استانادا «بىرلىك» مارافونىندا 3 مىڭنان استام ادام جۇگىردى
استانا. KAZINFORM - قازاقستان حالقى اسسامبلەياسىنىڭ 30 جىلدىعىنا وراي، ەلىمىزدىڭ بارلىق وڭىرىندە «بىرلىك جۇگىرىسى - 2025» رەسپۋبليكالىق مارافونى ءوتتى. سپورت مەرەكەسىنە ەل بويىنشا 17 مىڭ ادام قاتىسسا، ونىڭ 3 مىڭى ەلوردادا باس قوستى، دەپ حابارلايدى Kazinform ءتىلشىسى.
اتالعان شارا قازاقستانداعى بارلىق ەتنوستاردى دەنى ساۋ جانە ءبىرتۇتاس ۇلت بولۋعا ىنتالاندىرۋدى كوزدەيدى. اسىرەسە ەرەسەكتەرمەن بىرگە بالالاردىڭ، قارتتاردىڭ، مۇگەدەكتىگى بار جانداردىڭ دا جۇگىرۋىنە بارىنشا جاعداي جاسالدى.
قاتىسۋشىلار تاڭعى 5:30 دان باستاپ جينالا باستادى، ال العاشقى جۇگىرىستەر 7:00-دە باستالدى. جۇگىرۋ باعىتى ەكسپو اۋماعىنان باستالىپ، «بايتەرەك» مونۋمەنتىنە دەيىن جالعاستى، ودان كەرى قايتىپ، تۇركىستان جانە اقمەشىت كوشەلەرى ارقىلى ءوتتى.
جۇگىرىس بىرنەشە قاشىقتىقتا - 1 ك م، 5 ك م، 10 جانە 21,1 شاقىرىمدا ۇيىمداستىرىلدى، سوندىقتان ءاربىر قاتىسۋشى وزىنە ىڭعايلى فورماتتى تاڭداي الدى. اسىرەسە، 30 شاقىرىمدىق كوماندالىق ەستافەتاعا (6×5 ك م) ەرەكشە كوڭىل ءبولىندى. ەستافەتا ەرەجەسىنە سايكەس، ءار كوماندادا كەمىندە ءبىر ايەل ادام بولۋى كەرەك.
جۇگىرۋگە ءتۇرلى جاس پەن ۇلت وكىلدەرى، كاسىبي سپورتشىلاردان باستاپ سالاۋاتتى ءومىر سالتىن ۇستاناتىن اۋەسقويلارعا دەيىن بارلىعى قاتىستى. پاۆلودار قالاسىنان كەلگەن مارينا شنايدەر 50- 59 جاس ارالىعىنداعى توپتا جەڭىمپاز اتاندى.
- مەنىڭ جاسىم 52 دە، جۇگىرۋمەن جىلدار بويى اينالىسامىن. ماماندىعىمنىڭ سپورتقا قاتىسى جوق، «قازاقستان اليۋمينيى» زاۋىتىندا لابورانت- حيميك بولىپ جۇمىس ىستەيمىن. پاۆلوداردا «Running Pavlodar» قاۋىمداستىعىن قۇرعانبىز، بۇگىن 10 شاقتى ادام بولىپ استاناعا كەلدىك. سوڭعى جىلدارى ەلىمىزدە جۇگىرۋ مادەنيەتى دامىپ جاتقانىن ەرەكشە بايقاۋعا بولادى جانە بۇل قۋانتادى. مىسالى 5 جىل بۇرىن مۇنداي بەلسەندىلىك بولعان جوق. مادەنيەتپەن بىرگە، ينفراقۇرىلىم دا جاقسى دامىپ كەلەدى، بىزدە پاۆلوداردا شاڭعى بازاسى مەن ەلىمىزدەگى ەڭ ۇزىن جاعالاۋ بار. ادامدار جۇگىرۋشىلەرگە جول بەرۋ كەرەك ەكەنىن تۇسىنە باستادى. بارشاڭىزدى قازاقستان حالقىنىڭ بىرلىگى كۇنىمەن قۇتتىقتايمىن! بۇگىن وسىنشا كوپ ادامنىڭ، ونىڭ ىشىندە بالالاردىڭ دا جينالعانى - وتە قۋانىشتى جاعداي. بۇل ناعىز جۇگىرۋ مەرەكەسى! مەن قازاقستان سياقتى كوپ ۇلتتى ءارى تاتۋ ەلدە تۇراتىنىما ماقتانامىن. بارشاڭىزعا زور دەنساۋلىق، اماندىق- ساۋلىق جانە جاقسىلىقتار تىلەيمىن، - دەيدى پاۆلودارلىق قاتىسۋشى.
ايتا كەتەيىك، «بىرلىك جۇگىرىسى» بىرنەشە جىل بويى ۇيىمداستىرىلىپ كەلەدى جانە ەتنوسارالىق بىرلىكتى نىعايتىپ، سالاۋاتتى ءومىر سالتىن ناسيحاتتايتىن، قوعامدا ءوزارا قولداۋ مەن بىرلىك رۋحىن قالىپتاستىراتىن جاقسى داستۇرگە اينالدى. وتكەن جىلى مارافونعا 15 وڭىردەن 15 مىڭ ادام قاتىسسا، بيىل ولاردىڭ سانى 17 مىڭعا دەيىن ارتتى.
ءىس-شارا قازاقستان حالقى اسسامبلەياسىنىڭ باستاماسىمەن، استانا قالاسىنىڭ ترياتلون فەدەراتسياسى، تۋريزم جانە سپورت مينيسترلىگى، مادەنيەت جانە اقپارات مينيسترلىگى مەن استانا قالاسى اكىمدىگىنىڭ قولداۋىمەن ۇيىمداستىرىلدى.
1-مامىر مەرەكەسىنىڭ قۇرمەتىنە بۇگىن ەلوردادا زياتكەرلىك ۆيكتورينالار مەن كورمەلەردەن باستاپ ءتۇرلى كونتسەرتتەر مەن جارىستارعا دەيىن ونداعان مادەني- سپورتتىق ءىس- شارا ءوتىپ جاتىر.
ايجان سەرىكجان قىزى
