استانادا قازاق تاريحي قوعامى قۇرىلدى
ەلوردادا «قازاق تاريحي قوعامى» قوعامدىق بىرلەستىگى قۇرىلىپ، رەسمي تۇردە تىركەلدى. باستاماشى توپ اراسىندا سۇلتان اكىمبەكوۆ، راديك تەمىرعاليەۆ، ارمانجان بايتاسوۆ، مايا بەكبايەۆا سىندى تانىمال تۇلعالار بار، دەپ حابارلايدى Kazinform.
«قازاقستاندا بۇگىنگى كۇنگە دەيىن 2 گەوگرافيالىق قوعام بولدى، ال تاريحي قوعام بولماعان ەدى. قازاق تاريحي قوعامىنىڭ باستى فۋنكتسيالارىنىڭ ءبىرى - عالىمداردىڭ عىلىمي كاسىپوداعى مەن قوعام اراسىنداعى كوپىر بولۋ. ويتكەنى عالىمدار تەك عالىمدار ءۇشىن جازادى، ونىڭ كوپشىلىككە جەتۋىن ويلاي بەرمەيدى. بىزدە اي سايىن جاڭا عىلىمي جاڭالىقتار اشىلادى، ءبىراق، وكىنىشكە وراي، ءبىزدىڭ ازاماتتىق قوعام بۇل تۋرالى بىلمەيدى. بۇل مالىمەتتەردى جۇرتشىلىققا جەتكىزۋ ءبىزدىڭ مىندەتىمىز»، - دەدى تاريحشى، جوشى ۇلىسىن زەرتتەۋ عىلىمي ينستيتۋتى ديرەكتورىنىڭ مىندەتىن اتقارۋشى جاقسىلىق ءسابيتوۆ «Sheraton» قوناق ۇيىندە بىرلەستىكتىڭ تۇساۋكەسەرىندە.
باسقارما مۇشەسى، جۋرناليست ارمانجان بايتاسوۆ تاريحي بىرلەستىك راسىندا دا قاجەت ەكەنىن، قازىر اۋديتوريانىڭ قازاقستان تاريحىنا ۇلكەن قىزىعۋشىلىق تانىتىپ وتىرعانىن اتاپ ءوتتى.
«مۇنى مەديا سالاسىنىڭ مامانى رەتىندە تولىق سەنىممەن ايتا الامىن. قازاقستان تاريحىنا ارنالعان ارنالعان باعدارلامالاردىڭ وتە كوپ قارالىم جينايتىنىن، حالىقتىڭ الاشوردا تاريحىنان باستاپ، بەلگىلى ءبىر تۇلعالاردىڭ ءومىربايانىنا قىزىعۋشىلىعىن كورىپ وتىرمىز. ەندى بىرلەستىكتىڭ نەگىزگى ماقساتى - عالىمدار مەن حالىق اراسىندا كورىپ قۇرىپ، لايىقتى پلاتفورما بەرۋ. تىلشىلەرگە تاريحي ساراپشىلاردى ۇسىنىپ، تاريحي تۇرعىدا ساپالى كونسۋلتاتسيا بەرە الساق، بۇدان ءبارى ۇتادى»، - دەيدى ا. بايتاسوۆ.
قوعامدىق بىرلەستىك ۇلتتىڭ تاريحي ساناسى مەن تاريح عىلىمىن دامىتۋدى ماقسات ەتىپ وتىر. تاريحي زەرتتەۋلەر مەن كوپشىلىككە ارنالعان عىلىمي ادەبيەتتەر، سول زەرتتەۋ ناتيجەلەرىن دارىپتەيتىن فيلم، وزگە دە تۋىندىلاردى جاساۋ ءۇشىن ۇزدىكتەردى تارتۋ، ساپالى ىرىكتەۋ جۇرگىزۋ كوزدەلگەن.
«كوپتەگەن ەلدەردە وسىنداي تاريحي قوعامدار بار، ويتكەنى بۇل عالىمدار ءۇشىن، جۋرناليستەر مەن قوعام وكىلدەرى ءۇشىن الاڭ قۇرۋعا مۇمكىندىك بەرەتىن بىرلەستىكتەر. ءبىزدىڭ تاريحشىلار، ولكەتانۋشىلار ءوز ايماعىنىڭ تاريحىن ءوز بەتىنشە، ەش قولداۋسىز زەرتتەپ ءجۇر. مۇنى جۇيەلەۋ قاجەت. بىرلەستىكتىڭ ماقساتتارى مەن مىندەتتەرى ۋاقىت وتە كەلە تۇزەتىلەدى، ءبىراق ەڭ باستىسى - وسى كۇش-جىگەردى شوعىرلاندىرۋعا مۇمكىندىك بەرەتىن الاڭ قۇرۋ. ءبىزدىڭ ەسىگىمىز بارلىعىنا اشىق. ءقازىردىڭ وزىندە بىرلەستىكتىڭ مۇشەسى بولعىسى كەلەتىندەر ءوتىنىش بىلدىرۋدە. مەملەكەتتىك، كۆازيمەملەكەتتىك تاريحي ۇيىمدارمەن باسەكەگە ءتۇسۋ ويدا جوق. ولارمەن بايلانىس ورناتىپ، ورتاق مۇددە - تاريحي سانا مەن تاريح عىلىمىن دامىتۋعا ءوز ۇلەسىمىزدى قوسپاقپىز» ، - دەيدى تاريحشى راديك تەمىرعاليەۆ.
ۇيىمداستىرۋشىلاردىڭ ايتۋىنشا، جوبا ءساتتى جۇزەگە اسسا، قوعامدىق بىرلەستىك اۋقىمى ايماقتارعا تاراتىلادى.
