استانادا قازاق-وزبەك زيالى قاۋىمىنىڭ العاشقى فورۋمى ءوتىپ جاتىر
استانا. KAZINFORM - بۇگىن ەلوردادا قازاق-وزبەك زيالىلارى باس قوستى.
العاش ۇيىمداستىرىلعان فورۋمعا سەنات ءتوراعاسى ماۋلەن اشىمبايەۆ جانە وزبەكستان ولي ءماجىلىسى سەناتىنىڭ ءتوراعاسى تانزيلا ناربايەۆا باستاعان قازاق-وزبەك عىلىمي-شىعارماشىلىق زيالى وكىلدەرى قاتىسىپ جاتىر.
- قۇرمەتتى تانزيلا ناربايەۆا، قادىرلى فورۋمعا قاتىسۋشىلار، قوناقتار وزدەرىڭىزبەن استانادا باس قوسقانىمىزعا قۋانىشتىمىز. قوناقجاي قازاق ەلىنە قوش كەلدىڭىزدەر! بۇگىن قازاقستان مەن وزبەكستاننىڭ عىلىمي-شىعارماشىلىق زيالى قاۋىمى جينالىپ وتىر. قازاق-وزبەك زيالىلارىنىڭ فورۋمى باۋىرلاس حالىقتاردىڭ رۋحاني ىنتىماقتاستىعىنا جاڭا جول اشادى. فورۋمنىڭ وزبەكستان ولي ءماجىلىسى سەناتىنىڭ ءتوراعاسى تانزيلا ناربايەۆانىڭ قازاقستانعا رەسمي ساپارى اياسىندا ءوتۋى ءىس-شارانىڭ ماڭىزىن ودان ءارى ارتتىرا تۇسەدى، - دەدى سەنات ءتوراعاسى ماۋلەن اشىمبايەۆ فورۋمنىڭ اشىلۋ سالتاناتىندا.
سەنات سپيكەرىنىڭ ايتۋىنشا، قازاقستان مەن وزبەكستان قارىم-قاتىناسىنىڭ اۋقىمى كەڭ.
- ءبىز تەك تاتۋ كورشى عانا ەمەسپىز، ەكىجاقتى قارىم-قاتىناس شىنايى دوستىق پەن باۋىرلاستىققا نەگىزدەلگەن. سالت-ءداستۇر، رۋحانيات ءتۇبىرى ءبىر ورتاق مادەني مۇرا. قازاق حالقى وزبەك حالقىنا ۇنەمى ءىلتيپات تانىتىپ، باۋىر رەتىندە قۇرمەت تۇتادى. قۋانىشتا دا، قيىن- قىستاۋ كەزدە دە بىر- بىرىمىزگە كومەك قولىن سوزىپ، باۋىرلاستىق تانىتىپ كەلەمىز. ءبىزدىڭ قازىرگى شەكارا بولماعان كەزدە، ەرتەدە ۇلى جىبەك جولى جالعاپ جاتتى. وسىنداي تاريحي ساباقتاستىق ىنتىماقتاستىعىمىزدى نىعايتىپ، قارىم- قاتىناسقا جاڭا سەرپىن بەرىپ جاتىر، - دەيدى ءتوراعا.
كەشە پرەزيدەنت قاسىم-جومارت توقايەۆ وزبەكستان ولي ءماجىلىسى سەناتىنىڭ ءتوراعاسى تانزيلا ناربايەۆانى قابىلدادى.
مەملەكەت باسشىسى قوس حالىق اراسىنداعى دوستىق، تاتۋ كورشىلىك بايلانىستاردى نىعايتۋعا وزبەكستان ولي ءماجىلىسى سەناتى ءتوراعاسىنىڭ قوسقان ۇلەسىن جوعارى باعالادى.
