استانادا شەتەلدىكتەر جىل باسىنان بەرى 70 قىلمىس جاساعان

استانا. KAZINFORM - جىل باسىنان بەرى ەلورداداعى شەتەل ازاماتتارى 70 قىلمىس جاساعان. بۇل تۋرالى قالالىق ءماسليحاتتىڭ كەزەكتى سەسسياسىندا استانا قالاسى پوليتسيا دەپارتامەنتىنىڭ باستىعى مارات تولەبايەۆ مالىمدەدى.

- قىلمىستىق احۋالعا كوشى-قون ۇدەرىستەرى دە ءوز اسەرىن تيگىزىپ جاتىر. جىل باسىنان بەرى ەلورداعا 24,5 مىڭ شەتەل ازاماتى كەلدى، ولاردىڭ 90 پايىزى - جۇمىس ىستەۋ ماقساتىندا. سونىمەن قاتار 605 قانداس ازاماتتىق الدى. ءبىز قۇرىلىس نىساندارىندا جانە بازارلاردا ەڭبەك ەتەتىن شەتەلدىكتەردىڭ ءجۇرىس-تۇرىسىن باقىلاۋدا ۇستاپ وتىرمىز، - دەدى م. تولەبايەۆ.

پوليتسيا مالىمەتىنشە، شەتەلدىكتەردىڭ قاتىسۋىمەن 70 قىلمىس تىركەلىپ، ولار بويىنشا 84 قىلمىستىق ءىس قوزعالعان. اكىمشىلىك قۇقىق بۇزۋشىلىق جاساعانى ءۇشىن 20 مىڭنان استام شەتەل ازاماتى مەن 141 جۇمىس بەرۋشى جاۋاپكەرشىلىككە تارتىلدى. 250-دەن استام شەتەلدىكتىڭ ەلدە بولۋ مەرزىمى قىسقارتىلىپ، 603 شەتەل ازاماتى ەلدەن شىعارىلدى.

- ەلورداداعى جوعارى ءومىر ءسۇرۋ دەڭگەيى ەلىمىزدىڭ وزگە وڭىرلەرىنەن كەلگەن ازاماتتاردى دا تارتادى. الايدا، وكىنىشكە قاراي، ولاردىڭ ءبىر بولىگى ءتۇرلى قۇقىق بۇزۋشىلىقتارعا جول بەرۋدە. بيىل باسقا قالالاردان كەلگەن 848 ازامات قىلمىس جاساعان، ولاردىڭ 30 پايىزى قىلمىستىق جاۋاپكەرشىلىككە تارتىلدى، - دەدى دەپارتامەنت باسشىسى.

سپيكەردىڭ ايتۋىنشا، پوليتسيا قوعامدا قىلمىسقا مۇلدەم توزبەۋشىلىك قاعيداسىن قالىپتاستىرۋ بويىنشا جۇمىستى جالعاستىرىپ جاتىر. جىل باسىنان بەرى 773 مىڭ اكىمشىلىك قۇقىق بۇزۋشىلىق انىقتالىپ، 9 ميلليارد تەڭگەدەن استام ايىپپۇل سالىنعان.

ۆانداليزمگە قارسى ءىس-شارالار اياسىندا كوممۋنالدىق مۇلىكتى بۇلدىرگەن نەمەسە جويعان 100-دەن استام ادام جاۋاپقا تارتىلعان. ولاردىڭ 61 ءى اكىمشىلىك قاماققا الىنعان، 99 ادامعا جالپى سوماسى 6 ميلليون تەڭگەدەن استام ايىپپۇل سالىنعان. «تازا قازاقستان» اكسياسى اياسىندا 60 مىڭنان استام ادامعا ايىپپۇل جازىلعان.

ەسكە سالا كەتەيىك، تۇركىستان وبلىسىندا كوللەدج ستۋدەنتىن ءولتىرۋ كۇدىگىمەن شەتەلدىك ۇستالعانىن جازعانبىز.

اۆتور

تاستان تويانوۆ