استانادا «دامۋ» باعدارلاماسىن پايدالانىپ نەسيە راسىمدەگەندەر سوتتالدى

استانا. KAZINFORM - استانادا ءبىر توپ ادام جاساعان الاياقتىق جانە قىلمىستىق جولمەن الىنعان كىرىستەردى زاڭداستىرۋ فاكتىسى بويىنشا ۇكىم شىعارىلدى. بۇل تۋرالى قارجىلىق مونيتورينگ اگەنتتىگى باسپا ءسوز قىزمەتى حابارلادى.

تەرگەۋدى ق م ا استانا قالاسى بويىنشا دەپارتامەنتى جۇرگىزدى.

تەرگەۋ بارىسىندا انىقتالعانداي، 2023 -جىلى كۇدىكتى ايەل، ۇلىنىڭ اتىنان بەرىلگەن سەنىمحات نەگىزىندە ارەكەت ەتىپ، «بانك سەنتركرەديتتەن» جالپى سوماسى 115 ميلليون تەڭگە بولاتىن ەكى نەسيە راسىمدەگەن. نەسيە «دامۋ» كاسىپكەرلىكتى دامىتۋ قورى سۋبسيديالايتىن مەملەكەتتىك جەڭىلدەتىلگەن نەسيەلەۋ باعدارلاماسى اياسىندا الىنعان.

نەسيە الۋ ماقساتىندا بانككە جالعان قۇجاتتار، ونىڭ ىشىندە مۇلىكتى كەپىلگە قويۋ بويىنشا جالعان باعالاۋ اكتىلەرى ۇسىنىلعان. وڭ قورىتىندى الۋ ءۇشىن كۇدىكتىلەر نارىقتىق قۇنىنا سايكەس كەلمەيتىن جىلجىمايتىن مۇلىكتى اتىنا راسىمدەگەن تۇلعالاردى تارتقان.

سونداي-اق، 2023 -جىلدىڭ جەلتوقسانىندا كۇدىكتىلەر قاتەرلى ىسىكپەن اۋىرعان ايەلدىڭ اتىنا 155 ميلليون تەڭگە كولەمىندە تاعى ءبىر نەسيە راسىمدەگەن.

نان ءپىسىرۋ جابدىقتارىن ساتىپ الۋ جەلەۋىمەن ولار ايەلدىڭ ەلەكتروندىق سيفرلىق قولتاڭباسىن (ە س ق) پايدالانىپ، جالعان كەلىسىمشارتتار، شوت-فاكتۋرالار، ورىندالعان جۇمىستار تۋرالى اكتىلەر ازىرلەگەن. بۇل قۇجاتتار جابدىقتى جەكە كاسىپكەرلەر جەتكىزگەنىن راستاعانداي بولعانىمەن، ءىس جۇزىندە ەشقانداي جەتكىزۋ بولماعان.

قاراجات جەكە كاسىپكەرلەردىڭ شوتتارىنا اۋدارىلىپ، قولما-قول اقشاعا اينالدىرىلعان. ايەل قايتىس بولعاننان كەيىن دە ۇيىمداستىرۋشىلار جالعان قۇجاتتاردى كەيىنگى كۇنمەن راسىمدەۋدى جالعاستىرعان.

تەرگەۋ بارىسىندا بانك قىزمەتكەرىنىڭ نەسيە وتىنىمدەرىن راسىمدەۋگە كومەكتەسكەنى ءۇشىن 500 مىڭ تەڭگە كولەمىندە سىياقى العانى انىقتالدى.

بانككە كەلتىرىلگەن جالپى شىعىن - 155 ميلليون تەڭگە.

سوت ۇكىمىمەن كۇدىكتىلەر كىنالى دەپ تانىلىپ، ءارقايسىسىنا 5 جىل مەرزىمگە باس بوستاندىعىنان ايىرۋ جازاسى تاعايىندالدى. سونداي-اق، قىلمىستىق جولمەن الىنعان كىرىستەرگە ساتىپ الىنعان دەمالىس بازاسى، 2000 شارشى مەتر جەر تەلىمى، ەلورداداعى كوممەرتسيالىق جىلجىمايتىن مۇلىك مەملەكەت كىرىسىنە تاركىلەندى.

ۇكىم زاڭدى كۇشىنە ەنگەن جوق.

ايتا كەتەلىك باتىس قازاقستان وبلىسىندا ءىرى ينتەرنەت-الاياقتىق اشكەرەلەنگەن ەدى.