استانادا جەڭىل رەلستى كولىك ستانسيالارى قانداي اتاۋعا يە بولادى
استانا. KAZINFORM - استانا قالاسىنداعى جەڭىل رەلستى كولىك (LRT) جەلىسىنىڭ ستانسيالارىنا اتاۋ بەرۋ ماسەلەسى كۇن تارتىبىنە قويىلدى. بۇل تۋرالى استانا قالاسى تىلدەردى دامىتۋ جانە مۇراعات ءىسى باسقارماسىنىڭ باسشىسى ساكەن زيابەك ۇلى ەسىركەپ قالالىق ءماسليحاتتىڭ كەزەكتەن تىس وتىرىسىندا مالىمدەدى.
- وزدەرىڭىزگە بەلگىلى، استانا قالاسىنداعى جەڭىل رەلستى كولىك جەلىسىنىڭ قۇرىلىسى اياقتالۋعا جاقىن. جوبادا 18 ستانسيا قاراستىرىلعان. قولدانىستاعى زاڭناماعا سايكەس ءاربىر ستانتسياعا اتاۋ بەرىلۋى ءتيىس. وسى ماقساتتا جىل باسىنان بەرى ءبىرقاتار كەزدەسۋ وتكىزدىك. جيىندارعا زيالى قاۋىم وكىلدەرى، تاريحشى عالىمدار، ونوماستيكا سالاسىنىڭ ماماندارى، ءماسليحات دەپۋتاتتارى، قوعامدىق كەڭەس مۇشەلەرى، پارلامەنت وكىلدەرى مەن ۋاكىلەتتى ورگانداردىڭ قىزمەتكەرلەرى قاتىستى. ءار ستانسيا بويىنشا ءتۇرلى ۇسىنىستار ايتىلدى، - دەدى باسقارما باسشىسى.
ساكەن ەسىركەپتىڭ ايتۋىنشا، الەمدىك تاجىريبەدە مەتروپوليتەن نەمەسە جەڭىل رەلستى كولىك جۇيەلەرىندەگى ستانسيا اتاۋلارى سول ماڭدا ورنالاسقان ماڭىزدى نىساندارعا بايلانىستى قويىلادى. بۇل قالا تۇرعىندارى مەن قوناقتارىنىڭ جول تابۋىن جەڭىلدەتۋ ءۇشىن جاسالاتىن قادام.
- اتالعان تاجىريبەنى ءبىز دە نەگىزگە الۋدى ءجون كوردىك. سەبەبى ازاماتتار وزدەرىنە قاجەت نىسانداردى وڭاي تابا الادى. وسىلايشا، باعىت تاڭداۋدا دا جەڭىلدىك تۋادى، - دەدى ول.
وسىعان وراي، بيىل 1- تامىز كۇنى قالالىق ونوماستيكا كوميسسياسىنىڭ كەزەكتى وتىرىسى ءوتىپ، ستانسيا اتاۋلارىنا قاتىستى ۇسىنىستار تالقىلاندى. ساراپتامالىق قورىتىندى نەگىزىندە ورتاق شەشىم قابىلدانىپ، حاتتامامەن راسىمدەلدى.
ۇسىنىلعان اتاۋلار ءتىزىمى تومەندەگىدەي:
- 101 ستانسيا - اۋەجاي، ورنالاسقان جەرى - نۇرسۇلتان نازاربايەۆ حالىقارالىق اۋەجايى؛
- 102 ستانسيا - اتامەكەن، ارناساي كوشەسى مەن قابانباي باتىر داڭعىلىنىڭ قيىلىسى، ءالجان انا مەشىتى ماڭى؛
- 103 ستانسيا - ەسىل، جاڭاداريا كوشەسى مەن ماڭگىلىك ەل داڭعىلى ارالىعى، اۆياتور ساياجايى؛
- 104 ستانسيا - ماڭگىلىك ەل، قابانباي باتىر مەن ماڭگىلىك ەل داڭعىلدارىنىڭ قيىلىسى؛
- 105 ستانسيا - استانا جۇلدىزى، قابانباي باتىر داڭعىلى بويى، استانا جۇلدىزى اينالما جولى ماڭى؛
- 106 ستانسيا - نۇرا، قابانباي باتىر مەن حۋسەين بەن تالال كوشەلەرىنىڭ قيىلىسى؛
- 107 ستانسيا - ۋنيۆەرسيتەت، 29/2 كوشە مەن قابانباي باتىر داڭعىلىنىڭ قيىلىسى؛
- 108 ستانسيا - ۇلى دالا، بۇقار جىراۋ كوشەسى مەن ۇلى دالا داڭعىلى ارالىعى؛
- 109 ستانسيا - استانا ارەنا، الاۋ مۇز ايدىنىنا قاراما- قارسى ورنالاسقان؛
- 110 ستانسيا - جەكپە-جەك سارايى، ورىنبور كوشەسى مەن قابانباي باتىر داڭعىلىنىڭ قيىلىسى؛
- 111 ستانسيا - سىعاناق، سىعاناق كوشەسى مەن قابانباي باتىر داڭعىلىنىڭ قيىلىسى؛
- 112 ستانسيا - بايتەرەك، «Abu Dhabi Plaza» س و و جانىندا ورنالاسقان؛
- 113 ستانسيا - مينيسترلىكتەر ءۇيى، روزا باعلانوۆا اتىنداعى قازاقكونسەرت زالى ماڭى؛
- 114 ستانسيا - ۇلتتىق مۋزەي، ق ر ۇلتتىق مۋزەيى جانىندا؛
- 115 ستانسيا - تەاتر، ساعادات نۇرماعامبەتوۆ كوشەسى؛
- 116 ستانسيا - مىڭجىلدىق اللەياسى، ماعجان جۇمابايەۆ داڭعىلىنىڭ ماڭى؛
- 117 ستانسيا - جىبەك جولى، «Geneva» تۇرعىن ءۇي كەشەنى ماڭى؛
- 118 ستانسيا - نۇرلى جول، نۇرلى جول تەمىرجول ۆوكزالى اۋماعى.
باسقارما باسشىسىنىڭ ايتۋىنشا، ۇسىنىلعان اتاۋلار استانا قالاسى اكىمدىگىنىڭ قاۋلىسىمەن جانە قالالىق ءماسليحاتتىڭ شەشىمىمەن بەكىتىلۋگە ەنگىزىلدى. ەگەر ۇسىنىستار ماقۇلدانسا، قۇجاتتار ق ر ۇكىمەتى جانىنداعى رەسپۋبليكالىق ونوماستيكا كوميسسياسىنا جولداناتىن بولادى.
- كوميسسيا تاراپىنان وڭ شەشىم شىققان جاعدايدا، ءماسليحاتتا تۇپكىلىكتى تۇردە بەكىتىلەدى، - دەدى ساكەن زيابەك ۇلى.
بۇعان دەيىن، LRT نەگىزگى جەلىسىندە رەلستەردى توسەۋ جۇمىستارى اياقتالعانىن جازعانبىز.
