استانادا حالىقارالىق فرانسۋز مەكتەبىنىڭ ىرگەتاسى قالاندى
استانا. KAZINFORM - استانادا قازاقستان مەن فرانسيانىڭ ءبىلىم بەرۋ سالاسىنداعى بىرلەسكەن جوباسى - حالىقارالىق فرانسۋز مەكتەبىنىڭ قۇرىلىسى سالتاناتتى تۇردە باستالدى. بولاشاق ليتسەي جوباسىنىڭ تۇساۋكەسەرى ءوتىپ، مەكتەپ كىرەبەرىسىندەگى ەسكەرتكىش تاقتا اشىلدى.
بۇل جوبا قازاقستان پرەزيدەنتى قاسىم-جومارت توقايەۆ پەن فرانسيا پرەزيدەنتى ەممانۋەل ماكرون اراسىنداعى كەلىسىمدەر اياسىندا جۇزەگە اسىرىلىپ جاتىر. پانسيونى بار بۇل مەكتەپ فرانسۋز جانە قازاقستاندىق ءبىلىم بەرۋ ستاندارتتارىنا ساي جۇمىس ىستەمەك.
سالتاناتتى ءىس-شاراعا فرانسيانىڭ سىرتقى ساۋدا جانە شەتەلدەگى فرانسۋزدار جونىندەگى ۋاكىلەتتى ءمينيسترى لوران سەن-مارتەن ارنايى قاتىستى.
− استاناداعى فرانسۋز مەكتەبى، سونداي-اق جاقىن ارادا ەسىگىن اشاتىن الماتىداعى مەكتەپ جاس قازاقستاندىقتارعا فرانسۋز، قازاق، اعىلشىن جانە ورىس تىلدەرىندە ءبىلىم الۋعا مۇمكىندىك بەرەدى. فرانسۋز ۇلگىسىندەگى اتتەستات العان تۇلەكتەر فرانسيا مەن ەۋروپانىڭ ۇزدىك ۋنيۆەرسيتەتتەرىنە تىكەلەي تۇسە الادى. فرانسۋز حالىقارالىق ءبىلىم بەرۋ جەلىسى - وتە باي ءارى وتە تىعىز قۇرىلىم، الەمنىڭ كوپتەگەن ەلدەرىندە جۇزدەگەن وقۋ ورنىن قامتيدى. استانادا دا وسىنداي تاماشا وقۋ ورنىن اشۋ - ءبىزدىڭ ديپلوماتيالىق بايلانىستارىمىزدى نىعايتۋ ءۇشىن ماڭىزدى قادام ەكەنى انىق، − دەدى لوران سەن-مارتەن.
جوسپار بويىنشا، ورتالىق ازياداعى حالىقارالىق دەڭگەيدەگى جەتەكشى ءبىلىم ورداسىنىڭ ءبىرى بولۋعا ءۇمىتتى بۇل مەكتەپ 2026 -جىلى 1 -قىركۇيەكتە العاشقى وقۋشىلارىن قابىلدايدى.
− استاناداعى حالىقارالىق فرانسۋز مەكتەبىنىڭ العاشقى كىرپىشىنىڭ قالانۋ ءراسىمى ءسوزسىز، ءبىلىم سالاسىنداعى ايتۋلى وقيعاعا اينالماق. بۇل جاي عانا جاڭا مەكتەپ سالۋ ەمەس - قازاقستان مەن فرانسيانىڭ ءبىلىم سالاسىنداعى ىنتىماقتاستىعىنىڭ تەرەڭدەي تۇسكەنىنىڭ بەلگىسى. بۇل مەكتەپ ارحيتەكتۋرالىق جانە ءبىلىم بەرۋ جاعىنان ۇلگى بولىپ، ەلدەرىمىز اراسىنداعى شىنايى كوپىرگە اينالارىنا سەنىمدىمىز، − دەدى قازاقستان رەسپۋبليكاسىنىڭ وقۋ-اعارتۋ ءمينيسترى عاني بەيسەمبايەۆ.
ايتا كەتەيىك، استانادا قازاقستان مەن فرانسيا اراسىنداعى ىسكەرلىك بايلانىستاردى دامىتۋعا ارنالعان قازاقستان-فرانسيا بيزنەس- فورۋمى ءوتتى. قازاقستاندا فرانسۋز ينۆەستيتسياسى بار 170 كومپانيا جۇمىس ىستەيدى.
اۆتور
ايجان سەرىكجان قىزى
