استانادا مۇسىلمان اقساقالدار كەڭەسىنىڭ وكىلدىگى اشىلدى

 سەنات ءتوراعاسى - الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ باسشىسى ماۋلەن اشىمبايەۆ استانادا مۇسىلمان اقساقالدار كەڭەسى وكىلدىگىنىڭ اشىلۋ راسىمىنە قاتىستى. kazinform بۇل تۋرالى سەناتتىڭ باسپا ءسوز قىزمەتىنە سىلتەمە جاساپ حابارلايدى.

мұсылман ақсақалдар кеңесі
Фото: Фото: Сенаттың баспасөз қызметі

اتالعان ءىس- شارا بۇگىن الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ وتىرىسى اياسىندا ءوتتى.

سالتاناتتى راسىمدە ماۋلەن اشىمبايەۆ ۇيىمنىڭ ورتالىق ازياداعى وكىلدىگىن اشۋ تۋرالى ۇسىنىستى الەمدىك جانە ءداستۇرلى دىندەر كوشباسشىلارىنىڭ VII سەزىندە ءال- ازھاردىڭ جوعارعى يمامى، شەيح احمەد ءات- تايەب جاساعانىن ايتتى. قازاقستان پرەزيدەنتى قاسىم- جومارت توقايەۆ بۇل باستاماعا قولداۋ ءبىلدىردى.

«مۇسىلمان اقساقالدار كەڭەسى بارلىق دىندەردىڭ ىنتىماعىن نىعايتۋدى كوزدەيدى. وسىنداي بەدەلدى ۇيىمنىڭ ايماقتاعى وكىلدىگىنىڭ قازاقستاندا اشىلۋى ءبىز ءۇشىن ۇلكەن مارتەبە. كەڭەس دارىپتەيتىن تولەرانتتىلىق، بەيبىت قاتار ءومىر ءسۇرۋ، ءوزارا قامقور بولۋ سياقتى قۇندىلىقتار قازاقستان ءۇشىن دە ماڭىزدى باسىمدىققا يە. الداعى ۋاقىتتا سەزد حاتشىلىعى كونفەسسياارالىق جانە وركەنيەتارالىق ديالوگتى حالىقارالىق دەڭگەيدە دامىتۋ باعىتىندا كەڭەسپەن بىرگە بەلسەندى جۇمىس ىستەيدى»، - دەگەن ماۋلەن اشىمبايەۆ جاڭادان اشىلعان وكىلدىكتىڭ جۇمىسىنا ساتتىلىك تىلەدى.

ايتا كەتەيىك، مۇسىلمان اقساقالدار كەڭەسى - بەيبىتشىلىك پەن جاھاندىق ءدىنارالىق ديالوگتى نىعايتۋ ماقساتىمەن قۇرىلعان تاۋەلسىز حالىقارالىق ۇيىم. كەڭەستىڭ فيليالدارى بۇعان دەيىن شۆەيتساريا، مىسىر جانە ماروككو ەلدەرىندە اشىلعان.

سونىمەن قاتار بۇگىن سەنات سپيكەرى ماۋلەن اشىمبايەۆ «Somaiya Vidyavihar» ۋنيۆەرسيتەتىنىڭ كانتسلەرى، يندۋيزم دەلەگاتسياسىنىڭ باسشىسى سامير شانتيلال سومايامەن ەكىجاقتى كەزدەسۋ وتكىزدى.

سوڭعى جاڭالىقتار