استانادا ءبىر پاتەردەن 100 ميلليون تەڭگەنىڭ مۇلكى ۇرلانعان
استانا. KAZINFORM - ەلوردا پوليتسياسى تۇرعىنعا 100 ميلليون تەڭگەدەن استام شىعىن كەلتىرگەن ءىرى پاتەر ۇرلىعىنا قاتىسى بار كۇدىكتىلەردى ۇستادى.
كۇدىكتىلەردىڭ ەكەۋى ۇستالىپ، بىرەۋى ىزدەستىرىلىپ جاتىر.
ەلوردادا سارىارقا اۋدانىنىڭ پوليتسەيلەرى جەدەل-ىزدەستىرۋ شارالارى بارىسىندا ءىرى پاتەر ۇرلىعىنا قاتىستى دەگەن كۇدىكپەن 46 جانە 60 جاستاعى ەكى ەر ادامدى انىقتادى. كۇدىكتىلەر ۇستالعاننان بىرنەشە كۇن بۇرىن جەرگىلىكتى تۇرعىن پوليتسياعا حابارلاسىپ، پاتەرىنەن 4 شۆەيتساريالىق ساعات، 2200 ا ق ش دوللارى جانە 650 مىڭ تەڭگە ۇرلانعانىن حابارلاعان. ەر ادام كەلتىرىلگەن ماتەريالدىق شىعىندى 101 ميلليون تەڭگەدەن استام دەپ باعالاعان.
جابىرلەنۋشىنىڭ ايتۋىنشا، ول ساعاتتىڭ جوعالىپ كەتكەنىن الماتى قالاسىنا 10 كۇننەن استام ساپارىندا بولىپ، كەلگەن سوڭ بىلگەن. كەلگەننەن كەيىن كيىم اۋىستىراتىن بولمەدە زاتتاردى سۇرىپتاپ جاتقاندا، ول اشىلعان سەيفتى كورگەن. وندا قۇنى 110 مىڭ ا ق ش دوللارى تۇراتىن Breguet Tourbillon، ءارقايسىسى 55 مىڭ ا ق ش دوللارى تۇراتىن Franck Muller مەن Daniel Roth جانە 1000 ا ق ش دوللارى تۇراتىن Rado ساعاتتارىنىڭ قولدى بولعانىن اڭعارعان.
سونىمەن قاتار سەيفتە تۇرعان 650 مىڭ تەڭگە مەن 2200 ا ق ش دوللارى دا ۇرلانعانىن بىلگەن. جەدەل-ىزدەستىرۋ ءىس-شارالارىن جۇرگىزۋ بارىسىندا جەدەل ۋاكىلدەر ۇرىلاردىڭ ىزىنە ءتۇسىپ، ولاردى تاپقان.
بەلگىلى بولعانداي ولار پاتەردىڭ يەسى جوق ەكەنىن ءبىلىپ، ءۇي-جايعا كىلتتەردى تاڭداۋ ارقىلى كىرگەنى انىقتالعان. ۇستالعاندار كىناسىن مويىنداپ، ۇرلانعان قۇندى زاتتار جارتىلاي تاركىلەندى. ولار شىمكەنت قالاسىنداعى بازاردا Breguet Tourbillon ساعاتىن بۇزىپ، التىن بولشەكتەرىن بەلگىسىز ايەلگە ساتىپ جىبەرگەن.
جەدەل قىزمەتكەرلەر كۇدىكتىلەردىڭ تۇرعىلىقتى جەرىن ءتىنتۋ بارىسىندا قۇلىپتاردى اشۋعا ارنالعان قۇرىلعىلار مەن نەگىزگى اشقان كىلتتەردى تاركىلەدى. قازىرگى ۋاقىتتا توپتىڭ ءۇشىنشى مۇشەسىنىڭ تۇرعان جەرىن انىقتاۋ ءۇشىن جەدەل-ىزدەستىرۋ جۇمىستارى جالعاسۋدا.
ۇستالعاندار استانا قالاسى پ د ۋاقىتشا ۇستاۋ يزولياتورىنا قامالدى، سوتقا دەيىنگى تەرگەۋ امالدارى جۇرگىزىلىپ جاتىر.
