استانادا دۇنيەجۇزىلىك كوشپەندىلەر ويىندارىنا ۆولونتەرلەردى ىرىكتەۋ باستالدى
استانا. KAZINFORM - بيىل 8-14- قىركۇيەك كۇندەرى استانادا V دۇنيەجۇزىلىك كوشپەندىلەر ويىندارى وتەدى. جۇزدەن استام مەملەكەتتەن 4 مىڭعا جۋىق سپورتشى قاتىساتىن ءدۇبىرلى دوداعا ەرىكتىلەر شاقىرىلۋدا.
بەسىنشى دۇنيەجۇزىلىك كوشپەندىلەر ويىندارىن دايىنداۋ جانە وتكىزۋ ديرەكسياسى ەلوردالىق ج و و- لار مەن كوللەدجدەردىڭ ستۋدەنتتەرىنە اقپاراتتىق-ءتۇسىندىرۋ جۇمىستارىن باستادى. بۇگىن ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتتەرىمەن كەزدەسۋ ءوتتى.
ۆولونتەرگە قانداي تالاپ قويىلادى
«ەرىكتىلەرگە قويىلاتىن نەگىزگى كريتەريلەر: جاسى 18 دەن اسۋى، قوعامدىق جۇمىستارعا بەلسەندى قاتىسۋى، بىرنەشە ءتىل ءبىلۋى، ۇلتتىق سپورتتان نەمەسە ۇلتتىق مادەنيەتىمىزدەن حاباردار بولىپ، كوشپەندىلەر ويىندارىنا شىن نيەتىمەن ۇلەس قوسۋعا ىنتاسى بولۋى كەرەك. 18 گە تولماعان، بىرنەشە ءتىل بىلەتىن، جان-جاقتى مەكتەپ وقۋشىلارى دا ۇسىنىس جىبەرىپ جاتىر. ءبىز ول ۇسىنىستاردى جەكە-جەكە قاراستىرامىز، ولاردىڭ اتا-انالارىنان رۇقسات الۋ كەرەك بولادى. باسقا وڭىرلەردەن دە تالانتتى جاستار حابارلاسسا، مىندەتتى تۇردە ءاربىرىن جەكە قاراستىرىپ، شەشىم قابىلدايمىز»، - دەيدى V دۇنيەجۇزىلىك كوشپەندىلەر ويىندارىن دايىنداۋ جانە وتكىزۋ ديرەكسياسى باسشىسىنىڭ ورىنباسارى ابىلاي قوندىبايەۆ.
سپيكەردىڭ ايتۋىنشا، قىرعىزستاننان، رەسەيدەن، ەۋروپا ەلدەرىندەگى ۆولونتەرلەردەن دە ۇسىنىس تۇسۋدە. شەتەلدىك ۆولونتەرلەر دە قابىلدانادى، ءبىراق اسا كوپ بولمايدى. ءبىراق ۆولونتەرلەردىڭ نەگىزگى كونتينگەنتى استانا قالاسىنان بولعانى ابزال.
جالپى كوشپەندىلەر ويىندارىنا 1000 ەرىكتى ىرىكتەلىپ الىنادى دەپ جوسپارلانعان. ساۋالنامانى ەلوردالىق وقۋ ورىندارىندا نەمەسە worldnomadgames.kz/ سايتىندا ونلاين تولتىرىپ، ۇيىمداستىرۋشىلاردان كەرى بايلانىس كۇتۋ قاجەت. ساۋالنامادا ۇمىتكەر جەكە مالىمەتتەرىن، ۆولونتەرلىك تاجىريبەسىن، كيىم ولشەمىن، تىلدەردى ءبىلۋ دەڭگەيىن، قىزىعۋشىلىقتارى مەن داعدىلارىن جازۋ كەرەك.
ۋنيۆەرسيتەت بازالارىندا نەمەسە ديرەكتسيا كەڭسەسىندە ءاربىر ۇمىتكەرمەن سۇحبات جۇرگىزىلەدى. سۇحبات كەزىندە ۇمىتكەردىڭ قابىلەتتەرى مەن بەيىنى انىقتالادى. ىرىكتەۋ مەن ءوتىنىم قابىلداۋ ماۋسىم ايىنا دەيىن جالعاسادى. ىرىكتەۋدىڭ ەڭ سوڭعى كەزەڭى - ءاربىر ەرىكتىمەن كەلىسىمشارتقا قول قويۋ بولماق.
ۆولونتەرلەر قانداي جۇمىسپەن اينالىسادى
كوشپەندىلەر ويىندارىندا ۆولونتەرلەر اۋدارماشى، دەلەگاتتاردى الىپ ءجۇرۋ، سالتاناتتى راسىمدەر جانە پروتوكول، باسپا ءسوز ورتالىعى، سپورتتىق سايىستار، تاسىمالداۋ، ورنالاستىرۋ جانە تاماقتاندىرۋ، كۇتىپ الۋ جانە شىعارىپ سالۋ سەكىلدى فۋنكتسيونالدىق باعىتتار بويىنشا بولىنەدى. ءار ۆولونتەردىڭ جۇمىس كۇنى 6-8 ساعاتتان اسپايدى.
«ج و و باسشىلىعىنا حات جولداپ، ويىندار كەزىندە ۆولونتەردى ساباقتان بوساتۋدى سۇرايمىز. ءبىراق ەرىكتىنىڭ ءوزى جىبەرىپ العان ساباقتارىن كەيىن قوسىمشا وقىپ، باعدارلامانى قۋىپ جەتۋى كەرەك. ءتورت مىڭ سپورتشىدان بولەك، استاناعا 100 مىڭنان استام تۋريست كەلەدى دەپ بولجانىپ وتىر. ولارمەن اكىمدىك جۇمىس ىستەيدى، ءوز ۆولونتەرلارىن شاقىرادى. ءبىزدىڭ ەرىكتىلەر تەك قانا ويىنعا كەلەتىن قوناقتارعا كومەك كورسەتەتىن بولادى. ءار ۆولونتەر گرافيگى ءوزىنىڭ فۋنكتسيونالدى باعىتىنا بايلانىستى بولادى. مىسالى، كۇتىپ الۋ مەن شىعارىپ سالۋ جۇمىستارى بولسا، تۇنگى ۋاقىتتاعى رەيستەرگە شىعۋى كەرەك بولادى»، - دەپ ءتۇسىندىردى ابىلاي قوندىبايەۆ.
بۇل رەتتە ءاربىر ۆولونتەر كيىم-كەشەكپەن، تولىققاندى تاماقپەن، بايلانىسپەن، كولىكپەن قامتىلادى.
ۆولونتەر بولۋ نەلىكتەن ماڭىزدى
سپيكەردىڭ ايتۋىنشا، كوشپەندىلەر ويىندارىنىڭ ۆولونتەرىنە ەش اقى تولەنبەيدى، ءبىراق باعالى ماراپاتتار مەن ءتۇرلى مۇمكىندىكتەر جولى اشىلادى.
«ويىندارعا اتسالىسقان ءاربىر ۆولونتەرگە حالىقارالىق سەرتيفيكات بەرىلەدى. بۇل شەتەلدىك بەدەلدى وقۋ ورىندارىنا نەمەسە تاعىلىمداماعا قۇجات تاپسىراردا ۇلكەن ارتىقشىلىق بەرەدى. ءىس- شارا اياقتالعان سوڭ، ءوزىن جاقسى قىرىنان كورسەتكەن ەرىكتىلەر مەن كوورديناتورلارعا العىس حاتتار مەن باعالى سىيلىقتار بەرىلەدى. بارلىق ەرىكتىلەردى ويىن كۇندەرى وتەتىن مادەني-ءىس شارالارعا اككرەديتتەيمىز، ولاردى تەگىن تاماشالاۋ مۇمكىندىگى بولادى. ءبىر اپتا بويى قوعامدىق كولىكتە تەگىن جۇرە الادى. وزگە قالالاردان كەلەتىن ۆولونتەرلەردى جاتىن ورنىمەن قامتۋ ماسەلەسىن پىسىقتاپ جاتىرمىز»، - دەدى ا. قوندىبايەۆ.
سونىمەن بىرگە، ىرىكتەۋ كەزەڭىنەن وتكەن مىڭ ۆولونتەرگە ارنايى وقىتۋ-دايىنداۋ جۇمىستارى جۇرگىزىلەدى. ولار شەتەلدىك قوناقتاردى كۇتىپ الۋ، الىپ ءجۇرۋ، كوماندادا جۇمىس ىستەۋ بويىنشا ترەنينگتەرگە قاتىسادى.
«حالىقارالىق جارىستا ەرىكتى بولۋ مول تاجىريبە بەرەدى جانە ۇلكەن ومىرلىك مەكتەپ بولادى. جاڭا ادامدارمەن تانىسىپ، جاڭا دوستار تابۋعا بولادى. ىرىكتەۋگە ءوتىنىم بەرەتىن جاستىڭ ەڭ ءبىرىنشى ماقساتى وسى بولۋى كەرەك دەپ ويلايمىن»، - دەدى ديرەكسيا وكىلى.
