استانادا قىتاي شەبەرلەرى جىبەكتەن توقىعان كيىمدەردىڭ ءسان ۇلگىسى كورسەتىلەدى
استانا. KAZINFORM - ەلورداداعى ۇلتتىق مۋزەي قىتايدىڭ حاڭجوۋ قالاسىنداعى ۇلتتىق جىبەك مۋزەيىمەن 5 جىلدىق مەموراندۋمعا وتىرماقشى.
بۇل تۋرالى قىتاي ۇلتتىق جىبەك مۋزەيى ديرەكتورىنىڭ ورىنباسارى جاڭ چەنمين استانادا ءوتىپ جاتقان «ۇلى جىبەك جولى: مادەنيەتتەر ديالوگى» اتتى حالىقارالىق عىلىمي كونفەرەنسيادا ايتتى.
- قىتاي ۇلتتىق جىبەك مۋزەيى جىجياڭ پروۆينتسياسىنىڭ حاڭجوۋ قالاسىندا ورنالاسقان. بۇل قىتايدىڭ وڭتۇستىك- شىعىسىنداعى ءىرى توقىما جانە جىبەك مۋزەيى بولىپ ەسەپتەلەدى. بۇگىنگى كونفەرەنسيا قازاقستان- قىتاي تۋريزمى اياسىندا ءوتىپ وتىر.
«جىبەك پەن جىبەك جولى: قىتايدان - قازاقستانعا دەيىن» دەپ اتالاتىن كورمە اكەلىپ وتىرمىز. كورمەدەن بولەك سالا ساراپشىلارى، قولونەرشىلەر، عالىمدار پىكىر الماسىپ، تاجىريبە بولىسەتىن كونفەرەنتسيا ءوتىپ جاتىر، - دەدى ب ا ق وكىلدەرىنە بەرگەن سۇحباتىندا.
ايتۋىنشا، اتالعان مۋزەي وسىدان 15 جىل بۇرىن استانادا العاش رەت كورمە ۇيىمداستىرعان ەكەن.
- ال بيىلعى كورمە قازاقستاندا ءبىز وتكىزگەن ەڭ اۋقىمدى كورمە بولىپ وتىر. ويتكەنى وسىنداعى ۇلتتىق مۋزەي بىزگە 1000 شارشى مەتردەن استام الاڭ ۇسىنىپ وتىر. مۋزەي قوناقتارىنىڭ نازارىنا 145-تەن استام ەكسپونات قويۋعا مۇمكىندىك الدىق. كورمەنىڭ سىرتىندا وسى جەردە جىبەك كيىمدەردىڭ ءسان ۇلگىسىن پاش ەتەمىز.
بۇدان بولەك ۇلتتىق مۋزەيمەن مەموراندۋمعا قول قويماقشىمىز. ونىڭ اياسىندا الداعى 5 جىلدا جىل سايىن ۇلتتىق مۋزەيگە كەلىپ كورمە وتكىزىپ وتىرامىز، - دەدى جاڭ چەنمين.
بۇعان دەيىن ۇلتتىق مۋزەي يتالياداعى رەستاۆراتسيا ينستيتۋتىمەن ارىپتەستىك ورناتاتىنىن جازعان ەدىك.
