استانادا نەيروحيرۋرگيانىڭ جاھاندىق كوشباسشىلارى باس قوستى
استانا. قازاقپارات - 27-28 -ماۋسىم كۇندەرى ەلوردادا ۋولتەر دەندي اتىنداعى نەيروحيرۋرگيالىق اسسوتسياتسياسىنىڭ x دۇنيەجۇزىلىك كونگرەسى وتكىزىپ جاتىر، دەپ حابارلايدى ۇلتتىق نەيروحيرۋرگيا ورتالىعىنىڭ باسپا ءسوز قىزمەتى.
مەرەيتويلىق فورۋمعا ا ق ش، ەۋروپا، ازيا، ت م د جانە تاياۋ شىعىستاعى جەتەكشى نەيروحيرۋرگتاردى قوسا العاندا، 20 ەلدەن 400 دەن استام دەلەگات كەلدى.
كونگرەسس - نەيروحيرۋرگيا سالاسىندا حالىقارالىق دەڭگەيدە تانىمال كوشباسشى، ۋولتەر دەندي قاۋىمداستىعىنىڭ نەگىزىن قالاۋشى جانە حالىقارالىق كلينيكالىق ستاندارتتارعا اينالعان كوپتەگەن عىلىمي جۇمىستىڭ اۆتورى، اسسوتسياتسيانىڭ جاھاندىق پرەزيدەنتى - پروفەسسور ساليم ابدۋلراۋفتىڭ (Salim Abdulrauf) جەتەكشىلىگىمەن وتكىزىلىپ جاتىر.
Walter E. Dandy اسسوتسياتسياسى 2011 -جىلى ا ق ش- تا زاماناۋي نەيروحيرۋرگيانىڭ نەگىزىن قالاۋشىلاردىڭ ءبىرى - دوكتور ۋولتەر ەدۆارد دەنديدىڭ قۇرمەتىنە قۇرىلدى. ۇيىم قۇرىلعان ساتتەن باستاپ بۇكىل الەمدە وزىق تاجىريبەنى ناسيحاتتاۋعا، عىلىمي بىلىممەن الماسۋعا جانە نەيروحيرۋرگيالىق كومەك دەڭگەيىن ارتتىرۋعا باعىتتالعان. قازاقستاندا X كونگرەسس وتكىزۋ - وتاندىق نەيروحيرۋرگيانىڭ جەتىستىكتەرىن مويىنداۋ جانە جوعارى حالىقارالىق سەنىمنىڭ ايعاعى.
ءىس-شارانىڭ ەكى كۇندىك باعدارلاماسىندا 40-تان استام عىلىمي بايانداما، دوڭگەلەك ۇستەل، پىكىرتالاستار مەن شەبەر-كلاستار بار. ەڭ وزەكتى ماسەلەلەر تالقىلانۋدا: يننوۆاتسيالىق نەيروحيرۋرگيالىق تاسىلدەر، نەيروحيرۋرگيادا جوعارى تەحنولوگيالاردى قولدانۋ، كۇردەلى تامىرلى جانە ونكولوگيالىق پاتولوگيالاردى ەمدەۋ، سونداي-اق فۋنكسيونالدىق جانە بالالار نەيروحيرۋرگياسىنداعى جاڭا باعىتتار.
- استانادا كونگرەسس وتكىزۋ - الەمدىك ارەنادا قازاقستاندىق نەيروحيرۋرگيانى قۇرمەتتەۋ مەن مويىنداۋدىڭ بەلگىسى. ءبىز ەلىمىزدە الەمنىڭ ۇزدىك ماماندارىن قۇشاق جايا قارسى الۋعا ءارقاشاندا دايىنبىز. استانا - جاھاندىق ديالوگ، ءبىلىم الماسۋ جانە جاڭا مەديتسينالىق يدەيالار ورتالىعىنا اينالۋدا. جىل سايىن ءبىزدىڭ ورتالىقتا 5 مىڭنان استام وپەراتسيا جاسالادى. ورتالىق سونىمەن قاتار عىلىمي قىزمەتپەن بەلسەندى اينالىسادى. قازىرگى ۋاقىتتا ۇلتتىق نەيروحيرۋرگيا ورتالىعى ازىرلەگەن ءادىستى: ومىرتقا دەنەلەرىن اۋىستىرۋعا ارنالعان دەربەستەندىرىلگەن 3D تەحنولوگيالىق يمپلانتتارىن كوممەرتسيالاندىرۋ بويىنشا جۇمىستار جۇرگىزىلۋدە. بۇل ءادىستىڭ پراكتيكالىق قىزمەتكە ينتەگراتسياسى - ءادىستىڭ ەنگىزۋ اۋقىمىنىڭ ۇلعايۋى مەن ماسشتابتاۋ پەرسپەكتيۆالارىن اشادى. سونداي-اق، ءبىزدىڭ ورتالىقتا ورتالىق ازياداعى جالعىز راديوحيرۋرگيالىق كەشەن - «گامما- پىشاق» اپپاراتى جۇمىس ىستەيدى. بۇگىنگى تاڭدا ونىڭ كومەگىمەن 2000-نان استام پاتسيەنت ەمدەلدى. ورتالىق ازيا ەلدەرىندە «گامما- پىشاق» اپپاراتىن پايدالانۋ اۋقىمىن كەڭەيتۋ ماقساتىندا ۇكىمەتارالىق كەلىسىم جاساسۋ بويىنشا جۇمىستار جۇرگىزىلىپ جاتىر، - دەپ اتاپ ءوتتى «ۇلتتىق نەيروحيرۋرگيا ورتالىعى» ا ق باسقارما ءتوراعاسى، ۋولتەر دەندي اتىنداعى نەيروحيرۋرگيالىق اسسوتسياتسيانىڭ x دۇنيەجۇزىلىك كونگرەسىنىڭ پرەزيدەنتى، پروفەسسور سەرىك اقشولاقوۆ.
كونگرەستىڭ سالتاناتتى اشىلۋىنا Walter E. Dandy نەيروحيرۋرگيالىق اسسوتسياتسياسىنىڭ دۇنيەجۇزىلىك كونگرەسىنىڭ جاھاندىق پرەزيدەنتى — Saleem Abdulrauf (ا ق ش)، ق ر پرەمەر-ءمينيسترىنىڭ ورىنباسارى - ە. ب. كوشەربايەۆ، ق ر دەنساۋلىق ساقتاۋ ءمينيسترى ا. ش. ءالنازاروۆا، ق ر پرەزيدەنتى جانىنداعى ۇلتتىق عىلىم اكادەمياسىنىڭ پرەزيدەنتى ا. ك. كۇرىشبايەۆ، ق ر پارلامەنتى ءماجىلىسىنىڭ الەۋمەتتىك-مادەني دامۋ كوميتەتىنىڭ ءتوراعاسى ا. ق. ايماعامبەتوۆ جانە عىلىمي-زەرتتەۋ ينستيتۋتتارى مەن مەديتسينالىق ورتالىقتاردىڭ ءبىرىنشى باسشىلارى قاتىستى.
سالتاناتتى شارا مەملەكەت باسشىسى قاسىم-جومارت توقايەۆتىڭ ارنايى جولدانعان قۇتتىقتاۋىمەن اشىلدى. پرەزيدەنتتىڭ قۇتتىقتاۋ حاتىن ق ر پرەمەر-ءمينيسترىنىڭ ورىنباسارى ەرمەك كوشەربايەۆ وقىپ بەردى.
- قادىرلى قاۋىم! بارشاڭىزدى ۋولتەر ە. دەندي اتىنداعى نەيروحيرۋرگتەر قاۋىمداستىعىنىڭ ونىنشى دۇنيەجۇزىلىك كونگرەسسىنىڭ اشىلۋىمەن قۇتتىقتايمىن! بۇل - نەيروحيرۋرگيا سالاسىنداعى الەمنىڭ ەڭ ۇزدىك ماماندارى باس قوساتىن ماڭىزدى جيىن. قازاقستان مەديتسينانىڭ وزىق تەحنولوگيالارعا نەگىزدەلگەن وسى باعىتىن دامىتۋعا باسا ءمان بەرەدى. ەلىمىزدەگى ۇلتتىق نەيروحيرۋرگيا ورتالىعى يننوۆاتسيالىق ەمدەۋ تاسىلدەرىن قولدانۋ ارقىلى مىڭداعان ادامنىڭ ومىرگە ورالۋىنا ىقپال ەتىپ وتىر. مۇندا راديوحيرۋرگيانىڭ «التىن ستاندارتى» سانالاتىن، ورتالىق ازياداعى جالعىز گامما- پىشاق جۇيەسى ءساتتى پايدالانىلىپ كەلەدى. سونىمەن قاتار، ورتالىقتا جۇكتى ايەلدەر مەن جاڭا تۋعان نارەستەلەرگە دە جوعارى كۇردەلىلىك دەڭگەيىندەگى وتالار جاسالۋدا. عىلىم مەن تەحنولوگيانىڭ سوڭعى جەتىستىكتەرى، سونداي-اق جاساندى ينتەللەكتىنىڭ الەۋەتى نەيروحيرۋرگيا سالاسىنىڭ كوكجيەگىن كەڭەيتە تۇسەتىنى ءسوزسىز. بۇل باعىتتاعى تۇراقتى دامۋ ءۇشىن سالاارالىق ءوزارا ءىس-قيمىل مەن جاھاندىق مەديتسينالىق قاۋىمداستىقتىڭ ىنتىماقتاستىعىن نىعايتۋ اسا ماڭىزدى. القالى جيىن كاسىبي مامانداردىڭ عىلىمي يدەيالار مەن ەمدەۋ تاجىريبەسىن الماسۋىنا، سونداي-اق حالىقارالىق بايلانىستاردى جانداندىرۋعا تىڭ سەرپىن بەرەدى دەپ سەنەمىن. كونگرەسس جۇمىسىنا تابىس تىلەيمىن! - دەلىنگەن حاتتا.
ايتا كەتەيىك، بۇگىنگى تاڭدا ۇلتتىق نەيروحيرۋرگيا ورتالىعىندا جىل سايىن جۇيكە جۇيەسىنىڭ ەڭ كۇردەلى پاتولوگياسى بار پاتسيەنتتەرگە 5000-عا جۋىق وپەراتسيا جاسالادى.
بۇدان بۇرىن ۇلتتىق نەيروحيرۋرگيا ورتالىعىنىڭ دارىگەرلەرى ايەلدىڭ ميىنداعى المانىڭ كولەمىندەي ىسىكتى الىپ تاستاعانىن جازعان ەدىك.
اۆتور
اينۇر تۋماكبايەۆا
