استانادا LRT ماڭىنداعى ۇيلەردىڭ باعاسى قالاي وزگەردى
استانا. KAZINFORM - كوكتەممەن بىرگە استاناعا ەرەكشە رەڭك بەرگەن ءبىر كورىنىس بار - ول LRT جۇيەسى. ازىرگە تولىق ىسكە قوسىلماسا دا، تەحنيكالىق رەجيمدە ءجۇرىپ جاتقان ۆاگوندار ەلوردانىڭ كەلبەتىن وزگەرتىپ ۇلگەردى.
اسىرەسە سول جاعالاۋداعى جاڭا اۋدانداردا بۇل كورىنىس كوپشىلىككە نيۋ-يورك اتموسفەراسىن سىيلاپ تۇرعانداي. ال بۇل كورىنىس سول ماڭداعى تۇرعىن ۇيلەر باعاسىنا قالاي اسەر ەتىپ جاتىر؟
ساراپشىلاردىڭ ايتۋىنشا، LRT جەلىسى وتەتىن اۋدانداردا باعاعا قاتىستى وزگەرىس شىنىمەن دە انىق بايقالادى. ءۇي ساتۋ سالاسىنىڭ مامانى قالماقىش قۋانبەكتىڭ سوزىنشە، بۇل ايماقتار قازىر ينۆەستورلار ءۇشىن نەگىزگى «ماگنيتكە» اينالعان.
قازىر نارىقتا ءدال وسى LRT ماڭىنداعى ۇيلەردە باعانىڭ كوتەرىلگەنى سەزىلىپ جاتىر. مىسالى، LRT وتەتىن قابانباي باتىر، سىعاناق، «نۇرلى جول» ۆوكزالى ماڭىنداعى اۋداندار ينۆەستورلاردى قاتتى قىزىقتىرىپ وتىر. سول سەبەپتى بۇل جەرلەردە شارشى مەتر باعاسى ۇقساس تۇرعىن ءۇي كەشەندەرىنەن شامامەن 15-20 پايىز جوعارى. ياعني ادامدار بولاشاقتاعى جايلىلىق ءۇشىن قازىردىڭ وزىندە كوبىرەك تولەپ جاتىر. بۇل - كلاسسيكالىق «كۇتۋ ەففەكتىسى»، ءبىراق ول قازىر ناقتى باعاعا اينالىپ ۇلگەردى، - دەيدى ساراپشى.
جالپى، قالا بويىنشا باعا كۇرت ءوستى دەۋگە كەلمەيدى. جىل باسىنان بەرى ورتاشا ءوسىم 4,5-5,2 پايىز شاماسىندا. ال LRT ماڭىنداعى ۇيلەردە بۇل كورسەتكىش ەكى ەسەگە جۋىق جوعارى.
ەگەر ناقتى وسى لوكاتسيالاردى الساق، باعا ءوسىمى 8-10,5 پايىزعا جەتتى. نەگىزگى سەرپىلىس اقپان-ناۋرىز ايلارىندا بولدى. سەبەبى ءدال وسى كەزەڭدە جوبا فينالدىق كەزەڭگە جاقىنداپ، ينفراقۇرىلىم تولىقتىرىلىپ جاتقانى تۋرالى اقپارات كوبەيدى. نارىق مۇنداي جاڭالىقتارعا وتە تەز جاۋاپ بەرەدى. ياعني باعا تەك فاكتىگە ەمەس، كۇتىمگە دە بايلانىستى وسەدى، - دەيدى قۋانبەك.
قازىر نارىقتا «راديۋس ەففەكتى» ايقىن قالىپتاسقان. ياعني ءۇيدىڭ LRT ستانسياسىنا جاقىن ورنالاسۋى ونىڭ قۇنىنا تىكەلەي اسەر ەتەدى. 500 مەتر راديۋستاعى ۇيلەر ەڭ قىمبات سەگمەنتكە اينالعان. ال قاشىقتاعان سايىن باعا دا تومەندەي بەرەدى.
قازىر ناقتى ۇلگى قالىپتاستى: ستانسيادان 500 مەترگە دەيىنگى پاتەرلەر نارىقتان 20-25 پايىزعا دەيىن قىمبات. 1-1,5 شاقىرىم ارالىعىندا بۇل ايىرماشىلىق ازايادى. ال 1,5 شاقىرىمنان كەيىن LRT اسەرى ءىس جۇزىندە جويىلادى. سول سەبەپتى ساتىپ الۋشىلار قازىر تەك ءۇيدىڭ ساپاسىنا ەمەس، ونىڭ ورنالاسۋىنا، ناقتىراق ايتقاندا، ستانسياعا قانشالىقتى جاقىن ەكەنىنە قاراپ تاڭدايدى، - دەيدى ساراپشى.
باعا دياپازونى دا ءارتۇرلى. قازىرگى تاڭدا ەكونوم جانە كومفورت سەگمەنتىندەگى ۇيلەر شامامەن 480-580 مىڭ تەڭگە/م² ارالىعىندا. بيزنەس- كلاسس سەگمەنتىندە 700-950 مىڭ تەڭگە/م²، ال پرەميۋم ساناتتاعى تۇرعىن ۇيلەر 1,2-1,5 ميلليون تەڭگەگە دەيىن بارادى. بۇل كورسەتكىشتەردىڭ بارلىعى LRT ماڭىندا ورنالاسۋىنا بايلانىستى قالىپتاسىپ وتىر.
ساراپشىنىڭ ايتۋىنشا، نارىق «كۇتۋ كەزەڭىنەن» الدەقاشان ءوتىپ كەتكەن. قازىر ناقتى ساتىپ الۋلار ءجۇرىپ جاتىر، ال سۇرانىس ۇسىنىستان جوعارى كورىنەدى.
بۇگىندە سۇرانىس ۇسىنىستان شامامەن 30 پايىز ارتىق. ادامدار تەك قاراۋمەن شەكتەلىپ جاتقان جوق - ناقتى ساتىپ الىپ جاتىر. LRT تولىق ىسكە قوسىلعاننان كەيىن تاعى ءبىر ءوسىم تولقىنى بولادى. ءبىزدىڭ باعالاۋىمىز بويىنشا، باعا قوسىمشا 12-15 پايىزعا كوتەرىلۋى مۇمكىن. ءبىراق سودان كەيىن نارىق تىنىشتالىپ، ءوسىم ينفلياتسيا دەڭگەيىنە جاقىندايدى. سەبەبى داۋرىعۋ بىرتىندەپ باسىلادى، - دەدى ول.
الداعى ۋاقىتتا باعا ەڭ قاتتى وسەتىن ايماقتار دا انىقتالىپ وتىر. اسىرەسە جاڭا ۆوكزال ماڭى مەن مىڭجىلدىق اللەياسى ەرەكشە نازاردا.
بۇل اۋدانداردا باعا سالىستىرمالى تۇردە ءالى دە تومەن. ءبىراق LRT ولاردى تولىققاندى كولىك حابىنا اينالدىرادى. ياعني بۇل قىسقا مەرزىمدى ترەند ەمەس، ويتكەنى قالانىڭ لوگيستيكاسى وزگەرىپ جاتىر. تيىسىنشە ءدال سول جەرلەردە ۇزاقمەرزىمدى ءوسىم الەۋەتى جوعارى، - دەيدى قۋانبەك.
ينۆەستيتسيا تۇرعىسىنان العاندا دا بۇل باعىت تارتىمدى.
ەگەر ينۆەستيتسيا رەتىندە قاراساق، LRT ماڭىنداعى ۇيلەر جالعا بەرۋ ءۇشىن وتە ءتيىمدى. جىلدىق تابىس شامامەن 9-11 پايىزعا جەتۋى مۇمكىن. بۇل نارىقتاعى ورتاشا كورسەتكىشتەن جوعارى. ءبىراق ماڭىزدى ءبىر نيۋانس بار: پاتەردى ستانتسياعا تىم جاقىن الماۋ كەرەك. ەستاكاداعا جاقىن ورنالاسقان تومەنگى قاباتتاردا شۋ قاتتى ەستىلەدى، ونىڭ ۇستىنە كورىنىس باسقاشا، سول ءۇشىن جەڭىلدىكتەر پايدا بولا باستادى، - دەيدى ساراپشى.
ايتا كەتەيىك، استانا قالاسىنىڭ اكىمى جەڭىس قاسىمبەك LRT- ءنىڭ ىسكە قوسىلار كۇنى تاياپ قالعانى تۋرالى حابارلاعان ەدى. ال جولاقىسى 200 تەڭگە بولىپ بەكىتىلگەن.
