استانادا جىلدىڭ ۇزدىك سپورت قايراتكەرلەرى ماراپاتتالدى
استانا. KAZINFORM - تۋريزم جانە سپورت مينيسترلىگى جىل سايىنعى «ۇزدىك» پرەمياسىنىڭ جەڭىمپازدارىن ماراپاتتادى. جەڭىمپازدار قاتارىندا پاريج وليمپياداسىنىڭ چەمپيوندارى، اۋىل ماماندارى جانە ۇزدىك سپورت ۇيىمدارى بار.
سالتاناتتى كەشتە تۋريزم جانە سپورت ءمينيسترى ەربول مىرزابوسىنوۆ 2024-جىل وتاندىق سپورت ءۇشىن ەرەكشە جىل بولعانىن اتاپ ءوتتى. قازاقستاندىق سپورتشىلار بيىل حالىقارالىق ءىرى جارىستاردا تابىستى ناتيجە كورسەتسە، ەلىمىزدە ءىرى جارىستار ۇيىمداستىرىلدى.
- بيىلعى جىلدىڭ باستى دوداسى پاريج وليمپياداسى مەن پاراليمپيادا بولعانى انىق. ءبىزدىڭ قۇراما تاريحي جەتىستىكتەرگە قول جەتكىزدى. دزيۋدوشى ەلدوس سمەتوۆ وليمپيادا چەمپيونى اتاندى. بۇل - تاۋەلسىز قازاقستان تاريحىندا دزيۋدودان بۇيىرعان العاشقى التىن مەدال. گيمناستيكادان العاش رەت وليمپيادا مەدالىن جەڭىپ الدىق. ول جۇلدە ناريمان قۇربانوۆقا بۇيىردى. داۆيد دەگتياريەۆ پارا- پاۋەرليفتينگتەن ەكى دۇركىن پاراليمپيادا چەمپيونى اتاندى. پارا-دزيۋدوشى اقمارال ناۋاتبەك وليمپيادا شىڭىن باعىندىردى، - دەدى مينيستر.
سونىمەن بىرگە، بيىل استانادا 5-دۇنيەجۇزىلىك كوشپەندىلەر ويىنى ۇيىمداستىرىلدى. كوشپەندىلەر دوداسىنا 89 ەلدىڭ ءۇش مىڭعا جۋىق سپورتشىسى قاتىستى. قازاقستان قۇراماسى جالپى ەسەپتە توپ جاردى.
بۇگىندە، ۇلتتىق سپورتقا قىزىعۋشىلىق ارتىپ كەلەدى، ەلىمىزدە 8 ميلليوننان استام ادام سپورتپەن شۇعىلدانسا، ۇلتتىق سپورتپەن - 650 مىڭ ادام اينالىسادى.
- بيىل سپورت باسقارمالارىنىڭ باسشىلارىن تاعايىنداۋ ءتارتىبى وزگەردى. بۇل پرەزيدەنت تاپسىرماسى بولاتىن. سپورت فەدەراتسيالارىنىڭ دا جاۋاپكەرشىلى ارتتى. كەلەسى جىلى وتاندىق سپورتشىلاردى بىرنەشە ماڭىزدى باسەكە كۇتىپ تۇر. 2025-جىلدىڭ اقپان ايىندا 130 دان استام سپورتشىىمىز قىتايدىڭ حاربين قالاسىندا وتەتىن قىسقى ازيا ويىندارىنا قاتىسادى. كەلەر جىلى قىسقى وليمپيادا ليتسەنزيالارى تاراتىلادى، جارىستاردان بارىنشا كوپ جولداما الۋعا ءتيىسپىز، - دەدى ەربول مىرزابوسىنوۆ.
وسىلايشا، جىل قورىتىندىسى بويىنشا ەلدوس سمەتوۆ پەن داۆيد دەگتياريەۆ «جىلدىڭ ۇزدىك سپورتشىسى» اتاندى. ال ولاردىڭ جاتتىقتىرۋشىلارى - عالىمجان جىلگەلديەۆ پەن يۋري كولەسنيكوۆ «جىلدىڭ ۇزدىك جاتتىقتىرۋشىسى» ماراپاتىن الدى.
گرەك-ريم، ەركىن جانە ايەلدەر كۇرەسى فەدەراتسياسى «جىلدىڭ ۇزدىك اككرەديتتەلگەن سپورت فەدەراتسياسى» اتالىمىندا توپ جاردى.
سونداي-اق، قازاقستان دزيۋدو فەدەراتسياسىنىڭ پرەزيدەنتى كۋانىشبەك ەسەكەيەۆ «جىلدىڭ ۇزدىك اككرەديتتەلگەن سپورت فەدەراتسياسىنىڭ پرەزيدەنتى» ، «جامبى اتۋ فەدەراتسياسى» ر ق ب پرەزيدەنتى ەركەبۇلان ءىلياسوۆ - «ۇزدىك سپورت مەتسەناتى» اتاندى.
بۇل رەتتە اقتوبە وبلىسى مۇعالجار اۋدانى ەمبى قالاسىندا تۇراتىن عيزات تۇسىپبايەۆ «جىلدىڭ ۇزدىك اۋىل جاتتىقتىرۋشىسى» جۇلدەسىمەن ماراپاتتالدى.
«اۋىلدىق جەردەگى ۇزدىك دەنە شىنىقتىرۋ جانە سپورت ادىسكەرى» اتالىمىندا - ەرلان تاسبولاتوۆ، «اۋىلدىق جەردەگى ۇزدىك دەنە شىنىقتىرۋ جانە سپورت نۇسقاۋشىسى» اتالىمىندا - دارحان شاريعاتوۆ، «اۋداندىق ۇزدىك دەنە شىنىقتىرۋ جانە سپورت ءبولىمى» اتالىمىندا - ماقات اۋداندىق مادەنيەت، تىلدەردى دامىتۋ، دەنە شىنىقتىرۋ جانە سپورت ءبولىمى توپ جاردى.
«جىلدىڭ ۇزدىك سپورت ۇيىمى» - الماتى قالاسىنداعى «جوعارى سپورت شەبەرلىگى مەكتەبى» بولسا، «ۇزدىك سپورتتىق ءوڭىر» جۇلدەسىمەن - جامبىل وبلىسى اكىمدىگىنىڭ دەنە شىنىقتىرۋ جانە سپورت باسقارماسى ماراپاتتالدى.
«جاس جانە جاس وسپىرىمدەر قۇرامىنداعى سپورتشى» - يليا ميزەرنىح، «جىلدىڭ ۇزدىك بالالار جاتتىقتىرۋشىسى» - سەرگەي سەرگەيەۆ، «دەنە شىنىقتىرۋ جانە سپورت سالاسىنداعى ۇزدىك مامان» باعىتىندا - نادەجدا كيم ۇزدىك اتاندى.
پارادزيۋدودان XVII جازعى پاراليمپيا ويىندارىنىڭ جەڭىمپازى اقمارال ناۋاتبەك - «سپورتتاعى ۇزدىك سەرپىن» جۇلدەسىن الدى.
سونىمەن بىرگە، ب ا ق وكىلدەرى جاندوس ايتباي ۇلى («حابار» تەلەارناسى)، قۋانىش نۇردانبەك ۇلى («ەگەمەن قازاقستان» گازەتى)، نازەركە سۇلتانبەك («Sport+» سايتى) - سەيداحمەت بەردىقۇلوۆ اتىنداعى پرەميانىڭ لاۋرەاتتارى اتاندى.
