استانادا «جەتى قازىنا» ەتنواۋىلى اشىلدى
استانا. KAZINFORM - حالىقارالىق بالالاردى قورعاۋ كۇنى استاناداعى نازاربايەۆ ۋنيۆەرسيتەتىنىڭ اۋماعىندا «JETI QAZYNA» ەتنواۋىلى ەسىگىن ايقارا اشتى. جوبا قازاقتىڭ مادەني مۇراسىن، قولونەرىن جانە ءداستۇرلى ءومىر سالتىن ناسيحاتتاۋعا باعىتتالعان. بۇل تۋرالى ەلوردا اكىمدىگى ءمالىم ەتتى.
ەتنواۋىل قازاق مادەنيەتىنىڭ باستى نىشاندارىن ءبىر الاڭدا توعىستىردى: باتىر، سۇلۋ قىز، بۇركىت، قارۋ-جاراق، تازى، جىلقى، وي-ءبىلىم.
جوبانىڭ باستاماشىسى ءارى اۆتورى - كاسىپكەر باۋىرجان ءبىلمان. ول ىشكى، اسىرەسە بالالار تۋريزمىن دامىتۋعا دەن قويىپ ءجۇر.
- استانا - بۇل ەلوردا، مۇندا ءاردايىم تۋريستەر بار، ياعني سۇرانىس تا بار. مەن گيدتەر مەن ەكسكۋرسوۆودتاردىڭ پروبلەمالارىن زەرتتەدىم. ءبىزدىڭ مۇرامىزدى كورسەتۋ ءۇشىن ولار قالا سىرتىنا، قوسشىعا شىعۋعا ءماجبۇر. ادەتتە بارلىق نىسان ءار جەردە ورنالاسقان - بۇركىتشى، تازى، جىلقى، شەبەرلەر - ءبارى بولەك-بولەك. ەكسكۋرسوۆودتارعا مارشرۋت جاساۋ قيىن، بۇل ۋاقىت الادى، سونىڭ سالدارىنان سەرۆيس زارداپ شەگەدى، - دەدى كاسىپكەر.
ەتنواۋىل ەتنومۋزەي قىزمەتىن دە اتقارادى. مۇندا قازاقستاندىق قولونەرشىلەردى قولداۋعا ەرەكشە نازار اۋدارىلعان. قازاقستاننىڭ تۇكپىر-تۇكپىرىنەن كەلگەن شەبەرلەردىڭ كورمەلەرى مەن شەبەرلىك ساعاتتارى وتكىزىلەدى، كيىزدەن بۇيىم جاساۋ، اعاش ويۋ، سۋرەت سالۋ، ۇلتتىق ورنەك جاساۋ.
كەلۋشىلەر اتقا ءمىنۋدى، ساداق اتۋدى، اسىق اتۋ، توعىزقۇمالاق، ارقان تارتۋ سەكىلدى ۇلتتىق ويىندار ويناۋدى دا تاجىريبەدەن وتكىزە الادى.
باعدارلامادا سونداي-اق:
دومبىرا، ايتىس، تەرمە، جىراۋ سياقتى قازاق كلاسسيكاسىن ءتىرى ورىنداۋ؛
ۇلتتىق بيلەر مەن تەاترلاندىرىلعان قويىلىمدار؛
ءداستۇرلى تاعامدار دايىنداۋعا ارنالعان اسپازدىق شەبەرلىك ساباقتارى؛
بۇركىت جانە تازى يتتەرمەن كورسەتىلىمدەر بار.
تۋريستىك توپتار ءۇشىن 3- 4 ساعاتقا سوزىلاتىن كەشەندى مادەني باعدارلاما ۇسىنىلادى.
ەتنواۋىل جاز بويى ءار سەنبى جانە جەكسەنبى كۇندەرى جۇمىس ىستەيدى.
ەسكە سالا كەتەيىك، بۇعان دەيىن قازاقستان پرەزيدەنتى مەن ابۋ ءدابيدىڭ تاق مۇراگەرى «ەتنواۋىل» كورمەسىن ارالاعانىن جازعان ەدىك.
اۆتور
باقىتگۇل اباي قىزى
