىپ، شارۋا جۇرگىزۋ قيىنعا سوقتى، سوندىقتان وتباسىممەن اقىلداسا كەلە كوشۋدى ءجون كوردىك، دەگەنمەن وزىمە اۋىل ۇنايتىن. استاناعا كەلگەندە بىردەن جۇمىس تابا المادىم، ءبىراق جۇمىسسىز قالمادىم. ءۇش جىل جەكە وقۋ ورتالىعىندا وقۋشىلاردى بيولوگيا، حيميا پانىنەن ۇ ب ت-عا دايىنداپ، ءدارىس بەردىم. كەيىن وسى مەكتەپتە بوس جۇمىس ورنى شىعىپ، مەنى قابىلدادى، 5 جىل جۇمىس ىستەپ كەلەمىن»، - دەيدى ول.
اڭگىمە بارىسىندا ەرەكشە جاندى ۇستاز ازىلگە جاقىن ەكەنىن ايتىپ قالدى، ول مەكتەپىشىلىك ءىس-شارالارعا بەلسەنە قاتىسىپ ك ۆ ن وينايدى. ءبىراق، ءازىل ورنىمەن ايتىلۋى ءتيىس. ودان بولەك، قولونەر شەبەرلىگىمەن اينالىسادى جانە تورت پىسىرگەندى ۇناتادى.
«مەنىڭ دەنساۋلىق جاعدايىمدى وقۋشىلار بىلەدى، ولار ساباق كەزىندە، ساباقتان تىس كەزدە دە ۇنەمى قول ۇشىن سوزىپ، كومەكتەسەدى، قولداۋ كورسەتەدى. وقۋشىلاردىڭ قولداۋى مەنى قاناتتاندىرادى»، - دەيدى مۇعالىم.
وسى مەكتەپتىڭ تاعى ءبىر مۇعالىمى، ەرەكشە قاجەتتىلىگى بار جان ءالي اسقار ۇلى. ول قوستاناي وبلىسى تورعاي قالاسىنىڭ تۋماسى، ارقالىق مەملەكەتتىك پەداگوگيكالىق ينستيتۋتىنىڭ تۇلەگى. ماماندىعى - گەوگرافيا ءپانىنىڭ مۇعالىمى.
«جوعارى وقۋ ورنىن ءتامامداپ، ديپلوم العان سوڭ جاستار پراكتيكاسى بويىنشا 6 اي ءبىلىم بەرۋ ورتالىعىندا جۇمىس ىستەدىم. 2022 -جىلدان باستاپ وسى مەكتەپتە ۇستازدىق ەتىپ كەلەمىن. سونىمەن قاتار، قازىر ەۋرازيا ۇلتتىق ۋنيۆەرسيتەتىندە ءوز ماماندىعىم بويىنشا ماگيستراتۋرادا (Ⅱ كۋرس) وقىپ جاتىرمىن. ۇستازدىق جولدى تاڭداۋىما وتباسىمنىڭ ىقپالى زور، سەبەبى اتام مەكتەپ ديرەكتورى بولعان، اكە- شەشەم دە پەداگوگ، اكەم ورىس ءتىلى ءپانىنىڭ مۇعالىمى، انام پسيحولوگ ءارى باستاۋىش سىنىپ مۇعالىمى. مەن سول جولدى جالعاستىرعىم كەلدى»، - دەدى ءالي اسقار ۇلى.
جاس ماماننىڭ ايتۋىنشا، ۇستازدىق جولدى تاڭداعان ادامعا ۇلكەن جاۋاپكەرشىلىك جۇكتەلەدى.
«ءار ساباعىمدى زاماناۋي ءادىس-تاسىلدەردى قولدانىپ وتكىزۋگە تىرىسامىن. الدىمەن بالالارمەن جۇمىس ىستەپ، قىزىقتىرۋ قاجەت، ايتپەسە سەنىڭ ساباعىڭا نەمقۇرايلى قارايتىن بولادى. سوندىقتان بالالاردىڭ ءتىلىن تاۋىپ، اراسىندا ساباقتى ويىن تۇرىندە دە وتكىزىپ تۇرامىن»، - دەگەن پىكىر ءبىلدىردى.
ءالي كۇندەلىكتى ساباقتان بولەك، وقۋشىلاردى پاندىك وليمپيادا جانە عىلىمي جوبالارعا دايىندايدى. وقۋشىلارىنىڭ جەتىستىكتەرى دە بار.
«ءبىزدىڭ مەكتەپتە جاس ماماندارعا ارنالعان ءتۇرلى سەمينار، دارىستەر ۇيىمداستىرىلادى. ول جەردە بىلىكتى ۇستازدار ءوز تاجىريبەسىمەن بولىسەدى. ارينە، مەن جاس مامان بولعاندىقتان ۇيرەنەرىم كوپ، قالماي قاتىسامىن. ودان بولەك، قالالىق دەڭگەيدەگى بىلىكتىلىكتى ارتتىرۋ كۋرستارىنا بارىپ، تاجىريبەمدى ارتتىرىپ ءجۇرمىن. بىردەن ايتۋ كەرەك، مۇعالىم بولۋ وڭاي ەمەس، وتە جوعارى جاۋاپكەرشىلىكتى تالاپ ەتەدى. سەبەبى ءبىز مەملەكەتتىڭ بولاشاعىن جالعاستىراتىن ازاماتتاردى دايىنداپ جاتىرمىز. سول سەبەپتى پەداگوگ ماماندىعىن تاڭدار الدىندا جاقسىلاپ ويلانعان ابزال»، - دەپ تولىقتىردى جاس ۇستاز.
اۆتور
داۋلەت ىزتىلەۋ
