ترامپ كيت كەللوگتى ۋكراينا مەن رەسەي بويىنشا ارنايى وكىل ەتىپ تاعايىندادى

استانا. KAZINFORM - جاڭادان سايلانعان پرەزيدەنت دونالد ترامپ وتستاۆكاداعى گەنەرال-لەيتەنانت كيت كەللوگتى ۋكراينا مەن رەسەي بويىنشا ارنايى وكىل ەتىپ تاعايىنداعانىن مالىمدەدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى The Hill باسىلىمىنا سىلتەمە جاساپ.

كيت كەللوگ بۇعان دەيىن پرەزيدەنت دونالد ترامپتىڭ ءبىرىنشى مەرزىمىندە ۇلتتىق قاۋىپسىزدىك كەڭەسىنىڭ اپپارات باسشىسى قىزمەتىن اتقارعان.

دونالد ترامپ كيت كەللوگتى جانىندا «باسىنان بەرى» بولعانى ءۇشىن ماقتاپ، ونىڭ اسكەري جانە ىسكەرلىك مانسابىن اتاپ ءوتتى.

«ءبىز بىرگە كۇش ارقىلى بەيبىتشىلىكتى قامتاماسىز ەتەمىز جانە امەريكا مەن الەمدى قاۋىپسىز ەتەمىز! - دەلىنگەن جاڭادان سايلانعان پرەزيدەنت مالىمدەمەسىندە.

كيت كەللوگ دونالد ترامپقا وتە ادال بولىپ سانالادى، ونىڭ تاعايىندالۋىنىڭ سەبەبى وسى بولۋى مۇمكىن.

ايتا كەتەيىك، كەيبىر رەسپۋبليكاشىلدار ۋكرايناداعى جانجال قۇراما شتاتتارعا ەش قاتىسى جوق ەۋروپالىق ماسەلە ەكەنىن العا تارتادى. الايدا، ولاردىڭ مالىمەتىنشە، دونالد ترامپ سوعىستى توقتاتۋدى پرەزيدەنت رەتىندەگى ءبىرىنشى كۇنى شەشۋدى جوسپارلاپ وتىرعان ماڭىزدى سىرتقى ساياسات ماسەلەسى رەتىندە قاراستىرىپ وتىر.

بۇعان دەيىن ترامپ ءوزىنىڭ بولاشاق اكىمشىلىگىنە العاشقى تاعايىنداۋلاردى جاريالاعان بولاتىن. سودان كەيىن ول پەنتاگون باسشىلارىن اتادى. ال ماسكقا ۇكىمەتتىڭ تيىمدىلىك دەپارتامەنتىن باسقارۋدى ۇسىندى.

ول سونداي-اق دەنساۋلىق ساقتاۋ مينيسترلىگىنىڭ باسشىسى لاۋازىمىنا كىشى كەننەديدىڭ كانديداتۋراسىن ۇسىندى، ا ق ش مەملەكەتتىك دەپارتامەنتى مەن ۇلتتىق بارلاۋ باسقارماسىنىڭ باسشىلارىن جانە اق ءۇيدىڭ جاڭا باسپا ءسوز حاتشىسىن تاعايىندادى.

سونىمەن قاتار، ترامپ ا ق ش-تىڭ ەنەرگەتيكا ءمينيسترى لاۋازىمىنا Liberty Energy مۇناي كومپانياسىنىڭ باسشىسىن تاڭدادى.

دونالد ترامپ ءوزىنىڭ بۇرىنعى ەكونوميكالىق كەڭەسشىسى كيەۆين حاسسەتتى اق ءۇيدىڭ ۇلتتىق ەكونوميكالىق كەڭەسىنىڭ باسشىلىعىنا ۇسىندى.

ول سونداي-اق ميللياردەر سكوتت بەسسەنتتى قارجى ءمينيسترى لاۋازىمىنا ۇسىندى.

اۆتور
زارينا تۋعانبايەۆا