استانادا حالىق سانى 3,5 ميلليون ادامعا جەتەدى
استانا. KAZINFORM - استانا كوشى-قون سالدوسى بويىنشا ەلىمىزدىڭ باسقا قالالارى مەن وڭىرلەرىمەن سالىستىرعاندا ءبىرىنشى ورىندا تۇر. بۇل تۋرالى «جاڭا باستامالار اليانسى» قوعامدىق بىرلەستىگىنىڭ جەتەكشىسى سابىرجان سەيتجانوۆ ايتتى.
«استانا - كوشى-قون سالدوسى بويىنشا ەلىمىزدىڭ باسقا قالالارى مەن وڭىرلەرىمەن سالىستىرعاندا ءبىرىنشى ورىندا. تۇراقتى تۇرۋ ماقساتىندا ادامداردىڭ كوشىپ كەلۋى بويىنشا ەكىنشى ورىندا الماتى تۇر. ەلوردادا 2024 -جىلعى 9 ايدا كوشى-قون سالدوسى 54 مىڭنان استام ادامدى قۇرادى (وتكەن جىلدىڭ وسى كەزەڭىندە بۇل كورسەتكىش 36 مىڭ ادامدى قۇراعان). ونىڭ 1600- ءى - سىرتتان كوشىپ كەلگەندەر، ال 52 مىڭنان استامى ىشكى كوشى-قون ۇلەسىنە جاتادى. 2024 -جىلعى 1-قازانداعى دەرەك بويىنشا، استانا تۇرعىندارىنىڭ سانى 1,5 ميلليوننان استام ادامدى قۇرايدى. «ەڭبەك رەسۋرستارىن دامىتۋ» ا ق ساراپشىلارىنىڭ ايتۋىنشا، 5 جىلدان كەيىن ەلوردا تۇرعىندارىنىڭ سانى 36 پايىزعا ارتىپ، 1,9 ميلليون ادامعا جەتەدى. ال 2050 -جىلى 3,5 ميلليون ادام ءوزىن استانا تۇرعىنى دەپ سانايتىن بولادى»، - دەدى ول «استانا جانە كوشى-قون: دامۋ جانە تۇراقتىلىق ۆەكتورى» اتتى قوعامدىق تىڭداۋدا.
سونداي-اق، ول الداعى جىلدارى ەلوردا تۇرعىندارىنىڭ سانى قانداي پروگرەسپەن وسەتىنىن اتاپ ءوتتى.
«ەڭبەك رەسۋرستارىن دامىتۋ» ا ق ساراپشىلارى قالانىڭ دەموگرافيالىق دامۋ سسەناريىن دە جاساپ شىقتى. بۇل بولجامنىڭ ەرەكشەلىگى سول، ول قازىردىڭ وزىندە 25 جىلدان كەيىن باس قالادا تۇراتىن ميگرانتتار مەن ولاردان تاراعان ۇرپاقتىڭ ۇلەسىن كورسەتىپ بەرە الادى. وسى بولجامعا سەنسەك، 2050 -جىلى ەلوردا تۇرعىندارىنىڭ 47 پايىزىن كوشىپ كەلۋشىلەر قۇرايتىن بولادى»، - دەدى سابىرجان جارىلقاعان ۇلى.
سپيكەردىڭ ايتۋىنشا، رەتتەلمەيتىن كوشى-قون كريمينوگەندىك احۋالدى كۇردەلەندىرە تۇسەدى. ميگرانتتار سانىنىڭ وسۋىمەن بىرگە قىلمىستىق جانە اكىمشىلىك زاڭ بۇزۋشىلىقتار كورسەتكىشى دە وسپەك. وسى سەبەپتى بولاشاقتا قيىن جاعدايدا قالماس ءۇشىن ءتيىستى شارالاردى قازىردەن قولعا الۋ كەرەك.
اۆتور
ەربول جانات
