استانادا كومىر تەحنولوگياسى ۇلتتىق عىلىمي ورتالىعى اشىلۋى مۇمكىن

استانا. KAZINFORM - قازاقستاندا كومىر تەحنولوگياسى بويىنشا ۇلتتىق عىلىمي تالداۋ ورتالىعىن اشۋ جوسپاردا بار. بۇل تۋرالى ونەركاسىپ جانە قۇرىلىس مينيسترلىگى ونەركاسىپ كوميتەتىنىڭ كومىر ونەركاسىبى باسقارماسىنىڭ باسشىسى جانات يگىسىنوۆ ءمالىم ەتتى.

- ەلدە كومىر مەن كومىر قالدىقتارىن قايتا وڭدەۋگە ماماندانعان عىلىمي ورتالىق قۇرۋ باستاماسى كوتەرىلدى. ورتالىق زاماناۋي قۇرال- جابدىقپەن جابدىقتالىپ، مەملەكەت تاراپىنان قارجىلاندىرىلادى. ماقسات - «تازا» كومىر تەحنولوگيالارىن دامىتۋ، - دەدى جانات يگىسىنوۆ ەلوردادا وتكەن VI كومىر ونەركاسىبى فورۋمىندا.

مينيسترلىك وكىلىنىڭ ايتۋىنشا، ۇلتتىق ورتالىقتى ەلوردادا قۇرۋ جوسپارلانىپ وتىر.

- استانادا ۇلتتىق اناليتيكالىق ورتالىق اشۋ - ازىرگە جوسپار، ۇسىنىس ايتقالى وتىرمىز. ۇلتتىق جول كارتاسىن ازىرلەيمىز، مەملەكەتتىك باعدارلاما دايىندايمىز. قازىرگى قولدانىستاعى جانە بولاشاقتا قابىلدانۋى ءتيىس نورماتيۆتىك- قۇقىقتىق اكتىلەر بويىنشا دا جۇمىس جۇرگىزىلەدى. ۇلتتىق جول كارتاسى اياسىندا زاڭ جوباسىن ازىرلەۋ قاراستىرىلعان، - دەيدى ول.

بۇعان دەيىن ونەركاسىپ جانە قۇرىلىس مينيسترلىگىنىڭ وكىلى ەلىمىزدە كومىردى زاڭسىز ساتاتىن دەلدالدارمەن كۇرەس جولىن اتاعان ەدى.

ايتا كەتەيىك، بۇگىن استانادا VI كومىر ونەركاسىبى فورۋمى ءوتتى.

بۇگىندە ەلىمىزدە 33 ميلليارد 600 ميلليون توننا كومىر قورى بار. قازاقستان كومىر قورى بويىنشا الەمدە العاشقى 10 ەلدىڭ قاتارىنا كىرەدى.

اۆتور

داۋلەت ىزتىلەۋ