استانادا «قازاق رۋحىن وياتقان تۇلعا» اتتى كورمە اشىلدى
استانا. KAZINFORM - ق ر مادەنيەت جانە اقپارات مينيسترلىگىنىڭ قولداۋىمەن ۇلتتىق مۋزەيدە ءمىرجاقىپ دۋلات ۇلىنىڭ 140-جىلدىعىنا ارنالعان «قازاق رۋحىن وياتقان تۇلعا» اتتى كورمە مەن دوڭگەلەك ۇستەل ءوتتى.
الدىمەن شارا باسى دوڭگەلەك ۇستەلدەن باستالدى. كەلەلى كەزدەسۋگە بەلگىلى عالىمدار، مەملەكەت جانە قوعام قايراتكەرلەرى، اقىننىڭ تۋىستارى، قوستاناي وبلىسىنىڭ دەلەگاتسياسى مەن استانا قالاسىنداعى م. دۋلات ۇلى اتىنداعى مەكتەپ مۇعالىمدەرى مەن وقۋشىلارى قاتىستى.
- ۇلى دالا وركەنيەتى كۇيرەپ جاتقان كەزدە، اقىن-جىرشىلار مەملەكەتتىلىگىمىزدەن ايرىلىپ، بودان بولدىق دەپ ايتىپ جۇرگەن كەزدە ۇلتىمىزدىڭ رۋحاني جاڭعىرۋىن جاساعان وسى الاش زيالىلارى ەدى. ءمىرجاقىپ سىندى قايراتكەرلەر - قازاقتى ساياسي ۇلتقا اينالدىرعان تۇلعالار. «قازاق رۋحىن وياتقان تۇلعا» دەگەنىمىز كوركەم ءسوز ەمەس، بۇل ناقتى فاكت، - دەپ اتاپ ءوتتى ق ر ءماجىلىس دەپۋتاتى، تاريح عىلىمدارى دوكتورى ەركىن ءابىل.
كورمەنىڭ اشىلۋىنا ق ر سەناتى مەن ءماجىلىس دەپۋتاتتارى قاتىستى. دەپۋتات نۇرتورە ءجۇسىپ ءوز سوزىندە كورمەنىڭ قازاق رۋحانياتى ءۇشىن ماڭىزدى ەكەندىگىن تىلگە تيەك ەتتى.
- ءمىرجاقىپ دۋلات ۇلى الاش ارىستارىنىڭ ساپىندا قازاقتىڭ ازاتتىعى ءۇشىن جانىن بەرگەن ازامات. كەشەگى كۇنگە دەيىن ەسىمدەرى ۇمىتىلىپ، «حالىق جاۋى» دەگەن ايدار تاعىلىپ كەلدى. تاۋەلسىزدىك العاننان كەيىن ەلگە ەسىمى ورالدى، ەڭبەكتەرى جارىققا شىعا باستادى. ءتىپتى، 1988-جىلى اقتالعاننان كەيىن 1992-جىلى ەلگە سۇيەگى جەتكىزىلدى. ءومىرى ايداۋدا ءوتتى عوي. سوندىقتان 140-جىلدىق مەرەيتويىن لايىقتى دەڭگەيدە اتاپ ءوتۋىمىز كەرەك. بۇگىنگى اشىلىپ وتىرعان كورمە، الاش ارىسىنىڭ رۋحىنا دەگەن قۇرمەتتىڭ تەك ءبىر عانا بەلگىسى. ءارى، بۇل كورمەنىڭ وسكەلەڭ ۇرپاققا بەرەرى مول. ۇلتتىق رۋحانياتقا قوسارى كوپ، - دەيدى ق ر پارلامەنتى سەناتىنىڭ دەپۋتاتى نۇرتورە ءجۇسىپ.
كورمەگە قويىلعان قۇندى جادىگەرلەردىڭ بارلىعى دەرلىك تورعاي وڭىرىنەن جەتكىزىلگەن. وعان ءمىرجاقىپ دۋلات ۇلى مەن جارى عاينيجامالدىڭ قولدانعان زاتتارى، وتباسىلىق مۇرالارى قويىلعان. ايتا كەتۋ كەرەك، قوعام قايراتكەرىنىڭ تۋعان جەرىنەن 130 جادىگەر اكەلىنىپتى.
- بۇگىنگى كورمەگە 130 جادىگەر الىپ كەلىپ وتىرمىز. فوتو قۇجاتتارى بار. ءمىرجاقىپ اتامىزدىڭ تۇتىنعان زاتتارى بار. ونى بىزگە تاپسىرۋشى الاشتىڭ كەيۋاناسى دەپ ايتامىز ءمىرجاقىپتىڭ قىزى گۇلنار اپامىز بولاتىن. ول كىسى عاينيجامال اپانىڭ توركىنىنەن كەلگەن جيھازداردى بىزگە سىيعا تارتقان بولاتىن. ونىڭ ىشىندە مەن تورعايدان الىپ كەلە الماعان بىرنەشە جادىگەرلەرىم بار. سونىڭ ءبىرى - 14- جىلى نەكە قيعاننان كەيىن عاينيجامالدىڭ توركىنىن كەلگەن اس ستولى بولاتىن. گۇلنار اپانىڭ سوزىنشە 200 گە جۋىق ۇلت زيالىلارى سول اس ۇستەلىندە داستارحانداس بولىپتى - دەپ، جادىگەرلەردىڭ جينالۋ تاريحىمەن ءبولىستى جانگەلدين مۇراجايلار كەشەنىنىڭ باسشىسى گۇلبانۋ سارسەكەي.
ءسانى مەن سالتاناتى كەلىسكەن تاريحي كورمەنى تاماشالاۋعا كەلگەن كورەرمەندەر سانىندا شەك جوق. ايتا كەتەيىك، كورمە ءساۋىر ايىنىڭ 17 سىنە دەيىن جالعاسادى.
