استانادا جىل باسىنان بەرى جول ەرەجەسىن 61 رەت بۇزعان جۇرگىزۋشى ۇستالدى
استانا. KAZINFORM - استانادا پوليتسيا قىزمەتكەرلەرى جول قوزعالىسى ەرەجەلەرىن ۇزاق ۋاقىت بويى ادەيى جانە ورەسكەل تۇردە بۇزىپ كەلگەن جۇرگىزۋشىنىڭ زاڭعا قايشى ارەكەتتەرىن توقتاتتى، دەپ حابارلايدى Polisia.kz.
قالاداعى رەيد بارىسىندا BMW اۆتوكولىگى توقتاتىلدى. تەكسەرۋ ناتيجەسىندە 27 جاستاعى جۇرگىزۋشىسىنىڭ جىل باسىنان بەرى 61 رەت اكىمشىلىك جاۋاپكەرشىلىككە تارتىلعانى انىقتالدى. ونىڭ 59 ى - بەلگىلەنگەن جىلدامدىقتى ارتتىرۋ فاكتىلەرى.
جۇرگىزۋشىنىڭ ارەكەتى قوعامدىق قاۋىپسىزدىككە ەلەۋلى قاتەر توندىرگەن. اتاپ ايتقاندا ول ءال-فارابي كوشەسىندە جاياۋ جۇرگىنشىلەر وتكەلىنەن 133 ك م/ساع جىلدامدىقپەن قىزىل باعدارشامعا ءوتىپ كەتكەن. بۇدان بولەك، رۇقسات ەتىلگەن 90 ك م/ساع ورنىنا 216 ك م/ساع جىلدامدىقپەن جۇرگەنى دە تىركەلگەن.
مۇنداي جاۋاپسىزدىق پەن زاڭدى ەلەمەۋ - ازاماتتاردىڭ ءومىرى مەن دەنساۋلىعىنا تىكەلەي قاۋىپ توندىرەتىن ارەكەت.
قابىلدانعان شارالار ناتيجەسىندە قۇقىق بۇزۋشى ۇساق بۇزاقىلىق جاساعانى ءۇشىن اكىمشىلىك جاۋاپكەرشىلىككە تارتىلىپ، 15 تاۋلىككە اكىمشىلىك قاماۋعا الىندى. اۆتوكولىك كوممۋنالدىق تۇراققا قويىلدى.
- پوليتسيا زاڭ تالاپتارىن جۇيەلى تۇردە ەلەمەيتىن تۇلعالارعا قاتىستى قاتاڭ ءارى قاعيداتتى شارالار قولدانىلاتىنىن اتاپ وتەدى. ايىپپۇلدى تولەۋ فاكتىسى جاۋاپكەرشىلىكتەن بوساتپايدى جانە زاڭ الدىندا بارشا ازامات تەڭ. استانا قالاسى پوليتسيا دەپارتامەنتى تۇرعىنداردى جول قوزعالىسى ەرەجەلەرىن قاتاڭ ساقتاۋعا شاقىرادى. كەز كەلگەن ورەسكەل ءارى قايتالاناتىن قۇقىق بۇزۋشىلىقتار زاڭ اياسىندا توقتاتىلىپ، ءتيىستى جاۋاپكەرشىلىككە اكەپ سوعادى، - دەلىنگەن اقپاراتتا.
