استانادا كامەلەتكە تولماعان بالادان اقشا بوپسالاعاندار 10 جىلعا سوتتالدى
استانا. KAZINFORM - ەلوردادا كامەلەتكە تولماعان بالادان اقشا بوپسالاعان قىلمىستىق توپتىڭ ءتورت مۇشەسى سوت ۇكىمىمەن 10 جىلعا باس بوستاندىعىنان ايىرىلدى.
تەرگەۋ مالىمەتىنشە، سوتتالعاندار جابىرلەنۋشىنىڭ شەتەلگە وقۋعا باراتىنىن جانە ونىڭ اتا-اناسىنىڭ ەداۋىر قارجىسى بار ەكەنىن ءبىلىپ، ءوزارا كەلىسىپ، جاسوسپىرىمنەن 20 ميلليون تەڭگە تالاپ ەتكەن.
قىلمىستىق توپ مۇشەلەرى جابىرلەنۋشىگە پسيحولوگيالىق قىسىم كورسەتىپ، اتىس قارۋىن كورسەتكەن. سونىڭ ناتيجەسىندە ولار 4 ميلليون تەڭگە كولەمىندە اقشا العان.
كەيىن توپتىڭ ەكى مۇشەسى جابىرلەنۋشىدەن تاعى 100 مىڭ تەڭگە الماق بولعان ساتىندە قولعا ءتۇستى. جەدەل ىزدەستىرۋ شارالارى بارىسىندا قالعان ەكى كۇدىكتى دە ۇستالدى.
- سوت بارىسىندا مەملەكەتتىك ايىپتاۋشىنىڭ دالەلدەرى تولىق كولەمدە راستالىپ، سوتتالعانداردىڭ كىناسى دالەلدەندى. ولارعا قىلمىستىق كودەكستىڭ 194-بابى بويىنشا (قورقىتىپ الۋ) ايىپ تاعىلدى. سوت ۇكىمىمەن ءارقايسىسى 10 جىل مەرزىمگە باس بوستاندىعىنان ايىرىلدى. جابىرلەنۋشىگە كەلتىرىلگەن ماتەريالدىق شىعىن تولىق وتەلدى. سونداي-اق مورالدىق زالال رەتىندە 2 ميلليون تەڭگە ءوندىرىلدى، - دەلىنگەن حابارلامادا.
ايتا كەتەيىك، ق ر قىلمىستىق كودەكسىنە سايكەس قورقىتىپ الۋ ارەكەتى ءۇشىن 15 جىلعا دەيىنگى مەرزىمگە باس بوستاندىعىنان ايىرۋ جازاسى كوزدەلگەن. بۇل قىلمىس ءۇشىن كەيبىر جاعدايدا 14 جاستان باستاپ قىلمىستىق جاۋاپكەرشىلىك قاراستىرىلادى.
ەگەر مۇنداي ارەكەتتى كورسەتىلگەن جاسقا تولماعان ادام جاساسا، زاڭعا سايكەس ونىڭ اتا-اناسى نەمەسە زاڭدى وكىلدەرى جاۋاپ بەرەدى.
ەسكە سالايىق، بۇعان دەيىن ەلىمىزدە ەسىرتكى قىلمىسىنا قارسى كۇرەس كۇشەيتىلدى. قازىر ەلدە ەسىرتكىگە تاۋەلدى 18 مىڭ ادام ديسپانسەرلىك تىركەۋدە تۇر. ونىڭ 66 پايىزى - كامەلەتكە تولماعان جاستار.
اۆتور
تاستان تويانوۆ
