استانادا جيھازدى قايدا لاقتىرۋعا بولادى؟ اكىمدىك مەكەنجايدى اتادى

استانا اكىمدىگى قۇرىلىس جانە تۇرمىستىق ءىرى كولەمدى قوقىستاردى قايدا شىعارۋ كەرەگىن ايتتى، - دەپ حابارلايدى Tengri Life.

قالالىق اكىمشىلىكتىڭ باسپا ءسوز قىزمەتى جەكە جانە زاڭدى تۇلعالار قۇرىلىس جانە ءىرى كولەمدى قوقىستاردى پوليگونعا ءوز بەتىنشە اپارۋى ءتيىس ەكەنىن ەسكە سالدى.

«ءىرى گاباريتتى جانە قۇرىلىس قالدىقتارى الاش تاسجولى، 73/2-مەكەنجايىنداعى «سولتۇستىك جوتاسى» الاڭىندا جينالادى. الاڭدا كىرپىش، اسفالت، بەتون قالدىقتارى سياقتى قۇرىلىس قالدىقتارىن قايتا وڭدەۋ بويىنشا ۇساقتاۋ كەشەنى ورناتىلعان»، - دەپ حابارلادى باسپا ءسوز قىزمەتى.

سونداي-اق زاڭدى تۇلعالار ءۇشىن قۇرىلىس قالدىقتارىن قابىلداۋ بويىنشا تومەندەتىلگەن تاريف قولدانىلادى.

«قۇرىلىس قالدىقتارىن قابىلداۋ تاريفى ق ق س-سىز (1456 تەڭگەدەن باستاپ) تونناسىنا 1300 تەڭگە بولىپ بەلگىلەندى. جەكە تۇلعالار ءۇشىن 250 كەلىگە دەيىنگى قۇرىلىس قوقىسىن وتەۋسىز نەگىزدە تاپسىرۋ ءۇشىن قاجەتتى جاعدايلار جاسالعان»، - دەپ ناقتىلادى اكىمدىكتىڭ باسپا ءسوز قىزمەتى.

وسىلايشا، ۇلكەن كولەمدى جانە قۇرىلىس قوقىستارىن ءوز بەتىنشە شىعارۋ كەرەك، ال ول ءۇشىن ارنايى ماشيناعا تاپسىرىس بەرۋ كەرەك.

ەسكە سالايىق، ءىرى كولەمدى قوقىستارعا مىنالار جاتادى: جيھاز (ديۆاندار، كەرەۋەتتەر، شكافتار نەمەسە كرەسلولار جانە ت. ب. )، تۇرمىستىق تەحنيكا (تەلەديدار، توڭازىتقىش جانە ت. ب. ). ەڭ از مولشەرى - 50-دە 50 سانتيمەتر نەمەسە ودان دا كوپ. ءتىپتى وسى ولشەمدەگى تاقتا دا ءىرى كولەمدى قوقىس بولىپ سانالادى.