استانادا جولاقى قىمباتۋى مۇمكىن بە
استانا. KAZINFORM - كوپتەن بەرى كوپشىلىك كوكەيىندە جۇرگەن بۇل ساۋالعا «City Transportation Systems» ج ش س كولىكتىك باقىلاۋ دەپارتامەنتى ديرەكتورىنىڭ ورىنباسارى رايىمبەك قايروللا جاۋاپ بەردى، دەپ حابارلادى Elorda.info.
دەپارتامەنت وكىلى ءتىلشىنىڭ «باس شاھاردا اسىرەسە كىمدەر تولەم جاساۋدان كوبىرەك جالتارادى؟ وسى ماسەلەگە وراي قالادا جولاقى قىمباتتاۋى مۇمكىن بە؟» دەگەن سۇراققا رايىمبەك قايروللا جاۋاپ بەردى.
«سۇراققا ناقتى جاۋاپ بەرمەس بۇرىن مىنانى ايتا كەتەيىن، تەكسەرىس بارىسىندا جولاقىسىن تولەمەگەن قارتتار مەن بالالار جانە اياعى اۋىر ايەلدەر اۆتوبۋستان شىعارىلمايدى. بايقاعانىمىزداي، تۇرعىندار تەگىن قاتىناۋعا قاتىستى ءالى دە ەرەجەنى تۇسىنبەيدى. مۇنداي ساناتتاعى ادامدار ەگەر ولاردىڭ قولىندا جەڭىلدەتىلگەن كارتا بولعان جاعدايدا عانا تەگىن جۇرە الادى. ەگەر كارتاسى بولماسا وندا وزگە جولاۋشىلار ارقىلى ونلاين تولەم جاساۋ كەرەك. ءبىزدىڭ قالادا تولەم جاسامايتىندار ىشىندە مەكتەپ وقۋشىلارى كوپ. اتا-انالار بالام 18 جاسقا دەيىن تەگىن جۇرەدى دەپ كارتاعا اسا قاتتى نازار اۋدارمايدى. سول سەبەپتى تەكسەرىس كەزىندە وقۋشىلاردىڭ كوبىندە جەڭىلدەتىلگەن كارتا بولماي جاتادى. اتا-انالار وسىعان جاۋاپكەرشىلىكپەن قاراسا دەيمىز. سونىمەن قاتار ازىرگە قالالىق كوعامدىق كولىكتەردە جولاقاسىن كوتەرۋگە قاتىستى ەشقانداي بولجام جوق»، - دەدى ول.
