استانادا قازا تاپقان قۇتقارۋشى اسقار زابيكۋلينگە ەسكەرتكىش ورناتىلدى

ەلوردادا ەرلىكپەن قازا تاپقان قۇتقارۋشى اسقار زابيكۋلينگە № 6 مامانداندىرىلعان ءورت ءسوندىرۋ ءبولىمىنىڭ اۋماعىندا ورناتىلعان ەسكەرتكىشتىڭ سالتاناتتى اشىلۋى ءوتتى، دەپ حابارلايدى قازاقپارت.

«ءاربىر ادامنىڭ ءومىرى باعا جەتپەس قۇندى، مەملەكەتتىڭ ستراتەگياسى ەڭ الدىمەن، ازاماتتاردى قورعاۋعا، توتەنشە جاعدايلاردىڭ الدىن الۋعا جانە جويۋعا باعىتتالعان. سول سەبەپتى قۇتقارۋشىلار مەن ءورت سوندىرۋشىلەردىڭ ەڭبەگى اسا ماڭىزدى بولىپ تابىلادى. بۇل ەسكەرتكىش - اسقاردىڭ وجەتتىگىنىڭ، جانقيارلىعى مەن ادالدىعىنىڭ بەلگىسى. بۇگىن ءبىزدىڭ كوڭىلىمىز ءتۇسىپ، قايعىرىپ، سونىمەن قاتار بارلىعىمىز ءۇشىن ۇلگى بولاتىن ەرلىككە دەگەن شەكسىز قۇرمەتپەن پەن تاڭدانۋعا كۋا بولىپ تۇرمىز. ونىڭ جاساعان ەرلىگى ازاماتتارىمىزدىڭ قاۋىپسىزدىگى جولىنداعى كۇرەستە بىزدەرگە كۇش پەن قۋات بەرەتىن ۇلگى بولسىن.

اسقار زابيكۋلين ءبىزدىڭ ارىپتەسىمىز عانا ەمەس، سۇيىكتى ۇل، جار جانە اكە بولدى. ونىڭ ومىردەن ءوتۋى ءبىزدىڭ جۇرەگىمىزگە جازىلماس جارا سالدى. ءبىز ونى ءارقاشان ەڭبەكقور، اقىلدى جانە سۇيىسپەنشىلىككە تولى ادام رەتىندە ەستە ساقتايمىز»، - دەپ اتاپ ءوتتى توتەنشە جاعدايلار ءمينيسترى سىرىم ءشارىپحانوۆ.

ەسكەرتكىش تاقتادان اق جامىلعىنى الىپ تاستاعاننان كەيىن، جينالعاندار مەموريالعا گۇل شوقتارىن قويىپ، مارقۇمدى ءبىر مينۋت ۇنسىزدىكپەن ەسكە الدى.

بيىكتىگى ءۇش مەتر بولاتىن ەسكەرتكىشتە اسقاردىڭ بيۋستى قولادان، ال تومەنگى بولىگى ءمارماردان جاسالعان.

سالتاناتتى شاراعا، سونداي- اق ەلوردا اكىمى جەڭىس قاسىمبەك، گارنيزون باسشىلىعى مەن جەكە قۇرامى، ازاماتتىق قورعاۋ ورگاندارىنىڭ ارداگەرلەرى، ا. زابيكۋليننىڭ تۋىستارى مەن جاقىندارى قاتىستى.

كەشە استانانىڭ ۇركەر شاعىن اۋدانىندا ءورت ءسوندىرۋشى اسقار زابيكۋليننىڭ ەسىمى بەرىلگەن كوشەنىڭ اشىلۋى وتكەن بولاتىن.

ەسكە سالايىق، 2022 -جىلدىڭ 16 -قاراشاسىندا ەلورداداعى 15 قاباتتى ۇيدەن ءورت شىقتى. سالدارىنان 3 ادام، ونىڭ ىشىندە ءبىر بالا اۋرۋحاناعا ءتۇستى. بىرنەشە ادامدى قۇتقارعان ءورت ءسوندىرۋشى اسقار زابيكۋليننىڭ دەنەسىن % 80 كۇيىك شالىپ، جانساقتاۋ بولىمىنە جاتقىزىلدى. 20 -قاراشادا ول استانالىق اۋرۋحانادا قايتىس بولدى. دارىگەرلەر ونىڭ ءومىرى ءۇشىن بىرنەشە كۇن كۇرەسكەن بولاتىن.

مەملەكەت باسشىسى ەرلىك كورسەتكەن جانە بىرنەشە ادامنىڭ ءومىرىن قۇتقارعان ەلوردالىق ءورت سوندىرۋشىلەردى قازاقستان رەسپۋبليكاسىنىڭ مەملەكەتتىك ناگرادالارىمەن ماراپاتتاۋ تۋرالى جارلىققا قول قويدى.

اسقار زابيكۋلين I دارەجەلى «ايبىن» وردەنىمەن ماراپاتتالدى. 20 -جەلتوقساندا وعان «التىن ادام» سىيلىعى تابىس ەتىلدى.

28 -جەلتوقساندا استانا قالالىق ءماسليحاتى شەشىمىمەن ەرلىكپەن قازا تاپقان ءورت ءسوندىرۋشى اسقار زابيكۋليننىڭ ەسىمى جاڭا كوشەگە بەرىلدى.

اۆتور

گۇلميرا الياكپاروۆا