استانادا دروننىڭ كومەگىمەن تۇرمەگە ەسىرتكى كىرگىزبەك بولعاندار ۇستالدى

استانا. KAZINFORM - پوليتسيا قىزمەتكەرلەرى دروننىڭ كومەگىمەن كولونياعا ماريحۋانا جەتكىزبەك بولعانداردىڭ جولىن كەستى.

Polisia.kz-تىڭ مالىمەتىنشە، ءتارتىپ ساقشىلارى ميحايلوۆكا-ارشالى اۆتوجولىندا Kia K5 اۆتوكولىگىن توقتاتقان.

انىقتالعانداي، كولىكتى بۇرىن باس بوستاندىعىنان ايىرۋ ورنىندا جازاسىن وتەگەن ەر ادام جۇرگىزگەن. سونداي-اق، اۆتوكولىكتە تاعى ەكى ەر ادام بولعان، ونىڭ بىرەۋى بۇرىن استانا قالاسى قىلمىستىق- اتقارۋ جۇيەسى دەپارتامەنتى №2-مەكەمەسىندە جازاسىن وتەگەن.

«اۆتوكولىكتى ءتىنتۋ بارىسىندا وسىمدىك تەكتەس زاتتارى بار ەكى تۇيىنشەك، سونداي-اق، ەسىرتكىنى كولونيا اۋماعىنا جەتكىزۋ ءۇشىن قولدانعان درون تاركىلەندى»، - دەلىنگەن اقپاراتتا.

ساراپتاما ناتيجەسى بويىنشا سالماعى 23,7 گرام ماريحۋانا تاركىلەندى. ۇستالعاندارعا قاتىستى سوتقا دەيىنگى تەرگەۋ امالدارى ءجۇرىپ جاتىر. ارشالى اۋداندىق پوليتسيا ءبولىمى ءوزارا ءىس-قيمىل جاساي وتىرىپ، №2-مەكەمەنىڭ قىزمەتكەرلەرى تاركىلەگەن ەسىرتكىنى ىقتيمال الۋشىنى انىقتاۋ بويىنشا ءىس-شارالار جۇرگىزۋدە.