استانادا رەفەرەندۋمعا دايىندىق جۇمىستارى قالاي ءجۇرىپ جاتىر
استانا. KAZINFORM - وسى جەكسەنبى (6-قازان) ەلىمىزدە اتوم ەلەكتر ستانساسىن سالۋ ماسەلەسى بويىنشا جالپىۇلتتىق رەفەرەندۋم وتەدى. ەلوردادا 386 داۋىس بەرۋ ۋچاسكەسى بار. Kazinform اگەنتتىگىنىڭ ءتىلشىسى 238-داۋىس بەرۋ ۋچاسكەسىنە بارىپ، دايىندىق بارىسىمەن تانىسقان ەدى.
ەلوردانىڭ 906936 تۇرعىنى رەفەرەندۋمعا قاتىسىپ، داۋىس بەرۋ قۇقىعىنا يە. قالانىڭ اۋماقتىق كوميسسياسىنىڭ ءتوراعاسى بەيسەمباي جۇمابەكوۆتىڭ ايتۋىنشا، داۋىس بەرۋشىلەردىڭ جارتىسىنا جۋىعى جەكە شاقىرۋ العان.
«قالا بويىنشا 386 داۋىس بەرۋ ۋچاسكەسى بار، ونىڭ 34 ءى ۋاقىتشا جۇمىس ىستەيتىن بولادى. ولاردىڭ دەنى وقۋ ورىندارىنىڭ عيماراتتارىندا، مادەني جانە سپورتتىق مەكەمەلەردە ورنالاسقان. ۋچاسكەلىك كوميسسيا مۇشەلەرىنىڭ سانى - 3734 ادام»، - دەدى ول.
سايلاۋ زاڭناماسىنا سايكەس قالالىق كوميسسيا 20 قوعامدىق بىرلەستىك جانە ۇكىمەتتىك ەمەس ۇيىمدارعا اككرەديتاتسيا بەردى.
«جالپى رەفەرەندۋم وتكىزۋگە دايىندىق جۇمىستارى جالعاسىپ جاتىر. اتاپ ايتقاندا، داۋىس بەرۋ ۋچاسكەلەرى رەسىمدەلىپ جاتىر. سونىمەن قاتار ازاماتتاردى راسىمدەۋ ماسەلەلەرى دە قارالۋدا، ياعني تىزىمدە قاتە كورسەتۋ مەن دالسىزدىك تۋرالى وتىنىشتەر. ودان بولەك، رەفەرەندۋم كۇنى قالادا بولمايتىن ازاماتتارعا ەسەپتەن شىعارۋ كۋالىكتەرى بەرىلەدى. ول ازامات باسقا ەلدى مەكەندە داۋىس بەرە الادى»، - دەدى ب. جۇمابەكوۆ.
نۇرا اۋدانى اۋماقتىق كوميسسياسىنىڭ ءتوراعاسى بەرىك تورەبەكوۆ رەفەرەندۋم جاريالانعان ساتتەن باستاپ جۇمىس قىزۋ ءجۇرىپ جاتقانىن ايتىپ تۇر.
«بارلىق سايلاۋ كوميسسيالارىنىڭ قۇرامى بەكىتىلدى، تولىق ماتەريالدىق-تەحنيكالىق جاراقتاندىرۋ، كابينالار، ۋرنالار ورناتۋ جانە داۋىس بەرۋ پروتسەسىن ۇيىمداستىرۋ ءۇشىن قاجەت نارسەنىڭ ءبارى دايىندالدى. بۇدان باسقا، كۇنتىزبەلىك جوسپارعا سايكەس 20 كۇن ىشىندە ۋچاسكەلىك كوميسسيالارعا ناقتىلاۋ ءۇشىن سايلاۋشىلار ءتىزىمى بەرىلدى. قازىر تىزىمدەر ناقتىلانىپ جاتىر. داۋىس بەرۋشىلەر وزدەرى كەلىپ، تىزىمدە بار-جوعىن انىقتاي الادى»، - دەدى ول.
سونداي-اق ەرەكشە قاجەتتىلىكتەرى بار داۋىس بەرەتىن جاندارعا جاعداي جاسالادى. ۋچاسكەلەردە پاندۋستار، تاكتيلدى كورسەتكىشتەر، سونداي-اق داۋىس بەرۋگە ىڭعايلى بولۋ ءۇشىن برايل شريفتىمەن، قۇلاققاپتارمەن جانە كومپيۋتەرلەرمەن ارنايى جابدىقتالعان كابينالار ورناتىلادى. 238-ۋچاسكەنىڭ سايلاۋ كوميسسياسىنىڭ باسشىسى گۇلميرا سابەرلينوۆا داۋىس بەرۋگە مۇمكىندىگى شەكتەۋلى ءبىر ازاماتتىڭ تىركەلگەنىن ءمالىم ەتتى.
«ءبىز ۇيلەردى ارالاپ، انىقتاپ شىقتىق. ءبىزدىڭ ۋچاسكە بويىنشا ءبىر عانا مۇمكىندىگى شەكتەۋلى ازامات بار. ءبىز وعان شاقىرۋ قاعازىن اپارعاندا، ول قۋانىپ، مىندەتتى تۇردە كەلەتىنىن ايتتى. ول ازاماتقا ارنايى كابينا مەن ترافارەت بار. ەگەر ونىڭ جانىندا ەرىپ جۇرگەن ەشكىم بولماسا، وندا كوميسسيا مۇشەلەرىنىڭ ءبىرى كومەكتەسەدى، - دەدى گ. سابەرلينوۆا.
ونىڭ ايتۋىنشا، داۋىس بەرۋ كۇنى ۋچاسكەلەر ساعات 7:00 دەن 20:00 گە دەيىن جۇمىس ىستەيدى، الايدا كوميسسيا مۇشەلەرى ءوز جۇمىسىن 06:00 دەن باستايدى. ۋچاسكەلەر جابىلعاننان كەيىن كوميسسيا 12 ساعاتتىڭ ىشىندە داۋىستاردى سانايدى.
بۇعان دەيىن الماتى قالاسىندا جانە الماتى وبلىسىندا رەفەرەندۋمعا دايىندىق قالاي ءجۇرىپ جاتقانىن حابارلاعان ەدىك.
ايتا كەتەيىك، استانادا رەفەرەندۋم وتەتىن كۇنى قوعامدىق كولىكتە جول ءجۇرۋ تەگىن بولادى.
