استانادا جارىقتىڭ ءسونۋ سەبەبىن ارنايى كوميسسيا انىقتايدى

كەشە كەشكە ەلوردانىڭ ءبىراز اۋدانى جارىقسىز قالدى. ودان بولەك، سۋ دا توقتاتىلدى. توتەنشە جاعدايدىڭ سەبەبىن ارنايى كوميسسيا قارايتىن بولادى، دەپ حابارلايدى Kazinform.

«كەشەگى جاعداي بويىنشا ارنايى كوميسسيا قۇرىلدى. كوميسسيا توتەنشە جاعدايدىڭ ءمان-جايىن انىقتاۋمەن اينالىسادى. ونىڭ قۇرامىنا بارلىق مۇددەلى مەملەكەتتىك ورگان وكىلدەرى مەن ساراپشىلار كىرەدى. كوميسسيا 10 كۇننىڭ ىشىندە جۇمىسىن اياقتايدى، ءبىز ناتيجەسىن جاريالايمىز»، - دەدى ەنەرگەتيكا مينيسترلىگى اتومدىق جانە ەنەرگەتيكالىق قاداعالاۋ مەن باقىلاۋ كوميتەتىنىڭ ءتوراعاسى سۇڭعات ەسىمحانوۆ استانا قالاسى كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

ودان بولەك، بريفينگ بارىسىندا ب ا ق وكىلدەرى اكىمدىك وكىلىنەن كولىك قوزعالىسى تۋرالى سۇرادى.

«باعدارشامداردىڭ ىستەن شىعۋىنا بايلانىستى جول-كولىك وقيعاسى بويىنشا تالداۋ جۇرگىزىلەدى، اقپاراتتى ۇسىنامىز. جالپى بىزدە زارداپ شەككەندەر تۋرالى اقپارات جوق. ەگەر تىڭ اقپارات بولسا، بىزبەن بايلانىسا الاسىزدار، ءبىز ونى تەكسەرەمىز، ءبىراق بۇگىندە ءى ءى د- گە نەمەسە اكىمدىككە مۇنداي جاعدايلار نە ءوتىنىش، شاعىم تۇسكەن جوق»، - دەپ جاۋاپ بەردى استانا قالاسى اكىمىنىڭ ءبىرىنشى ورىنباسارى نۇرلان نۇركەنوۆ.

بۇعان دەيىن حابارلاعانىمىزداي، كەشە كەشكە استانا قالاسىندا 100 مىڭ ابونەنت جارىقسىز قالعان.