استانادا قانشا جاسقا دەيىنگى بالالار قىزىلشانى ءجيى جۇقتىرۋدا ەكەنى ايتىلدى

استانا قالاسىنىڭ باس مەملەكەتتىك سانيتاريالىق دارىگەرى سارحات بەيسەنوۆا قىزىلشا بويىنشا ەپيدەميولوگيالىق جاعداي ءالى دە كوڭىل كونشىتپەيتىنىن ايتتى، دەپ حابارلايدى Kazinform.

بۇگىندە ەلوردادا قىزىلشانىڭ 731 دەن استام راستالعان جاعدايى تىركەلدى، ونىڭ 73 پايىزدان استامى 14 جاسقا دەيىنگى بالالاردىڭ ۇلەسىنە تيەسىلى.

«14 جاسقا دەيىنگى بالالار اراسىندا جاعدايلاردىڭ ەڭ كوپ سانى 4 جاسقا دەيىنگى بالالارعا تيەسىلى، ياعني 430 جاعداي نەمەسە 59 پايىز. ەگۋ جاسىنا جەتپەۋ سەبەبىنەن 430 جاعدايدىڭ 100 جاعدايى 1 جاسقا دەيىنگى سابيلەردى قۇرايدى. ناۋقاس بالالار مەن جاسوسپىرىمدەردىڭ 93 پايىز ءارتۇرلى سەبەپتەرمەن ۆاكتسيناتسيا الماعانىن اتاپ وتكىم كەلەدى، ياعني، ناۋقاستاردىڭ 55 پايىز ۆاكتسينالاۋدان ءوز ەركىمەن باس تارتقان، 25 پايىز - مەديتسينالىق قارسى كورسەتىلىمى بار ناۋقاستار جانە 18 پايىز - ەگۋ جاسىنا جەتپەگەندەر ساناتى»، - دەدى س. بەيسەنوۆا استانا كوممۋنيكاتسيالار ورتالىعىندا وتكەن بريفينگتە.

ەلوردانىڭ ۇيىمداستىرىلعان ۇجىمدارىندا قىزىلشانىڭ 209 جاعدايى تىركەلگەن، ونىڭ 30 ى - ستۋدەنتتەر، 58 ى - وقۋشىلار جانە 121 - مەكتەپ جاسىنا دەيىنگى بالالار.

«قالا تۇرعىندارىنا، اسىرەسە اتا-انالارعا ايتارىم، قىزىلشانىڭ ينفەكسياسىن، سونداي-اق ونىڭ اسقىنۋىن بولدىرمايتىن جالعىز ءتيىمدى قۇرال - ۆاكسينا ەكەنىن ۇمىتپايىق. ەگەر، ءوزىڭىزدى بالاسىنىڭ دەنساۋلىعىنا ۇلكەن جاۋاپكەرشىلىكپەن قارايتىن اتا-انا دەپ ساناساڭىز، ەكپە كۇنتىزبەسىنە سايكەس بالاڭىزعا مىندەتتەلگەن قىزىلشاعا قارسى ۆاكسينا جاساتۋعا جانە قوسىمشا جاپپاي يممۋنيزاتسيادان وتۋگە كەڭەس بەرەمىن»، - دەدى دارىگەر.

ەسكە سالا كەتسەك، وتكەن اپتادا ەلوردانىڭ دەنساۋلىق ساقتاۋ باسقارماسى قىزىلشاعا بايلانىستى مالىمدەمە جاساعان ەدى.