استانادا پلاستيكتەن جاسالعان الىپ مىسىق پايدا بولدى
استانا. KAZINFORM - ەلورداداعى ورتالىق ساياباقتا قايتا وڭدەلگەن پلاستيكتەن جاسالعان الىپ مىسىق ءمۇسىنى پايدا بولدى.
ارت-نىسان «تازا قازاقستان» ەكولوگيالىق اكتسياسى اياسىندا، قالا كۇنىنە ارنالعان «مەرەكەلىك ساياباق» وتباسىلىق فەستيۆالى كەزىندە جاسالدى، دەپ حابارلايدى استانا قالاسى اكىمدىگىنىڭ رەسمي سايتى.
ەكو-مىسىقتى سۋرەتشىلەر، ۆولونتەرلەر جانە فەستيۆال قوناقتارى بىرىگىپ قۇراستىردى. ءار ادام وزىمەن بىرگە پلاستيك اكەلىپ، ونى ارت-نىساننىڭ قۇيرىعىنا جاپسىرا الدى. ينستاللياتسيانىڭ ماقساتى - قالالىق ساياباقتى بەزەندىرۋ عانا ەمەس، سونىمەن قاتار قالدىقتاردى قايتا وڭدەۋدىڭ جانە تابيعي رەسۋرستارعا ۇقىپتى قاراۋدىڭ ماڭىزدىلىعىن ەسكە سالۋ.
- بۇل جاي عانا كورمە ەمەس، بۇل - اركىم وزگەرىستىڭ ءبىر بولىگى بولا الاتىن تۇراقتى قالانىڭ تۇتاس ۇلگىسى. كورمە مەن ەكوباستاما ونەر مەن ەكولوگيانىڭ قاتار جۇمىس ىستەي الاتىنىن كورسەتتى. قالا تۇرعىندارى مەن قوناقتارى كەڭىستىكتى سۇلۋلىق، ماعىنا جانە يگى ەنەرگيا ارقىلى تۇرلەندىرۋگە قاتىسۋعا نيەتتى جانە دايىن ەكەنىن بايقادىق. قوناقتار ءبىزدىڭ شەبەرلىك ساباقتارىمىزعا بەلسەندى قاتىستى، قالدىقتاردى سۇرىپتاۋعا قىزىعۋشىلىق تانىتتى. جالپى العاندا، قازاقستاندىقتار ەكولوگيا ماسەلەسىندە بۇرىنعىدان دا سانالى بولا باستاعانىن ايتۋعا بولادى، - دەدى ەكوترەنەر ماريام قاسىموۆا.
«مەرەكەلىك ساياباق» فەستيۆالىنىڭ ۇيىمداستىرۋشىلارى مازمۇندى باعدارلاما دايىنداعان. ءتۇرلى تاقىرىپتىق ايماقتار جۇمىس ىستەپ، ولاردىڭ ءارقايسىسى بۇكىل وتباسىعا ارنالعان قىزىقتى شارالارعا تولى بولدى.
قوناقتار قازاق تىلىندەگى مۋلتفيلمدەر مەن فيلمدەردى اشىق اسپان استىنداعى كينوتەاتردا تاماشالادى، بالالارعا ارنالعان ارت- ايماقتا شىعارماشىلىق شەبەرلىك ساباقتارىنا قاتىستى، قىشتان بۇيىم جاساۋ ونەرىن بايقاپ كوردى، سونداي-اق سۋرەتشىلەر، ديزاينەرلەر جانە قولونەرشىلەر كورمەلەرىنەن ءلاززات الدى.
كىشكەنتاي كورەرمەندەر تەاترلاندىرىلعان قويىلىمداردى قىزىعا تاماشالاسا، بەلسەندى قوناقتار سپورتتىق جانە ويىن-ساۋىق باعدارلامالارعا قاتىستى.
- ماعان مىسىققا قاقپاق جاپسىرۋ قاتتى ۇنادى! ءول تۇرلى ءتۇستى، جارقىن ءارى كۇلكىلى بولىپ شىقتى. مەن قايتا وڭدەلگەن ماتەريالدان وسىنداي ادەمى مىسىق جاساۋعا بولاتىنىن كۇتپەگەن ەدىم. بۇگىن ءبىز وتباسىمىزبەن جاقسى دەمالدىق، ءتۇرلى شارالارعا قاتىستىق، فەستيۆالدەن تاماشا اسەر الدىق، - دەپ ءبولىستى 9 جاستاعى استانالىق تۇرعىن الىبەك قازبايەۆ.
فەستيۆالدىڭ جارقىن فينالىنا جاس ورىنداۋشىلاردىڭ كونسەرتتەرى مەن فاەر-شوۋ (وتتى شوۋ) كورەرمەندەرگە ەرەكشە اسەر سىيلادى.
ايتا كەتەلىك بۇگىن استانالىقتاردى قانداي مەرەكەلىك شارالار كۇتىپ تۇرعانى جايلى جازعان ەدىك.
