استانادا قوعامدىق كولىكتە جولاقىنى Bluetooth ارقىلى تولەۋگە بولادى

ەلوردانىڭ قوعامدىق كولىگىندە جولاقىنى Bluetooth ارقىلى تولەۋگە بولادى. تولەمنىڭ بۇل ءتۇرىن پايدالانۋ Avtobys موبيلدى قوسىمشاسى ارقىلى قولجەتىمدى، دەپ حابارلايدى Kazinform استانا اكىمدىگىنىڭ باسپا ءسوز قىزمەتىنە سىلتەمە جاساپ.

ول ءۇشىن Avtobys موبيلدى قوسىمشاسىن جۇكتەۋ، قوسىمشاعا تەلەفون ءنومىرى ارقىلى تىركەلۋ، موبيلدى قوسىمشانىڭ تەڭگەرىمىن تولتىرۋ (ءاميان باتىرماسىن تاڭداپ، ۇسىنىلعان ادىستەردىڭ ءبىرىن تاڭداۋ) قاجەت.

قوسىمشانىڭ تەڭگەرىمىن QIWI، kassa24 تولەم تەرمينالدارى، ەلەكتروندىق ءامياندار، ينتەرنەت-بانكينگتەر ارقىلى تولتىرۋعا بولادى.

جولاقىنى Bluetooth ارقىلى تولەۋ ءۇشىن تەلەفونىڭىزدىڭ Bluetooth قوساسىز، قوسىمشاعا كىرىپ، Bluetooth بەلگىسىن باساسىز، مارشرۋتتى تاڭدايسىز جانە تولەمدى راستايسىز.

ايتا كەتۋ كەرەك، ازىرگە تولەم جاساۋدىڭ بۇل ءتاسىلى جولاقىسىن تولەۋدىڭ ەلەكتروندى جۇيەسىنىڭ جابدىقتارىمەن جابدىقتالعان اۆتوبۋستاردا قولجەتىمدى.